വയനാട് : ടൗണ്ഷിപ്പ് സന്ദര്ശനത്തിന് പിന്നാലെ ഉണ്ടായ സൈബര് ആക്രമണത്തില് നടന് മമ്മൂട്ടിയോട് പരസ്യമായി ക്ഷമ പറഞ്ഞ് മുഖ്യമന്ത്രി പിണറായി വിജയന്.മഹാനടന് അത്തരമൊരു പ്രചാരണത്തിന്റെ ഭാഗമായി മനസിന് വിഷമമോ പ്രയാസമോ ഉണ്ടായിട്ടുണ്ടെങ്കില് സിപിഎമ്മിന്റെ ഏതെങ്കിലും ആളുകള്ക്ക് അതില് ബന്ധമുണ്ടെന്ന് കരുതുന്നുണ്ടെങ്കില് ഈ ഘട്ടത്തില് പരസ്യമായി ക്ഷമ പറയുന്നു. സിപിഎമ്മിന്റെ ആളുകള്ക്ക് മമ്മൂട്ടിയെ തിരിച്ചറിയാനും മനസിലാക്കാനും കഴിയാത്ത സാഹചര്യമായോയെന്ന് മുഖ്യമന്ത്രി ചോദിച്ചു. വിഷയം വിവാദമാക്കാന് താല്പര്യമുള്ളവര് വലിയ വിവാദമാക്കി.
പിന്നീട് വന്ന വാര്ത്തകള് സാമൂഹ്യ മാധ്യമത്തില് മമ്മൂട്ടിയെ വലിയതോതില് ആക്രമിക്കുന്നു എന്നാണ്.എന്തൊരു നിര്ഭാഗ്യകരമായ അവസ്ഥയാണിത്.മമ്മൂട്ടി നന്മ മാത്രം വിചാരിച്ച് കേരളത്തിലെ ഏറ്റവും മാതൃകാപരമായി പൂര്ത്തിയാക്കിയ പദ്ധതി കാണാന് പോയി. അദ്ദേഹം ആരെയും അറിയിച്ചിട്ടല്ല ടൗണ്ഷിപ്പ് സന്ദര്ശിക്കാന് എത്തിയത്.
വയനാട് ടൗണ്ഷിപ്പ് കാണാന് വീട്ടുകാര്ക്ക് ഒപ്പം എല്ലാ ജില്ലകളില് നിന്നും ആളുകള് എത്തി. ആ കൂട്ടത്തില് ഒരാളാണ് മലയാളത്തിന്റെ മഹാനടന് മമ്മൂട്ടി.
ചെന്നൈയില് നിന്ന് നേരിട്ടാണ് മമ്മൂട്ടി വയനാട് പോയത്. പൊതുകാര്യങ്ങളില് ഇടപെട്ടുകൊണ്ടിരിക്കുന്ന പൊതുപ്രവര്ത്തകനാണ് സിപിഎം ജില്ലാ സെക്രട്ടറി റഫീഖ്. കേരളത്തില് എന്തും വിവാദമാക്കാന് ശ്രമിക്കുന്ന ആളുകള് ഉണ്ടല്ലോ അവര്ക്ക് അവസരമുണ്ടാക്കി കൊടുക്കുകയല്ലേ എന്നതാണ് മമ്മൂട്ടി റഫീഖിനോട് ചോദിച്ചത്. ഒരു ക്യാമറയ്ക്ക് മുന്നിലും പറഞ്ഞതല്ല ഇത്. നമ്മുടെ നാട്ടില് ക്യാമറയും ശരീരത്തില് വച്ച് നടക്കുന്ന ആളുകള് ധാരാളമുണ്ട്. അങ്ങനെ ഒരാള് ഇവര്ക്ക് അടുത്ത് നിന്നിട്ടുണ്ടാകുമെന്ന് മുഖ്യമന്ത്രി പറഞ്ഞു.
സാമൂഹ്യ മാധ്യമങ്ങള് ആരുടെയും നിയന്ത്രണത്തില് അല്ല. അതില് പലരും അഭിപ്രായങ്ങള് പറഞ്ഞെന്നുവരും.എന്നാല് മമ്മൂട്ടിയെ പോലുള്ള മഹാനടനെ മനസിലാക്കാന് കഴിയണമെന്ന് മാത്രം. റഫീഖ് ഇതുമായി ബന്ധപ്പെട്ട കൃത്യമായ പ്രതികരിച്ചിട്ടുണ്ട്.എങ്ങനെ നല്ലൊരു കാര്യത്തെ ചീത്തയാക്കാന് കഴിയുന്നു എന്നതിന്റെ ഉദാഹരണമാണിത്. നന്മയ്ക്കൊപ്പം നില്ക്കാന് കഴിയണം വിവേകത്തോടെ വേണം ആരായാലും ഇടപെടാനെന്നും ഇതൊരു അനുഭവ പാഠമാണെന്നും മുഖ്യമന്ത്രി കൂട്ടിച്ചേര്ത്തു.
