ചവറ: ചട്ടമ്പിസ്വാമികള് സംന്യാസിശ്രേഷ്ഠന് മാത്രമല്ല, വരും തലമുറയ്ക്ക് നേരിന്റെയും നന്മയുടെയും വഴി ആത്മീയതയിലൂടെ തുറന്നുകൊടുത്ത ആദര്ശധീരനും കൂടിയാണെന്ന് കേന്ദ്രമന്ത്രി ശോഭ കരന്തലജേ. പന്മന ആശ്രമത്തില് ചേര്ന്ന ചട്ടമ്പിസ്വാമി തീര്ത്ഥാടന മഹാമഹ സമാരംഭസഭ ഉദ്ഘാടനം ചെയ്യുകയായിരുന്നു മന്ത്രി.
ചട്ടമ്പിസ്വാമികളും നാരായണഗുരുദേവനും കൊളുത്തിയ സമത്വത്തിന്റെ തിരിനാളമാണ് കേരളത്തിന്റെ സാമൂഹ്യവ്യവസ്ഥിതിയില് പില്ക്കാലത്ത് ചലനങ്ങള് സൃഷ്ടിച്ചത്. ശ്രീശങ്കരാചാര്യര്ക്ക് ഭാരതീയ മനസ്സില് എന്ത് സ്ഥാനമാണോ ഉള്ളത് അതേ സ്ഥാനമാണ് ചട്ടമ്പിസ്വാമികള്ക്കും നാരായണഗുരുദേവനും നല്കേണ്ടത്. അവര് കൊളുത്തിയ തിരിനാളം കെടാതെ സൂക്ഷിക്കണമെന്നും കേന്ദ്രമന്ത്രി പറഞ്ഞു.
വാഴൂര് തീര്ത്ഥപാദാശ്രമ മഠാധിപതി സ്വാമി പ്രജ്ഞാനാനന്ദ തീര്ത്ഥപാദര് അധ്യക്ഷത വഹിച്ചു. കേരളപുരം ആനന്ദാശ്രമ മഠാധിപതി സ്വാമി ബോധേന്ദ്രതീര്ത്ഥ മുഖ്യപ്രഭാഷണം നടത്തി. ചട്ടമ്പിസ്വാമികളുടെ ഛായാചിത്രം കേന്ദ്രമന്ത്രിക്ക് നല്കി. ആശ്രമം പ്രോജക്ട് രേഖ ആശ്രമം സെക്രട്ടറി ഗിരീഷ്കുമാര് മന്ത്രിക്ക് കൈമാറി. പന്മന ആശ്രമ ആചാര്യന് സ്വാമി നിത്യസ്വരൂപാനന്ദ തീര്ഥാടന സന്ദേശം നല്കി. മുന്മന്ത്രി ഷിബു ബേബി ജോണ് ചട്ടമ്പിസ്വാമി സ്മൃതിസന്ദേശം നല്കി. കുമ്മനം രാജശേഖരന്, ചവറ ബ്ലോക്ക് പഞ്ചായത്ത് പ്രസിഡന്റ് ഷംല നൗഷാദ്, ശ്രീജിത്ത് എന്നിവര് സംസാരിച്ചു.
