ന്യൂദല്ഹി: സുപ്രധാന കരാറുകളില് ഒപ്പുവച്ച് ഭാരതവും കാനഡയും. പ്രധാനമന്ത്രി നരേന്ദ്ര മോദിയുമായി കാനഡ പ്രധാനമന്ത്രി മാര്ക്ക് കാര്ണി ദല്ഹിയില് നടത്തിയ ഉഭയകക്ഷി ചര്ച്ചകള്ക്കു പിന്നാലെയാണ് കരാറുകളില് ഒപ്പുവച്ചത്. ഉഭയകക്ഷി വ്യാപാരം 2030 ആകുമ്പോഴേക്കും 50 ബില്യണ് ഡോളറായി ഉയര്ത്താനാണ് ലക്ഷ്യമിടുന്നതെന്ന് സംയുക്ത വാര്ത്താ സമ്മേളനത്തില് പ്രധാനമന്ത്രി അറിയിച്ചു. സാമ്പത്തിക രംഗത്തെ സഹകരണം അതിന്റെ പൂര്ണ സാധ്യതകള് തേടും. ഇരുരാജ്യങ്ങളിലും നിക്ഷേപത്തിനും തൊഴിലിനും പുതിയ അവസരങ്ങള് സൃഷ്ടിക്കുന്ന നടപടികളുമായി പോകുമെന്നും പ്രധാനമന്ത്രി അറിയിച്ചു.
ആണവോര്ജത്തിന് യുറേനിയം നല്കാന് ഇരുരാജ്യങ്ങളും കരാറില് ഒപ്പുവച്ചു. 2027- 2035ല് ഭാരതത്തിനു യുറേനിയം നല്കാന് കനേഡിയന് കമ്പനി കാമെകോയുമായി 1.91 ബില്യണ് യുഎസ് ഡോളറിന്റെ കരാറിലാണ് ഒപ്പുവച്ചത്. നിര്ണായക ധാതുക്കള്, സാങ്കേതിക വിദ്യ മേഖലകളില് സഹകരണം വര്ദ്ധിപ്പിക്കാന് വിവിധ കരാറുകളിലും ഒപ്പുവച്ചിട്ടുണ്ട്.
കഴിഞ്ഞ ദശകത്തില് പ്രധാനമന്ത്രി മോദിയുടെ നേതൃത്വത്തില് ഭാരതം ലോകത്തെ ഏറ്റവും വേഗത്തില് വളരുന്ന സമ്പദ്വ്യവസ്ഥയായതായി കാര്ണി അഭിപ്രായപ്പെട്ടു. ചരിത്രത്തില് അപൂര്വമായി മാത്രമുള്ള വേഗത്തിലാണ് ഇവിടത്തെ പ്രതിശീര്ഷ വരുമാന വളര്ച്ചയെന്ന് അദ്ദേഹം പറഞ്ഞു. ചെറിയ മോഡുലാര് റിയാക്ടറുകളിലും നൂതന റിയാക്ടറുകളിലും ഇരുരാജ്യങ്ങളും ഒന്നിച്ചു പ്രവര്ത്തിക്കുമെന്ന് കാര്ണി കൂട്ടിച്ചേര്ത്തു.
