ഗുവാഹത്തി: വരുന്ന നിയമസഭാ തെരഞ്ഞെടുപ്പില് ആസാമില് ബിജെപി ഹാട്രിക് വിജയം നേടി ഭരണം തുടരുമെന്ന് ബിജെപി ദേശീയ അധ്യക്ഷന് നിതിന് നബിന്. പ്രധാനമന്ത്രി നരേന്ദ്ര മോദിയുടെ നേതൃത്വത്തില് ആസാമില് ചരിത്രപരമായ വിജയം നേടുന്നതിന് എല്ലാ പോളിങ് ബൂത്തുകളിലും 50% വോട്ടുകള് നേടണമെന്നും അദ്ദേഹം പ്രവര്ത്തകര്ക്ക് നിര്ദേശം നല്കി. ഗുവാഹത്തിയില് ബിജെപി സംഘടിപ്പിച്ച പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ദേശീയ സുരക്ഷയും വികസനവുമുള്പ്പെടെ ചൂണ്ടിക്കാട്ടി ബിജെപി വ്യക്തമായ കാഴ്ചപ്പാടോടെയാണ് പ്രവര്ത്തിക്കുന്നത്. കഴിഞ്ഞ 11 വര്ഷത്തിനിടെ പ്രധാനമന്ത്രി നരേന്ദ്ര മോദി ആസാമിലേക്ക് നടത്തിയ 38 സന്ദര്ശനങ്ങള് സംസ്ഥാനത്തിന്റെ പുരോഗതിയോടുള്ള സമര്പ്പണത്തിന്റെ തെളിവാണെന്നും അദ്ദേഹം പറഞ്ഞു. ബംഗ്ലാദേശി നുഴഞ്ഞുകയറ്റക്കാരെ പുറത്താക്കാനുള്ള ശ്രമങ്ങളെ കുറിച്ച് സംസാരിച്ച നിതിന്, ആസാമിന് അപ്പുറം ബംഗാളിലും കേരളത്തിലും ഈ പ്രചാരണം പ്രതിധ്വനിച്ചുവെന്ന് ചൂണ്ടിക്കാട്ടി.
സരാഘട്ട് യുദ്ധം ദേശീയ പാഠ്യപദ്ധതിയില് ഉള്പ്പെടുത്തുക, അഹോം ചരിത്ര ഗവേഷണ കേന്ദ്രങ്ങള് സ്ഥാപിക്കുക, ദേശീയതലത്തില് ലച്ചിത് ദിവസ് ആഘോഷിക്കുക തുടങ്ങിയ സംരംഭങ്ങളിലൂടെ അസമിന്റെ പൈതൃകം സംരക്ഷിക്കുന്നതിന് അദ്ദേഹം ഊന്നല് നല്കി. ബൂത്ത് തലത്തിലുള്ള സംഘടനാ പ്രവര്ത്തനങ്ങള് മെച്ചപ്പെടുത്താനും ബിജെപി ക്ഷേമ പദ്ധതികള് എല്ലാ വീടുകളിലും എത്തിക്കാനും അദ്ദേഹം പാര്ട്ടി പ്രവര്ത്തകരോട് അഭ്യര്ത്ഥിച്ചു.
സര്ജിക്കല് സ്ട്രൈക്കുകള്, അതിര്ത്തി പ്രദേശങ്ങളിലെ അടിസ്ഥാന സൗകര്യ വികസനം എന്നിവയുള്പ്പെടെയുള്ള ദേശീയ സുരക്ഷയില് ബിജെപി ഉറച്ച നിലപാട് സ്വീകരിച്ചു. എന്നാല് ഈ കാര്യങ്ങളില് കോണ്ഗ്രസ് മൃദുസമീപനമാണ് സ്വീകരിച്ചതെന്നും അദ്ദേഹം പറഞ്ഞു.
ഒരുകാലത്ത് കലാപം, അരക്ഷിതമായ അതിര്ത്തികള് എന്നിവയാലാണ് ആസാം തിരിച്ചറിയപ്പെട്ടിരുന്നത്. എന്നാല് ബിജെപി അധികാരത്തില് എത്തിയതോടെ ആ കാഴ്ച്ചപ്പാട് മാറി. ഇന്ന് ബിജെപിയുടെ ലക്ഷ്യം എംഎല്എമാരെയും എംപിമാരെയും തെരഞ്ഞെടുക്കുന്നതില് മാത്രം ഒതുങ്ങുന്നില്ല. പൈതൃകം സംരക്ഷിക്കുന്നതിനൊപ്പം വികസനത്തിന്റെ സ്വപ്നം സാക്ഷാത്കരിക്കുകയും പുരോഗതിയുടെ എല്ലാ മാനദണ്ഡങ്ങളിലും ആസാമിനെ കൂടുതല് മുന്നോട്ട് കൊണ്ടുപോകുകയും ചെയ്യുക എന്നതാണ് മുന്നിലുള്ള കടമ. പ്രധാനമന്ത്രി നരേന്ദ്ര മോദി തന്റെ ഹൃദയത്തില് ആസാമിന് ഒരു പ്രത്യേക സ്ഥാനം നല്കിയിട്ടുണ്ടെന്നും നിതിന് നബിന് പറഞ്ഞു.
