തിരുവനന്തപുരം: വികസിത ഭാരതം എന്ന സ്വപ്നം സാക്ഷാത്ക്കരിക്കുന്നതോടൊപ്പം വികസിത സ്പോര്ട്സും സാധ്യമാകണമെന്ന് കേരള യൂണിവേഴ്സിറ്റി വൈസ് ചാന്സലര് ഡോ. മോഹനന് കുന്നുമ്മല്. സ്പോര്ട്സ് അതോറിറ്റി ഓഫ് ഇന്ത്യയും ലക്ഷ്മിബായ് നാഷണല് കോളജ് ഓഫ് ഫിസിക്കല് എജ്യുക്കേഷനും അത്ലറ്റിക് ഫെഡറേഷന് ഓഫ് ഇന്ത്യയുമായി ചേര്ന്ന് സംഘടിപ്പിക്കുന്ന അന്താരാഷ്ട്ര കായിക സിമ്പോസിയം ഉദ്ഘാടനം ചെയ്യുകയായിരുന്നു അദ്ദേഹം
.
ലോകത്ത് ഏറ്റവും കൂടുതല് യുവജനത ഉള്ള രാജ്യമാണ് ഭാരതം. അതിനാല് കായികരംഗത്ത് ഭാരതത്തിന് മുന്നേറാനാകും. കഴിഞ്ഞ പത്ത് വര്ഷം കൊണ്ട് കായിക മേഖലയില് രാജ്യം വലിയ മുന്നേറ്റമാണ് നടത്തിയത്. സവിശേഷമായ പരിശീലനം ഇതിനാവശ്യമാണെന്നും ഇത്തരം അന്താരാഷ്ട്ര സിമ്പോസിയങ്ങള് അതിന് സഹായകമാകുമെന്നും അദ്ദേഹം പറഞ്ഞു.
ഒളിംപിക് മെഡല് നേടിയ മലയാളി കൂടിയായ ഭാരതത്തിന്റെ ഇതിഹാസ ഹോക്കി ഗോള് കീപ്പര് പി.ആര് ശ്രീജേഷ് മുഖ്യാതിതായി പങ്കെടുത്തു. എല്എന്സിപിഇ പ്രിന്സിപ്പല് ഡോ. പ്രദീപ്ദത്ത അധ്യക്ഷത വഹിച്ച ചടങ്ങില് നാഷണല് സ്പോര്ട്സ് യൂണിവേഴ്സിറ്റി വൈസ് ചാന്സലര് ഡോ. ശ്യാംസുന്ദര് രഥ്, കേരള ഒളിംപിക് അസോസിയേഷന് എക്സിക്യൂട്ടീവ് ഡയറക്ടര് എസ്.എന് രഘുചന്ദ്രന്നായര്, പിഇഎഫ്ഐ സെക്രട്ടറി ജനറല് ഡോ. പിയൂഷ് ജെയിന്, എന്എസ്എന്ഐഎസ് ഡെപ്യൂട്ടി ഡയറക്ടര് ജനറല് വിനീത് കുമാര്, ഗ്വാളിയാര് എല് എന്ഐപിഇ വൈസ് ചാന്സലര് പ്രൊഫ. കല്പ്പന ശര്മ്മ, ഇന്റര്നാഷണല് സ്ട്രെങ്ത് ആന്റ് കണ്ടീഷനിംഗ് ഇന്സ്റ്റിറ്റ്യൂട്ട് സ്ഥാപകന് പ്രൊഫ. കാര്ലോ എ.ബുസിചെല്ലി എന്നിവര് സംസാരിച്ചു.
