ന്യൂദല്ഹി: രാജ്യത്തിന്റെ സാമ്പത്തിക രംഗം ശക്തവും ഭദ്രവുമെന്നു വ്യക്തമാക്കുന്ന, മെച്ചപ്പെട്ട വളര്ച്ചയാണ് ഭാരതത്തിനെന്നു കാട്ടുന്ന കണക്കുകള് പുറത്ത്. ഈ സാമ്പത്തിക വര്ഷം മൂന്നാം പാദത്തില് (ഒക്ടോബര് മുതല് ഡിസംബര് വരെ) രാജ്യത്തിന്റെ സാമ്പത്തിക വളര്ച്ച (ജിഡിപി) 7.8 ശതമാനമെന്നാണു പുതിയ കണക്ക്. കഴിഞ്ഞ സാമ്പത്തിക വര്ഷം ഇതേ സമയം ഇത് 7.4 ശതമാനമായിരുന്നു.
ഈ സാമ്പത്തിക വര്ഷം ജിഡിപി 7.6 ശതമാനം വളരുമെന്നാണു വിലയിരുത്തല്. വളര്ച്ച 7.4 ശതമാനമായിരിക്കുമെന്നാണ് ജനുവരിയില് കണക്കാക്കിയിരുന്നത്.
2011-12 അടിസ്ഥാനമാക്കിയാണ് ജിഡിപി കണക്കാക്കിയിരുന്നത്. ഇത്തവണ മുതല് 2022-23 അടിസ്ഥാനമാക്കി പുതിയ രീതിയിലാണ് ജിഡിപി കണക്കാക്കുന്നത്. ഇതനുസരിച്ചുള്ള പുതിയ കണക്കുകള് സ്റ്റാറ്റിസ്റ്റിക്കല് മന്ത്രാലയം പുറത്തുവിട്ടു.
2025-26 ജൂലൈ മുതല് സപ്തംബര് വരെ സമ്പദ് വ്യവസ്ഥ 8.4 ശതമാനമാണ് വളര്ന്നത്. പഴയ കണക്കു പ്രകാരം ഇത് 8.2 ശതമാനമായിരുന്നു. ആദ്യ പാദത്തില് 7.8 ശതമാനം വളര്ച്ച നേടിയെന്നായിരുന്നു കണക്ക്. പുതിയ കണക്കു പ്രകാരം അന്നത്തെ വളര്ച്ച 6.7 ശതമാനമാണ്. ഉത്പാദന മേഖലയിലെ കുതിപ്പാണ് മൂന്നു സാമ്പത്തിക വര്ഷവും വളര്ച്ചയുടെ അടിത്തറയായത്. കഴിഞ്ഞ രണ്ടു സാമ്പത്തിക വര്ഷവും ഉത്പാദന മേഖല ഇരട്ടയക്ക വളര്ച്ച നേടി. സേവന, വാണിജ്യ, ഗതാഗത, ഹോട്ടല് മേഖലകള് 10.1 ശതമാനം വളര്ച്ച കൈവരിച്ചു. ഉപഭോഗത്തില് 7 ശതമാനം വളര്ച്ചയുണ്ടായി.
322.58 ലക്ഷം കോടി ഈ സാമ്പത്തിക വര്ഷം ജിഡിപി 322.58 ലക്ഷം കോടി രൂപയായിരിക്കും. സിമന്റ് ഉത്പാദനം 11.2 ശതമാനമായി. നിര്മാണ മേഖലയിലെ വളര്ച്ചയാണ് ഇതു കാണിക്കുന്നത്.
