വ്യഭിചാരം,നടിയുമായി വഴിവിട്ട ബന്ധം, വിശ്വാസ വഞ്ചന; നടൻ വിജയിയുടെ ഭാര്യ സം​ഗീത വിവാഹമോചന ഹർജി ഫയൽ ചെയ്തു!

ടിവികെ അധ്യക്ഷനും നടനുമായ വിജയിയുടെ ഭാര്യ സംഗീത സ്വർ​ണലിം​ഗം വിവാഹമോചനം ആവശ്യപ്പെട്ട് കോടതിയിൽ. ചെങ്കൽപെട്ട് കുടുംബ കോടതിയിലാണ് ഹർജി ഫയൽ ചെയ്തത്. വിജയ്‌യോട് ഹാജരാകാൻ കോടതി നിർദേശം നൽകിയിട്ടുണ്ട്. ഏപ്രിൽ 20നാണ് ഹാജരാകേണ്ടത്. നടനുമായുള്ള ദാമ്പത്യ ജീവിതം 25 വർഷം പിന്നിടുമ്പോഴാണ് സം​ഗീതയുടെ നിർണായകമായ തീരുമാനം.1954ലെ സ്പെഷ്യൽ മാരേജ് ആക്റ്റിലെ വ്യവസ്ഥകൾ പ്രകാരമാണ് സംഗീത ഹർജി നൽകിയിരിക്കുന്നത്.

വ്യഭിചാരം, ക്രൂരത തുടങ്ങിയ കാരണങ്ങൾ ചൂണ്ടിക്കാട്ടി വിവാഹമോചനം തേടാനാകുന്ന വകുപ്പുകൾ പ്രകാരമാണ് നടപടി. ഹർജിയിൽ 2021 മുതൽ വിജയ് ഒരു നടിയുമായി വിവാഹേതര ബന്ധത്തിൽ ഏർപ്പെട്ടിരുന്നുവെന്നാണ് സംഗീത ആരോപിക്കുന്നത്.

നടിയുമായി വിജയിക്ക് വഴിവിട്ട ബന്ധമുള്ളതായി സം​ഗീത 2021ൽ കണ്ടെത്തിയതായി ഹർജിയിൽ പറയുന്നു. ഈ കണ്ടെത്തലാണ് നിയമപരമായ വേർപിരിയലിലേക്ക് നീങ്ങാനുള്ള പ്രധാന കാരണം എന്നും ഹർജിയിൽ പറയുന്നു. നടിയുമായുള്ള ബന്ധം അവസാനിപ്പിക്കാമെന്ന ഉറപ്പ് വിജയ് നൽകിയിരുന്നുവെങ്കിലും പിന്നീട് വാക്ക് തെറ്റിച്ച് ആ ബന്ധം തുടരുകയായിരുന്നുവെന്നും യാതൊരു ഖേദവും പ്രകടിപ്പിച്ചില്ലെന്നും ഹർജിയിൽ ആരോപിക്കുന്നു. സ്പെഷ്യൽ മാരേജ് ആക്റ്റ് സെക്ഷൻ 27(1)(a), 27(1)(d) പ്രകാരമുള്ള വ്യഭിചാരവും ക്രൂരതയും അടിസ്ഥാനമാക്കിയാണ് സംഗീത വിവാഹമോചനം ആവശ്യപ്പെട്ടിരിക്കുന്നത്. വിഷയം നിലവിൽ ജില്ലാ കോടതിയുടെ പരിഗണനയിലാണ്.

1999 ഓഗസ്റ്റിലാണ് ഇരുവരും വിവാഹിതരായത്. ജെയ്സൺ സഞ്ജയ്, ദിവ്യ സാഷ എന്നീ രണ്ട് മക്കളാണ് ഇവർക്കുള്ളത്. കഴിഞ്ഞ കുറച്ച് അധികം നാളുകളായി വിജയിയും സം​ഗീതയും വേർപിരിയാൻ ഒരുങ്ങുന്നുവെന്ന തരത്തിൽ റിപ്പോർട്ടുകൾ പ്രചരിക്കുന്നുണ്ട്. മാത്രമല്ല നടി തൃഷയുമായി വിജയിക്ക് സൗഹൃദത്തിന് അപ്പുറമൊരു ബന്ധമുള്ളതായുള്ള കഥകളും സിനിമാ മേഖലയിൽ പ്രചരിച്ചിരുന്നു. അവസാനമായി വിജയിക്കൊപ്പം സം​ഗീത പൊതുവേദിയിൽ പ്രത്യക്ഷപ്പെട്ടത് 2021ൽ മാസ്റ്റർ സിനിമയുടെ ഓഡിയോ ലോഞ്ച് സമയത്തായിരുന്നു. പിന്നീട് ആയിരിക്കണം ഇരുവർക്കും ഇടയിൽ പ്രശ്നങ്ങൾ ആരംഭിച്ചത്. മാസ്റ്ററിനുശേഷം ബീസ്റ്റ്, വാരിസ്, ലിയോ, ദി ​ഗോട്ട് തുടങ്ങിയ സിനിമകൾ നടന്റേതായി റിലീസ് ചെയ്തിരുന്നു. പക്ഷെ ഈ സിനിമയുടെ എല്ലാം ഓഡിയോ ലോഞ്ചിന് നടൻ ഒറ്റയ്‌ക്കാണ് വന്നത്.

അടുത്തിടെ ജനനായകൻ സിനിമയുടെ ഓഡിയോ ലോഞ്ച് നടന്നപ്പോഴും രാഷ്‌ട്രീയപ്രവേശനം നടന്നപ്പോഴുമെല്ലാം മാതാപിതാക്കൾ മാത്രമാണ് വിജയിക്കൊപ്പം ഉണ്ടായിരുന്നത്. സം​ഗീതയും മക്കളും പങ്കെടുത്തിരുന്നില്ല. അപ്പോൾ മുതൽ ദമ്പതികൾക്കിടയിൽ അസ്വാരസ്യങ്ങൾ ഉണ്ടോയെന്ന സംശയം പ്രേക്ഷകർക്ക് ഇടയിൽ ഉടലെടുത്തിരുന്നു. അപ്പോഴെല്ലാം സം​ഗീത മക്കളുടെ പഠനാവശ്യത്തിനായി വിദേശത്താണ് താമസമെന്നാണ് വിജയിയോട് അടുത്ത വൃത്തങ്ങൾ അറിയിച്ചത്. എന്നാൽ തമിഴ് സിനിമാ മേഖലയിലെ പ്രമുഖരായ ചിലരുമായി ബന്ധപ്പെട്ട ഫങ്ഷനുകളിൽ മകനൊപ്പം സം​ഗീത പ്രത്യക്ഷപ്പെടുകയും ചെയ്തിരുന്നു. നിലവിൽ വിജയിക്ക് ഏറ്റവും അടുപ്പമുള്ള നായിക തൃഷയാണ്. 2021 മുതൽ എല്ലാ പിറന്നാളിനും മുടങ്ങാതെ തൃഷയുടെ പിറന്നാൾ ആശംസ വിജയിയെ തേടി എത്താറുണ്ട്.

അതിനാലാണ് ഇവരുടെ സൗഹൃദം സോഷ്യൽമീഡിയയിലും തെന്നിന്ത്യൻ സിനിമയിലും ചർച്ച വിഷയമായി മാറിയത്. പതിനഞ്ചോളം വർഷത്തെ ഇടവേളയ്‌ക്കുശേഷം വിജയിയും തൃഷയും ഒരുമിച്ച സിനിമയായിരുന്നു ലിയോ. സിനിമയിലെ ലിപ് ലോക്ക് സീൻ അടക്കം ഏറെ ചർച്ചാ വിഷയമായി മാറിയിരുന്നു. ജനനായകനാണ് വിജയിയുടെ റിലീസിന് ഒരുങ്ങുന്ന ഏറ്റവും പുതിയ സിനിമ. വിജയ്‌യുടെ അവസാന ചിത്രത്തിന്റെ റിലീസ് അപ്രതീക്ഷിതമായി വൈകിയത് സിനിമാപ്രേമികളെയും നടന്റെ ആരാധകരെയും സങ്കടത്തിലാക്കിയിരുന്നു. സിബിഎഫ്‌സി ചിത്രത്തിന് സെൻസർ സർട്ടിഫിക്കറ്റ് നൽകാൻ വിസമ്മതിച്ചതിനെ തുടർന്നാണ് റിലീസ് അനിശ്ചിതമായി വൈകിയത്. പുതിയ റിപ്പോർട്ടുകൾ അനുസരിച്ച് ജനനായകൻ ഉടൻ റിലീസ് ചെയ്യാൻ സാധ്യതയില്ല.