കൊല്ക്കത്ത: ബംഗാള് നിയമസഭാ തെരഞ്ഞെടുപ്പിന് മുന്നോടിയായി സംസ്ഥാന വ്യാപകമായി പരിവര്ത്തന് പ്രചാരണ യാത്രക്കൊരുങ്ങി ബിജെപി.തുടര്ച്ചയായുള്ള മമത സര്ക്കാരിന്റെയും തൃണമൂല് കോണ്ഗ്രസിന്റെയും ദുര്ഭരണം ജനങ്ങളെ ബോധ്യപ്പെടുത്തുന്നതിനും, ബിജെപിയുടെ വികസന അജണ്ടയെ കുറിച്ച് അവബോധം ഉണ്ടാക്കി എടുക്കുന്നതിനുമാണ് പരിവര്ത്തന് യാത്രയിലൂടെ ലക്ഷ്യമിടുന്നത്. മാര്ച്ച് ഒന്നിന് ബംഗാളിലെ ഒമ്പത് വ്യത്യസ്ത കേന്ദ്രങ്ങളില് നിന്ന് ഒരേസമയം പരിവര്ത്തന് യാത്രകള്ക്ക് തുടക്കമിടും.
സംസ്ഥാനത്തെ വിവിധ ജില്ലകളിലൂടെയും നിയമസഭാ മണ്ഡലങ്ങളിലൂടെയും കടന്നുപോകുന്ന ഈ യാത്ര താഴെത്തട്ടിലുള്ള പാര്ട്ടി സാന്നിധ്യം ശക്തിപ്പെടുത്തുന്നതിനും വോട്ടര്മാരുമായി നേരിട്ട് സംവദിക്കാനുമാണ് ലക്ഷ്യമിടുന്നത്. യാത്രകളുടെ സമാപനത്തോടനുബന്ധിച്ച് ബംഗാളില് സംഘടിപ്പിക്കുന്ന വമ്പിച്ച പൊതുറാലിയില് പ്രധാനമന്ത്രി നരേന്ദ്ര മോദി പ്രസംഗിക്കും.
നിയമസഭാ തെരഞ്ഞെടുപ്പിന് മുന്നോടിയായുള്ള ഈ റാലിയിലൂടെ സംസ്ഥാനത്തെ ബിജെപിയുടെ കരുത്ത് വര്ധിപ്പിക്കുകയും പ്രവര്ത്തകരില് ആവേശവും ഊര്ജവും നിറയ്ക്കും. കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിങ്, ആരോഗ്യ കുടുംബക്ഷേമ മന്ത്രി ജെ.പി. നഡ്ഡ, മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് തുടങ്ങി നിരവധി നേതാക്കള് പരിവര്ത്തന യാത്രയുടെ ഭാഗമാകും. 2021-ലെ നിയമസഭാ തെരഞ്ഞെടുപ്പില് 77 സീറ്റുകള് നേടിയ ബിജെപി ഇത്തവണ ഭരണം പിടിക്കുമെന്ന് ഉറപ്പിച്ചാണ് കളത്തിലിറങ്ങുന്നത്. കൂടുതല് സംഘടിതവും ശക്തവുമായ തന്ത്രങ്ങളുമായാണ് കളം നിറയുന്നത്.
ഓരോ മണ്ഡലങ്ങള്തോറും മൈക്രോ മാനേജ്മെന്റ്, ബൂത്ത് തലത്തിലുള്ള ശക്തിപ്പെടുത്തല് എന്നിവയ്ക്ക് തുടക്കമിട്ട് കഴിഞ്ഞു. ക്രമസമാധാനം, സ്ത്രീസുരക്ഷ, അഴിമതി, തൊഴിലില്ലായ്മ, വ്യാവസായിക വികസനം തുടങ്ങിയവയാണ് ബിജെപിയുടെ മുഖ്യ പ്രചാരണ വിഷയങ്ങള്. ഈ യാത്രകള് വെറുമൊരു രാഷ്ട്രീയ പരിപാടിയല്ലെന്നും, മറിച്ച് ജനങ്ങളുടെ ആശങ്കകള് മനസിലാക്കാനും ബദല് ഭരണ കാഴ്ചപ്പാട് അവതരിപ്പിക്കാനുമുള്ള വിപുലമായ ജനസമ്പര്ക്ക പരിപാടിയാണെന്നും ബിജെപി വൃത്തങ്ങള് അറിയിച്ചു.
പരിവര്ത്തന് യാത്രകള് സംസ്ഥാനത്തെ തെരഞ്ഞെടുപ്പ് പ്രചാരണത്തെ ചൂട് പിടിപ്പിക്കും. ഇത്തവണ മത്സരം കൂടുതല് കടുക്കുമെന്നും സംസ്ഥാന ബിജെപി നേതാക്കള് ആവര്ത്തിച്ചു. നിയമസഭാ തെരഞ്ഞെടുപ്പിന് മുന്നോടിയായുള്ള നിര്ണായക നീക്കമായി ഈ പ്രചാരണത്തെ കാണുന്ന പാര്ട്ടി പ്രവര്ത്തകര് സംസ്ഥാനത്തുടനീളം ഇതിനായുള്ള ഒരുക്കങ്ങളും ആരംഭിച്ചു കഴിഞ്ഞു.
