ചൊവ്വാഗ്രഹം എന്തിനാണ് ഹിന്ദു സ്ത്രീകളെ ദ്രോഹിക്കുന്നത്? എന്താണ് ചൊവ്വാദോഷം?

140 കോടി ജനങ്ങളുള്ള ഇന്ത്യാരാജ്യത്ത് വിവാഹപ്രായമെത്തി നില്‍ക്കുന്ന ചെറിയൊരു വിഭാഗം ഹിന്ദു പെണ്‍കുട്ടികളെ മാത്രം ചൊവ്വാഗ്രഹം ദ്രോഹിക്കുന്നത്? ചോദ്യം സ്വാമി ചിദാനന്ദപുരിയോടാണ്. സ്വാമി പറയുന്നത് ഒരു ചൊവ്വയും ആരെയും ദ്രോഹിക്കില്ലെന്നാണ്. നല്ല ജ്യോതിഷിയുടെ അടുത്ത് പോയാല്‍ ഈ ചൊവ്വാദോഷത്തിന് പരിഹാരമുണ്ടാകുമെന്നും സ്വാമി പറയുന്നു.

ഇനി ചൊവ്വാദോഷം എന്താണെന്ന് നോക്കാം. ജാതകത്തിലെ പ്രധാന ദോഷങ്ങളിൽ ഒന്നാണ് ചൊവ്വാ ദോഷം. വിവാഹകാര്യങ്ങൾക്ക് ഏറെ തടസ്സവും ബുദ്ധിമുട്ടുകളും ഉണ്ടാകുന്നതിന് പ്രധാന കാരണങ്ങളിൽ ഒന്നാണിത്.

“ആ പെൺകുട്ടിക്ക് ചൊവ്വാദോഷമുള്ളതുകൊണ്ടാണ് വിവാഹം നടക്കാത്തത്” ; “ചൊവ്വാദോഷം ഉള്ളതുകൊണ്ടാണ് ആ കുട്ടിയുടെ ഭർത്താവ് മരിച്ചത്” , സർവ്വ സാധാരണമായി കേൾക്കുന്ന ചില പ്രസ്താവനകളാണിത്. ഇത്രക്ക് ഉപദ്രവകാരിയാണ് ചൊവ്വ ഗ്രഹമെന്ന് തോന്നിയിട്ടുണ്ടോ? ആൺകുട്ടിയായാലും പെൺകുട്ടിയായാലും വിവാഹക്കാര്യത്തിൽ ഉറക്കം കെടുത്തുന്നതാണ് ചൊവ്വാദോഷമെന്ന് പറയേണ്ടതില്ല. എന്നാൽ എന്താണ് ചൊവ്വാദോഷമെന്ന് അറിയാമോ? എതുകൊണ്ടാണ് ചൊവ്വാ ദോഷത്തിന് ഇത്രയധികം പഴികേൾക്കേണ്ടി വരുന്നതെന്ന് ചിന്തിച്ചിട്ടുണ്ടോ?

ജ്യോതിഷത്തിൽ ഇന്ന് ഏറ്റവും കൂടുതൽ ചർച്ച ചെയ്യപ്പെടുന്ന വിഷയമാണ് ചൊവ്വാദോഷം. വിവാഹത്തിന് ജാതക പൊരുത്തം നോക്കുമ്പോൾ മാത്രമേ ചൊവ്വാ ദോഷത്തിന് പ്രസക്തിയുള്ളു. ജ്യോതിഷ പ്രകാരം ഏറ്റവും കൂടുതൽ പാപമുള്ള ഗ്രഹമാണ് ചൊവ്വ.  ഗ്രഹനിലയിൽ ലഗ്നാലോ, ചന്ദ്രാലോ, ശുക്രാലോ 2,12,4, 7,8 എന്നീ ഭാവങ്ങളിൽ ചൊവ്വ നിന്നാലാണ് ചൊവ്വാദോഷമുള്ളതായി കണക്കാക്കുന്നത്. രണ്ടിനു മുകളിലുള്ള ഭാവങ്ങളിൽ ഏറെ ദോഷമായി കണക്കാക്കുന്നു.ഹൈന്ദവ വിശ്വസ പ്രകാരം വിവാഹ പൊരുത്തത്തില്‍ പാപ സാമ്യത്തിന് പ്രാധാന്യമുണ്ട്. സ്ത്രീയുടേയും പുരുഷൻ്റേയും ഗ്രഹനിലകളെ അടിസ്ഥാനമാക്കിയാണ് ഇത് നിശ്ചയിക്കുന്നത്. അതുകൊണ്ട് വിവാഹത്തിന് പൊരുത്തം നോക്കുമ്പോൾ ചൊവ്വാദോഷമുള്ള ജാതകത്തിന് ചൊവ്വാ ദോഷമുള്ള ജാതകം തന്നെ ചേരണം.

സ്ത്രീ ജാതകത്തിൽ ചൊവ്വാദോഷം വന്നാൽ ഭർത്താവിനും പുരുഷ ജാതകത്തിൽ ചൊവ്വാ ദോഷമുണ്ടെങ്കിൽ ഭാര്യയ്‌ക്കും നന്നല്ല എന്നാണ് പൊതുവേയുള്ള അഭിപ്രായം. എന്നാൽ എല്ലാ ജാതകങ്ങളിലും ചൊവ്വ അത്രത്തോളം ദോഷകാരിയല്ല എന്ന് പ്രത്യേകം അറിഞ്ഞിരിക്കണം. ചൊവ്വാ ദോഷം കൊണ്ടു മാത്രം വൈധവ്യമോ വേർപാടോ ഉണ്ടാകണമെന്നില്ല. ആയുസ്സ്, ഏഴാംഭാവത്തിൻ്റേയും ഭാവാധിപൻ്റേയും ബലം, വിവാഹകാരകനായ ശുക്രന്റെ ബലം ഇവ കൂടി കണക്കിലെടുക്കേണ്ടതാണ്.

സ്ത്രീജാതകത്തിൽ ലഗ്നത്തിൽ നിന്ന്‌ 7, 8 ഭാവങ്ങളിൽ നിൽക്കുന്ന ചൊവ്വയെ ആണു വലിയ ദോഷമായി കണക്കാക്കുന്നത്. അതിനു ജ്യോതിഷത്തിൽ പറയുന്ന പരിഹാരം ഏഴാം ഭാവത്തിൽ ചൊവ്വയോ ഒന്നിലധികം പാപഗ്രഹങ്ങളോ നിൽക്കുന്ന പുരുഷജാതകം ഒന്നിപ്പിക്കാം എന്നു മാത്രമാണ്

ചൊവ്വാ ദോഷമുണ്ടെങ്കിലും അതിന് ശുഭഗ്രഹ ബന്ധമുണ്ടെങ്കിൽ ചൊവ്വ ശുഭനായി തീരും. ആ ചൊവ്വ ഭര്‍ത്താവിന് ഐശ്വര്യവും സമ്പത്തും ഉണ്ടാക്കിക്കൊടുക്കുകയും ചെയ്യും.