പത്തനംതിട്ട: ശബരിമലയില് യുവതികളെ പ്രവേശിപ്പിക്കാന് സംസ്ഥാന സര്ക്കാര് തീരുമാനമെടുത്തപ്പോള് യുവതികള് എത്തുമെന്ന ഘട്ടത്തില് നട അടയ്ക്കാന് തന്ത്രി കണ്ഠര് രാജീവര്ക്ക് നിയമോപദേശം നല്കിയെന്ന് ഗോവ മുന് ഗവര്ണര് പി എസ് ശ്രീധരന് പിള്ള. പുതുതായി ഇറങ്ങുന്ന ‘ശബരിമല സമരവും സുവര്ണ അവസരവിധിയും’ എന്ന പുസ്തകത്തിലാണ് അദ്ദേഹം ഇക്കാര്യം പറയുന്നത്.
പ്രകാശനത്തിന് മുമ്പ് പുസ്തകങ്ങള് തന്ത്രിക്ക് നല്കാന് പി എസ് ശ്രീധരന് പിള്ള താഴമണ് മഠത്തിലെത്തി. യുവതികള് എത്തിയാല് നട അടയ്ക്കുന്നതില് നിയമപ്രശ്നം ഇല്ലെന്ന് നേരിട്ട് ഉപദേശം നല്കിയെന്ന് അദ്ദേഹം പിന്നീട് മാധ്യമങ്ങളോട് പറഞ്ഞു.
തന്ത്രിക്കെതിരെ നിയമനടപടി പൊലീസ് സ്വീകരിച്ചാല് അതിന് മുമ്പ് തന്നെ അറസ്റ്റ് ചെയ്യേണ്ടി വരുമെന്ന് അദ്ദേഹത്തോട് പറഞ്ഞെന്ന് ശ്രീധരന് പിളള പറഞ്ഞു.തന്റെ ഒപ്പം നൂറുകണക്കിന് പേരുണ്ടാകുമെന്നും ഉറപ്പ് നല്കി.
അന്ന് ശ്രീധരന് പിള്ള ബിജെപി സംസ്ഥാന അധ്യക്ഷന് ആയിരുന്നു .അതിനിടെ തന്ത്രിക്കെതിരെ ചുമത്തിയ കുറ്റങ്ങള് തെളിയിക്കാന് ഒരു തെളിവും ഹാജരാക്കാന് പ്രോസിക്യൂഷന് കഴിഞ്ഞില്ലെന്ന് ജാമ്യം അനുദവിച്ച് കൊണ്ടുളള കോടതി ഉത്തരവില് പറയുന്നു.ശബരിമല യുവതീ പ്രവേശനത്തെ എതിര്ത്തതാണ് തന്നെ ഇപ്പോള് അറസ്റ്റ് ചെയ്യാന് കാരണമെന്ന് തന്ത്രി കോടതിയില് വാദിച്ചു. യുവതികള് എത്തിയാല് നട അടയ്ക്കുമെന്ന നിലപാടില് ഇടത് സര്ക്കാരിനും സി പി എമ്മിനും വിരോധമുണ്ടായിരുന്നുവെന്നും തന്ത്രി ചൂണ്ടിക്കാട്ടി.
ജന്മഭൂമി ഓണ്ലൈന്