കരുത്ത് തെളിയിച്ച് മഹാദേവന്റെ വജ്രായുധം ; പിനാക വാങ്ങാൻ തയ്യാറായി ഫ്രാൻസ് ; ഇന്ത്യയിൽനിന്ന് ആയുധം വാങ്ങാനൊരുങ്ങുന്നത് ആദ്യം

ന്യൂഡൽഹി : ഇന്ത്യയും, ഫ്രാൻസും തമ്മിലുള്ള പ്രതിരോധബന്ധത്തിൽ സുപ്രധാന വഴിത്തിരിവ് . ഇന്ത്യയുടെ പിനാക റോക്കറ്റ് സംവിധാനം വാങ്ങാനുള്ള താല്പര്യം അറിയിച്ചിരിക്കുകയാണ് ഫ്രാൻസ് . ഇന്ത്യ തദ്ദേശീയമായി വികസിപ്പിച്ചെടുത്ത പിനാക അതിന്റെ കൃത്യത, അതിവേഗത്തിലുള്ള ഫയറിംഗ് കഴിവ് എന്നിവ കൊണ്ട് ശ്രദ്ധയാകർഷിച്ച ആയുധമാണ്. ഇന്ത്യയുടെ ഏറ്റവും വലിയ ആയുധവിതരണക്കാരായ ഫ്രാൻസ് ഇതാദ്യമായാണ് ഇന്ത്യയിൽ നിന്ന് ആയുധം വാങ്ങാൻ ഒരുങ്ങുന്നത്.

തുടർച്ചയായ പരീക്ഷണങ്ങളിലൂടെ പിനാകയുടെ കരുത്ത് വർധിപ്പിക്കുകയാണ് ഇന്ത്യ . മൂന്ന് മാസം മുൻപ് ഫ്രാൻസിൽ നിന്നുള്ള പ്രതിനിധി സംഘത്തിന്റെ മുന്നിൽ പിനാകയുടെ ശക്തിപ്രകടം നടന്നിരുന്നുവെന്നും , അതിൽ തൃപ്തരായാണ് സംഘം മടങ്ങിയതെന്നും റിപ്പോർട്ടുകളുണ്ട്.

മൂന്നു മാസം മുൻപ് ഫ്രാൻസിൽ നിന്നുള്ള പ്രതിനിധി സംഘത്തിന്റെ മുൻപിൽ പിനാകയുടെ ശേഷി വെളിവാക്കുന്ന പ്രകടനം നടന്നിരുന്നെന്നും ഇതിൽ തൃപ്തരായാണ് സംഘം മടങ്ങിയതെന്നുമുള്ള വാർത്തകളും പുറത്തുവരുന്നുണ്ട് . ഇന്ത്യ അടുത്തിടെയും ഗൈഡഡ് പിനാക റോക്കറ്റുകൾ വിജയകരമായി പരീക്ഷിച്ചിരുന്നു. ശത്രുലക്ഷ്യങ്ങളെ കൃത്യമായി തകർക്കാൻ കഴിയുന്ന ഗൈഡഡ് മ്യൂണിഷനുകൾ ഉപയോഗിക്കാനും പിനാകയ്‌ക്ക് കഴിയും . ഇതിലൂടെ ലക്ഷ്യസ്ഥാനങ്ങളിൽ വൻതോതിൽ പ്രഹരമേൽപ്പിക്കാൻ സാധിക്കും.

പിനാക ലോകത്തിലെ ഏതൊരു റോക്കറ്റ് സിസ്റ്റത്തിനും കടുത്ത വെല്ലുവിളി ഉയർത്തുന്ന ആയുധമാണ് . അമേരിക്കൻ റോക്കറ്റ് സിസ്റ്റമായ HIMARS, റഷ്യൻ ടൊർണാഡോ-എസ് എന്നിവയുമായി ഏറ്റുമുട്ടാൻ പോലും പിനാകയ്‌ക്ക് കഴിയും. കാർഗിൽ, ഓപ്പറേഷൻ സിന്ദൂർ എന്നിവയ്‌ക്കിടെ പാകിസ്ഥാൻ മിസൈൽ ലോഞ്ചറുകൾ, പീരങ്കികൾ, വിതരണ ലൈനുകൾ എന്നിവ ലക്ഷ്യമാക്കി പിനാക്ക പ്രയോഗിച്ചിരുന്നു. കഴിഞ്ഞ മൂന്ന് പതിറ്റാണ്ടുകളായി പിനാക്ക ഇന്ത്യൻ സൈന്യത്തിലുണ്ട്. അർമേനിയ ഇതിനകം തന്നെ ഇന്ത്യയിൽ നിന്ന് ഈ സംവിധാനം വാങ്ങിയിട്ടുണ്ട്.

നിലവിൽ പിനാക്കയുടെ പ്രഹരശേഷി 75 മുതൽ 90 കിലോമീറ്റർ വരെയാണ്. 120 മുതൽ 130 കിലോമീറ്റർ വരെ ദൂരപരിധിയുള്ള പിനാക്ക എംകെ3 ഇന്ത്യ വികസിപ്പിച്ചെടുത്തിട്ടുണ്ട്. ഇതിനുപുറമെ, പിനാക്ക എംകെ4 ന്റെ പ്രവർത്തനങ്ങളും നടക്കുന്നുണ്ട്, അതിന്റെ പരിധി 300 കിലോമീറ്റർ വരെയാകുമെന്ന് പ്രതീക്ഷിക്കുന്നു. മൾട്ടി-ബാരൽ റോക്കറ്റ് സിസ്റ്റങ്ങളുടെ ആഗോള റാങ്കിംഗിൽ പിനാക്ക എപ്പോഴും ടോപ്-5 ൽ ഉണ്ടായിരുന്നു. അമേരിക്കൻ സംവിധാനത്തിന്റെ പരിധി 300 മുതൽ 499 കിലോമീറ്റർ വരെയാണ്, റഷ്യയുടേത് 120-200 കിലോമീറ്റർ ആണ്. പിനാകയ്‌ക്ക് പരിധി കുറവാണെങ്കിലും, അതിന്റെ ദ്രുത വെടിവയ്‌പ്പ് ശേഷി മറ്റുള്ളവയേക്കാൾ കൂടുതലാണ്. ഇത് 44 സെക്കൻഡിനുള്ളിൽ 12 റോക്കറ്റുകൾ വിക്ഷേപിക്കുമ്പോൾ, അമേരിക്കൻ ഹമ്മേഴ്‌സ് 45 സെക്കൻഡിനുള്ളിൽ ആറ് റോക്കറ്റുകൾ വിക്ഷേപിക്കുന്നു.

അമേരിക്കൻ റോക്കറ്റ് ലോഞ്ചറുകളേക്കാൾ വളരെ വിലകുറഞ്ഞതാണ് പിനാക. അമേരിക്കൻ റോക്കറ്റ് സിസ്റ്റത്തിന് ഏകദേശം 19.5 കോടി രൂപ ചിലവാകുമ്പോൾ ഇന്ത്യയുടെ പിനാകയ്‌ക്ക് 2.3 കോടി രൂപ മാത്രമേ ചിലവ് വരൂ . ഡിആർഡിഒ ഇത് പൂർണ്ണമായും തദ്ദേശീയ ശൈലിയിലാണ് നിർമ്മിച്ചിരിക്കുന്നത്. എല്ലാ സ്പെയർ പാർട്‌സുകളും രാജ്യത്ത് തന്നെ നിർമ്മിക്കുന്നതാണ്.

ഫ്രാൻസിനെപ്പോലെ ആധുനികമായ ഒരു സൈന്യമുള്ള രാജ്യം ഇന്ത്യൻ നിർമ്മിത ഹാർഡ്‌വെയറുകൾക്കായി വാതിൽ തുറക്കുന്നത് ആഗോള വിപണിയിൽ ഇന്ത്യയുടെ വിശ്വാസ്യത വർദ്ധിപ്പിക്കും. വരും കാലങ്ങളിൽ കൂടുതൽ ഇന്ത്യൻ നിർമ്മിത ആയുധങ്ങൾ യൂറോപ്യൻ വിപണിയിലേക്ക് എത്തുന്നതിന് വഴിയൊരുക്കും. പ്രതിരോധ സാമഗ്രികൾ ഇറക്കുമതി ചെയ്യുന്ന രാജ്യം എന്ന നിലയിൽനിന്ന് ആഗോളതലത്തിൽ ആയുധങ്ങൾ കയറ്റുമതി ചെയ്യുന്ന ഒരു പ്രമുഖ ശക്തിയായി മാറാനുള്ള ഇന്ത്യയുടെ ശ്രമങ്ങൾക്ക് ഈ ഇടപാട് വലിയ കരുത്ത് പകരുകയും ചെയ്യും.