ന്യൂദൽഹി: തനിക്കെതിരെ എഫ്ഐആർ, കേസ്, അവകാശലംഘന പ്രമേയം എന്നിവ ഫയൽ ചെയ്താലും കർഷകർക്കുവേണ്ടി പോരാടുമെന്നും അതിൽ നിന്ന് പിന്നോട്ട് പോകില്ലെന്നും കോൺഗ്രസ് എംപിയും ലോക്സഭയിലെ പ്രതിപക്ഷ നേതാവുമായ രാഹുൽ ഗാന്ധി. അടിസ്ഥാനരഹിതമായ ഗുരുതരമായ ആരോപണങ്ങൾ ഉന്നയിച്ചതിനും സഭയെ തെറ്റിദ്ധരിപ്പിച്ചതിനും രാഹുൽ ഗാന്ധിക്കെതിരെ സർക്കാർ അവകാശലംഘന നോട്ടീസ് കൊണ്ടുവരുമെന്ന് കേന്ദ്ര പാർലമെന്ററി കാര്യ മന്ത്രി കിരൺ റിജിജു പറഞ്ഞതിന് പിന്നാലെയാണ് പ്രതിപക്ഷ നേതാവിന്റെ പ്രസ്താവന.
വ്യാഴാഴ്ച വൈകുന്നേരം എക്സിൽ ഒരു വീഡിയോ പോസ്റ്റ് ചെയ്തുകൊണ്ട് രാഹുൽ ഗാന്ധി ഇക്കാര്യം പറഞ്ഞത്. “അത് എഫ്ഐആറായാലും, ഒരു കേസായാലും, അല്ലെങ്കിൽ ഒരു പ്രിവിലേജ് നടപടിയായാലും ഞാൻ കർഷകർക്കുവേണ്ടി പോരാടും. കർഷകരുടെ ഉപജീവനമാർഗ്ഗം ഇല്ലാതാക്കുന്നതോ, രാജ്യത്തിന്റെ ഭക്ഷ്യസുരക്ഷയെ തകർക്കുന്നതോ ആയ ഏതൊരു വ്യാപാര കരാറും കർഷക വിരുദ്ധമാണ്. കർഷക വിരുദ്ധ മോദി സർക്കാരിനെ നമ്മുടെ ഭക്ഷ്യ ദാതാക്കളുടെ താൽപ്പര്യങ്ങളിൽ വിട്ടുവീഴ്ച ചെയ്യാൻ ഞങ്ങൾ അനുവദിക്കില്ല.” – രാഹുൽ പറഞ്ഞു.
അതേസമയം കോൺഗ്രസ് നേതാവ് രാഹുൽ ഗാന്ധിക്കെതിരെ ഒരു പ്രത്യേക പ്രമേയം കൊണ്ടുവരാൻ നോട്ടീസ് നൽകിയതായി ബിജെപി എംപി നിഷികാന്ത് ദുബെ വ്യാഴാഴ്ച പറഞ്ഞു. ലോക്സഭയിലെ പ്രതിപക്ഷ നേതാവിന്റെ അംഗത്വം റദ്ദാക്കണമെന്നും ആജീവനാന്ത തിരഞ്ഞെടുപ്പുകളിൽ മത്സരിക്കുന്നതിൽ നിന്ന് വിലക്കണമെന്നും അദ്ദേഹം ആവശ്യപ്പെട്ടു.
ബുധനാഴ്ച രാഹുൽ ഗാന്ധി സർക്കാരിനെതിരെ രൂക്ഷമായ ആക്രമണം നടത്തിയപ്പോൾ ലോക്സഭ പ്രതിഷേധങ്ങൾക്ക് സാക്ഷ്യം വഹിച്ചു, വിദേശ ശക്തികൾക്ക് കീഴടങ്ങുകയും ഭാരതമാതാവിനെ വിറ്റുകളയുകയും ചെയ്തുവെന്ന് രാഹുൽ ആരോപിച്ചു. എന്നാൽ പ്രതിപക്ഷ നേതാവിന്റെ ഭാഷ പാർലമെന്ററി വിരുദ്ധമാണെന്ന് വിശേഷിപ്പിച്ചുകൊണ്ട് ഭരണകക്ഷി രാഹുൽ ഗാന്ധിയുടെ കടുത്ത ആക്രമണത്തെ എതിർത്തു. അദ്ദേഹത്തിന്റെ പ്രസംഗം വെറും പൊള്ളയാണെന്നും തെളിവില്ലാതെ സംസാരിക്കുന്ന അദ്ദേഹത്തിന്റെ പരാമർശങ്ങൾ സഭാ നടപടികളിൽ നിന്ന് ഒഴിവാക്കണമെന്നും ബിജെപി നേതാക്കൾ ആവശ്യപ്പെട്ടു.
