ബാധ ഒഴിപ്പിക്കലിന്റെ പേരില് 16കാരിയെ പീഡിപ്പിക്കാന് ശ്രമിച്ച കേസില് അറസ്റ്റിലായ രാജന് ബാബു എന്ന മുരാരി തന്ത്രി സോഷ്യല് മീഡിയയില് പല തവണ വൈറലായ ആളാണ്. ദിലീപ് കേസ് അടക്കമുളള വിഷയങ്ങളില് പ്രവചനം നടത്തിയെന്ന് അവകാശപ്പെട്ട് ഇയാള് രംഗത്ത് വന്നിരുന്നു. ഇന്സ്റ്റഗ്രാമിലെ റീലുകള് കൂടാതെ സ്വന്തമായി യൂട്യൂബ് ചാനലും ഇയാള്ക്കുണ്ട്.
മുരാരി ജ്യോതിഷാലയം എന്ന പേരിലാണ് ഇയാളുടെ യൂട്യൂബ് ചാനല്. ഈ ചാനല് വഴിയാണ് ഇയാള് പല പ്രവചന വീഡിയോകളും ആളുകള്ക്കിടയില് പ്രചരിപ്പിച്ചിരുന്നത്. ജ്യോതിഷ സംബന്ധമായ വീഡിയോകളും ശബരിമല സ്വര്ണക്കടത്ത് അടക്കമുളള വിഷയങ്ങളിലെ വീഡിയോകളും ഇയാളുടെ ചാനലില് കാണാം.
നടിയെ കൊട്ടേഷന് കൊടുത്ത് ആക്രമിച്ച കേസിലെ എട്ടാം പ്രതിയായിരുന്ന ദിലീപിനെ അടുത്തിടെയാണ് വിചാരണക്കോടതി വെറുതെ വിട്ടത്. നടിയെ ആക്രമിക്കാന് ദിലീപ് ഗൂഢാലോചന നടത്തിയെന്ന് തെളിയിക്കാന് പ്രോസിക്യൂഷന് സാധിച്ചില്ലെന്നാണ് കോടതിയുടെ കണ്ടെത്തല്. ദിലീപിന്റെ ജയില് വാസവും ശിക്ഷയില് നിന്നുളള മുക്തിയും അടക്കമുളളവ നേരത്തെ പ്രവചിച്ചിരുന്നു എന്ന് അവകാശപ്പെട്ടത് ചിലര് രംഗത്ത് വന്നിരുന്നു.
ദിലീപിനെ കേസില് നിന്നും കോടതി വെറുതെ വിട്ടത് താന് കാരണമാണ് എന്ന് അവകാശപ്പെട്ട് മുരാരി തന്ത്രിയും രംഗത്ത് വരികയുണ്ടായി. തന്റെ പൂജയുടെ ഫലമായാണ് ദിലീപ് ശിക്ഷയൊന്നും കിട്ടാതെ കേസില് നിന്ന് രക്ഷപ്പെട്ടത് എന്നാണ് ഇയാള് അവകാശപ്പെട്ടത്. ദിലീപ് കേസ് കൂടാതെ ഷിരൂരിലെ മണ്ണിടിച്ചിലില് അകപ്പെട്ട ഡ്രൈവര് അര്ജുന്റെ വാഹനം കിടന്ന ദിശ താന് പ്രവചിച്ചിരുന്നുവെന്നും ഇയാള് അവകാശപ്പെട്ടിരുന്നു.
യൂട്യൂബില് പങ്കുവെച്ച വീഡിയോയില് മുരാരി തന്ത്രി പറയുന്നത് ഇങ്ങനെയാണ്- ”നിരവധി പേര് തന്നോട് ചോദിക്കുന്നുണ്ട് ഷിരൂരില് കാണാതായ പ്രിയ സഹോദരന് അര്ജുനെ കണ്ട് കിട്ടുമോ എന്ന്. അര്ജുനെ കാണാതായ സ്ഥലത്തിന്റെ കോണ് രാശിയില് തന്നെ വാഹനവും അര്ജുനും ഉണ്ട്. നാളെ ഉച്ചയ്ക്ക് 12. 17ന് അകത്ത് അര്ജുനെ ലഭിക്കും. ഗ്രഹസ്ഥാനങ്ങള് വിശകലനം ചെയ്യുമ്പോള് വലിയ ദുരന്തം കാണാന് സാധിക്കും”, എന്നാണ് മുരാരി തന്ത്രി പറയുന്നത്.
ഇത് കൂടാതെ ഓയൂരില് കാണാതായ പെണ്കുട്ടിയെ കണ്ടെത്തിയ സമയവും താന് നേരത്തെ പ്രവചിച്ചിരുന്നുവെന്നും ഇയാള് അവകാശപ്പെടുകയുണ്ടായി. നേരത്തെ ഓട്ടോ തൊഴിലാളി ആയിരുന്നു ഇയാള് എന്നാണ് വിവരം. ജ്യോതിഷം ആരംഭിച്ചതോടെയാണ് കാര്യമായി ധനസമ്പാദനം തുടങ്ങിയത്. വെണ്ടാറിലുളള ഇയാളുടെ മുരാരി ജ്യോതിഷാലയത്തിലേക്ക് ബാധ ഒഴിപ്പിക്കാനായി അമ്മയ്ക്ക് ഒപ്പം എത്തിയ 16കാരിയെ ആണ് ഇയാള് കടന്ന് പിടിച്ചത്. ഭരണിക്കാവിലെ ലോഡ്ജില് നിന്നും അറസ്റ്റ് ചെയ്ത ഇയാള്ക്കെതിരെ പോക്സോ വകുപ്പ് ചുമത്തിയാണ് കേസെടുത്തിരിക്കുന്നത്.
