കണ്ണൂര്: ആചാരനുഷ്ഠാനങ്ങളുടെ ഭാഗമായി ദേവസ്ഥാനങ്ങള് സന്ദര്ശിക്കാനിറങ്ങിയ തെയ്യത്തിനുനേരെ തെരുവുനായ്ക്കൂട്ടം ഓടിയടുത്തപ്പോള് തെയ്യം കൈയുയര്ത്തി മണികിലുക്കി അട്ടഹസിച്ചു. ഇതോടെ ഭയന്ന നായ്ക്കൂട്ടം പിന്തിരിഞ്ഞ് ഓടിമറഞ്ഞു. നടുവില് അങ്കണവാടിക്കു സമീപം പുലര്ച്ചെയാണ് സംഭവം.
ഇവിടെനിന്നു രണ്ടു കിലോമീറ്റര് അകലെയുള്ള നടുവില് പള്ളിത്തട്ട് മന്നന്കണ്ടി തറവാട് ദേവസ്ഥാനത്ത് കെട്ടിയാടിയ ആലക്കുന്ന് ചാമുണ്ഡി തെയ്യം നടുവില് പടിഞ്ഞാറ് ദേശത്തുള്ള ചുഴലി ഭഗവതീ ക്ഷേത്രം, പൊള്ളോലിടം, ഒതയോത്തിടം തറവാട്ട് ദേവസ്ഥാനങ്ങള് സന്ദര്ശിക്കുന്ന പെരുവാറ്റ് പാച്ചില് എന്ന ആചാരത്തിനായി പുറപ്പെട്ടപ്പോഴാണ് നായക്കൂട്ടം ആക്രമിക്കാനെത്തിയത്.
പുലര്ച്ചെ തെയ്യം കെട്ടിയാടിയ സ്ഥലത്തുനിന്ന് അകമ്പടിക്കാരോ വാദ്യക്കാരോ ഇല്ലാതെ ഒറ്റയ്ക്കാണ് പെരുവാറ്റ് പാച്ചില് എന്ന ആചാരത്തിന്റെ ഭാഗമായി തറവാട്ട് ദേവസ്ഥാനങ്ങള് സന്ദര്ശിക്കാനിറങ്ങുക.
തെരുവുനായ്ക്കള് ഓടിവന്നപ്പോള് തെയ്യം അട്ടഹാസത്തോടെ കൈയുയര്ത്തുകയും ചിലമ്പിന്റെ ശബ്ദം പുറപ്പെടുവിക്കുകയും ചെയ്തു. നായ്ക്കള് ഓടിയതോടെ തെയ്യം പെരുവാറ്റ് യാത്ര തുടര്ന്നു. തൃക്കരിപ്പൂര് എന്ജിനിയറിംഗ് കോളേജ് കമ്പ്യൂട്ടര് സയന്സ് വിദ്യാര്ഥിയായ ആദിത്യനാഥ് (19) ആണ് തെയ്യം കെട്ടിയത്.
