പെരുമ്പാവൂര്: എറണാകുളം ജില്ലയിലെ പെരുമ്പാവൂരില് പ്ലൈവുഡ് ഫാക്ടറികളില് ജോലി ചെയ്യാനെത്തിത്തുടങ്ങുകയും പിന്നീട് വിവിധതൊഴിലുകളുമായി എത്തുകയും ചെയ്ത ഭായിമാര് അസാന്മാര്ഗ്ഗിക പ്രവൃത്തിയുടെ വിളഭൂമിയാക്കി പെരുമ്പാവൂരിനെ മാറ്റുന്നതിനെതിരെ പ്രതികരിച്ച് ജനങ്ങള്. ഇനി ഇവിടെ കഞ്ചാവും പെണ്ണും അനുവദിക്കില്ലെന്ന് ഉറക്കെ മുദ്രാവാക്യം വിളിച്ചാണ് തദ്ദേശീയര് അതിഥിത്തൊഴിലാളികള് എന്ന് വിളിക്കപ്പെടുന്ന ഭായിമാര്ക്കെതിരെ പ്രതിഷേധിച്ചത്.
ഇതോടെ ഈ പ്രദേശത്ത് നാട്ടുകാരും അതിഥിത്തൊഴിലാളികളും തമ്മില് സംഘര്ഷംനിലനില്ക്കുകയാണ്.. ഇതരസംസ്ഥാനത്തൊഴിലാളിയുടെ പരാതിയില് വെങ്ങോല പഞ്ചായത്ത് പ്രസിഡന്റിന്റെ ഭര്ത്താവിനെ പൊലീസ് അറസ്റ്റ് ചെയ്തിരിക്കുകയാണ്. ഇതോടെ നാട്ടുകാര് കൂടുതല് പ്രക്ഷുബ്ധരാണ്. നാട്ടുകാര് അക്രമാസക്തരായതോടെ കണ്ടന്തറയില് പഞ്ചായത്ത് അധികൃതരും എക്സൈസ് അധികൃതരും പാഞ്ഞെത്തിയിരിക്കുകയാണ്. വാഴക്കുളം, വെങ്ങോല പഞ്ചായത്ത് അധികൃതരാണ് പരിശോധിക്കെത്തിയത്. സംഘര്ഷസാഹചര്യം നിലനില്ക്കുന്നതിനാല് നാട്ടുകാരേയും ഇതരസംസ്ഥാനത്തൊഴിലാളികളേയും വിളിച്ചുചേര്ത്ത് റൂറല് എസ് പിയുടെ നേതൃത്വത്തില് യോഗം ചേര്ന്നു. ഇവിടെ ലഹരിവ്യാപനം കൂടിയിട്ടുണ്ടെന്നും നിയമം കയ്യിലെടുക്കാന് ആരെയും അനുവദിക്കില്ലെന്നും റൂറല് എസ് പി കെ. സുദര്ശന് പറഞ്ഞു. 2023, 2024,2025 വര്ഷങ്ങളില് ലഹരി ഉപയോഗം നേരെ ഇരട്ടിയായി വര്ധിക്കുകയാണ്. ലഹരി വ്യാപനത്തിനും പെണ്വാണിഭത്തിനും എതിരെയാണ് ജനങ്ങള് പോരാടുന്നത്. ഇതിന് പിന്തുണനല്കുമെന്ന് പഞ്ചായത്ത് അധികൃതര് പറയുന്നുണ്ടെങ്കിലും ജനങ്ങള്ക്ക് വിശ്വാസമില്ല.
ഇവിടെ ഭായി കോളനി എന്നറിയപ്പെടുന്ന ഭായിമാര് തിങ്ങിത്താമസിക്കുന്ന പ്രദേശത്ത് അനാശാസ്യവും മയക്കമരുന്ന് വില്പനയും ക്രമാതീതമായ തോതില് വര്ധിച്ചിരുന്നു. ഇത് തേടി പല ദേശങ്ങളില് നിന്നും ആളുകള് എത്തുന്നതും പതിവായി. ഇതോടെ കഞ്ചാവ്, മരുന്ന്, പെണ്ണ് ഇത് ചോദിച്ച് ഇവിടെ വരുന്നവരെ തല്ലും എന്ന ബോര്ഡ് നാട്ടുകാര് സ്ഥാപിച്ചത്. എന്നാല് പൊലീസ് ഇത് വന്ന് എടുത്തുമാറ്റുകയായിരുന്നു.ഇതാണ് നാട്ടുകാരെ ചൊടിപ്പിച്ചത്. ഇതോടെയാണ് ശക്തമായ പന്തംകൊളുത്തി പ്രതിഷേധം നടന്നത്. നേരിയ സംഘര്ഷാവസ്ഥപോലും ഇവിടെ നിലനില്ക്കുന്നതായി റിപ്പോര്ട്ടുണ്ട്.
വന് മയക്കമരുന്ന് റാക്കറ്റിന്റെ പിടിയിലാണ് വടക്കേയിന്ത്യയില് നിന്നുള്ളവര് തിങ്ങിപ്പാര്ക്കുന്ന പെരുമ്പാവൂരിലെ ചില പ്രദേശങ്ങള്. എന്നാല് ഇതിനെതിരെ ഫലപ്രദമായ പ്രതിരോധ നടപടി പൊലീസിന്റെ ഭാഗത്ത് നിന്നും ഉണ്ടാകുന്നില്ല. ഈയിടെ കാലടി പൊലീസ് സ്റ്റേഷനിലെ സിപിഒ സുബീറിനെ എറണാകുളം റൂറല് എസ്പി ഹേമലത സസ്പെന്റ് ചെയ്തിരുന്നു. കാരണം പെരുമ്പാവൂര് ഭാഗത്തുളള മയക്കമരുന്ന് വേട്ട വേണ്ടതുപോലെ നടക്കുന്നില്ലെന്ന കാരണം ചൂണ്ടിക്കാട്ടിയായിരുന്നു ഈ സസ്പെന്ഷന്. കഴിഞ്ഞ മാസം സുബീറിന്റെ ബന്ധുവിന്റെ വാടകക്കെട്ടിടത്തില് നിന്നും പൊലീസ് ഒമ്പത് കിലോ കഞ്ചാവ് പിടികൂടിയിരുന്നു. ഇതേ ഭായി കോളനിയിലെ മറ്റൊരു വീട്ടില് നിന്നും എക്സൈസ് 9.33 ലക്ഷം രൂപയും നോട്ടെണ്ണുന്ന യന്ത്രവും ഹെറോയിനും പിടിച്ചെടുത്തിരുന്നു. പിടിച്ചെടുക്കാതെ സൂക്ഷിക്കപ്പെടുന്ന മയക്കമരുന്ന് ഇതിന്റെ എത്രയോ മടങ്ങാണെന്ന് ജനങ്ങള് പറയുന്നു.
സിപിഎം ഉള്പ്പെടെയുള്ള രാഷ്ട്രീയപാര്ട്ടികളുടെ പിന്തുണയും ഭായിമാര്ക്കുണ്ടെന്ന് പറയപ്പെടുന്നു. കേരളത്തിലെവിടെയായാലും വടക്കേയിന്ത്യയില് നിന്നും മറ്റ് അനധികൃത കുടിയേറ്റക്കാര്ക്കും സിപിഎം ബാന്ധവുമുള്ളതായി പറയുന്നു. കഴിഞ്ഞ ദിവസം സിപിഎം സെക്രട്ടറി ഗോവിന്ദന് അനുകൂലമുദ്രാവാക്യവുമായി അതിഥിത്തൊഴിലാളി സംഘമെത്തിയത് വലിയ വാര്ത്തയായിരുന്നു. പെരുമ്പാവൂര് ബസ് സ്റ്റാന്റ് പരിസരങ്ങളില് ഞായറാഴ്ച ദിവസങ്ങളില് തദ്ദേശീയരായ നാട്ടുകാര് പോകാന് പോലും മടിക്കുകയാണ്. അത്രയ്ക്കാണ് ഇവിടുത്തെ ഭായിമാരുടെ സാന്നിധ്യം.
