മാഞ്ചസ്റ്റര്: പുതിയ പരിശീലകന് മൈക്കല് കാരിക്കിന് കീഴില് ഇംഗ്ലീഷ് പ്രീമിയര് ലീഗ് വമ്പന്മാരായ മാഞ്ചസ്റ്റര് യുണൈറ്റഡിന് തുടര്ച്ചയായ നാലാം ജയം. പ്രീമിയര് ലീഗ് പോ
രാട്ടത്തില് കരുത്തരായ ടോട്ടനം ഹോട്സ്പറിനെ ഇന്നലെ കീഴടക്കിയത് എതിരില്ലാത്ത രണ്ട് ഗോളുകള്ക്ക്. സ്വന്തം തട്ടകം ഓള്ഡ് ട്രാഫഡിലായിരുന്നു യുണൈറ്റഡിന്റെ വിജയം.
ജയത്തോടെ പോയിന്റ് പട്ടികയില് നാലാം സ്ഥാനം നിലനിര്ത്താന് യുണൈറ്റഡിന് സാധിച്ചു. 44 പോയിന്റുള്ള യുണൈറ്റഡിന് തൊട്ടുതാഴെ വമ്പന്മാരായ ചെല്സിയും(41) ലിവര്പൂളും(39) ആണ്. ആഴ്സണല്, സിറ്റി, ആസ്റ്റണ് വില്ല ടീമുകളാണ് യുണൈറ്റഡിന് മുന്നിലുള്ളവര്.
ഓള്ഡ് ട്രാഫഡില് മത്സരം പുരോഗമിക്കവെ 29-ാം മിനിറ്റില് ടോട്ടനം പത്ത് പേരായി ചുരുങ്ങി. അര്ജന്റീനയില് നിന്നുള്ള സൂപ്പര് സെന്ട്രല് ബാക്ക് ക്രിസ്റ്റ്യന് റൊമീറോ ചുവപ്പ് കാര്ഡ് കണ്ട് പുറത്താകുകയായിരുന്നു. ഇതിന് പിന്നാലെ 38-ാം മിനിറ്റിലാണ് യുണൈറ്റഡ് ആദ്യ ഗോള് നേടിയത്. ബ്രയാന് എംബ്യൂമോ നേടിയ ഈ ഒരു ഗോളില് യുണൈറ്റഡ് ആദ്യ പകുതിയില് ആധിപത്യം പുലര്ത്തി.
മത്സരം പുരോഗമിക്കവെ രണ്ടാം പകുതിയില് ബ്രൂണോ ഫെര്ണാണ്ടസ് 81-ാം മിനിറ്റില് യുണൈറ്റഡ് ലീഡ് ഇരട്ടിയാക്കിക്കൊണ്ട് വിജയം ഉറപ്പിച്ചു. സീസണില് ടീമിന്റെ 12-ാം വിജയമാണിത്. ഒരവസരത്തില് 15-ാം സ്ഥാനത്തേക്ക് വരെ ഇടിഞ്ഞുപോയ ശേഷമാണ് യുണൈറ്റഡിന്റെ ഇപ്പോഴത്തെ തിരിച്ചുവരവ്.
ജേക്കബ് അമോറിം പരിശീലക സ്ഥാനത്ത് നിന്ന് പുറത്തായ ശേഷം കഴിഞ്ഞ മാസമാണ് മൈക്കല് കാരിക്ക് ചുമതലയേല്ക്കുന്നത്. കാരിക്കിന്റെ ആദ്യ അവസരത്തില് ടീം ബ്രൈറ്റണിനോട് പരാജയപ്പെട്ട് എഫ് എ കപ്പില് നിന്ന് പുറത്തായി. പിന്നീടിങ്ങോട്ട് നടന്ന എല്ലാ മത്സരങ്ങളിലും വിജയിച്ചു. പ്രീമിയര് ലീഗില് ചിരവൈരികളായ സിറ്റിയെ തോല്പ്പിച്ചു. തുടര്ന്ന് സീസണില് കരുത്തോടെ മുന്നേറിക്കൊണ്ടിരിക്കുന്ന ആഴ്സണലിനെ അടിയറവ് പറയിച്ചു. കഴിഞ്ഞ ഒന്നിന് നടന്ന മത്സരത്തില് ഫുള്ഹാമിനെ തോല്പ്പിച്ച ശേഷമാണ് ടോട്ടനത്തിനെതിരെ വിജയം ആഘോഷിച്ചിരിക്കുന്നത്.
പ്രീമിയര് ലീഗില് ഇന്നലെ നടന്ന മറ്റൊരു മത്സരത്തില് ലീഡ്സ് യുണൈറ്റഡ് നോട്ടിങ്ങാം ഫോറസ്റ്റിനെ തോല്പ്പിച്ചു. ഒന്നിനെതിരെ മൂന്ന് ഗോളുകള്ക്കായിരുന്നു ലീഡ്സിന്റെ വിജയം.
