കണ്ണൂര്‍ : ധനരാജ് രക്തസാക്ഷി ഫണ്ട് ബഹുജനങ്ങളില്‍ നിന്ന് മാത്രമാണ് പിരിച്ചതെന്ന സിപിഎം കണ്ണൂര്‍ ജില്ലാ സെക്രട്ടറി കെകെ രാഗേഷിന്റെ വാദം കളളമാണെന്ന് സി പി എം പുറത്താക്കിയ മുന്‍ ജില്ലാ കമ്മിറ്റി അംഗം വി കുഞ്ഞികൃഷ്ണന്‍. ധനരാജ് ഫണ്ടിലേക്ക് എല്ലാവരില്‍ നിന്നും പണം വാങ്ങി. പണം നഷ്ടപ്പെട്ടില്ല എന്നത് ശുദ്ധ അസംബന്ധമാണ്.കണക്ക് അവതരിപ്പിക്കാന്‍ പാര്‍ട്ടിക്ക് കഴിയില്ലെന്നും വി കുഞ്ഞികൃഷ്ണന്‍ പറഞ്ഞു.
കണക്ക് പറയാതെ കെ കെ രാഗേഷ് വ്യക്തിപരമായി അധിക്ഷേപിക്കുകയാണ്.വിശദീകരിക്കാന്‍ കഴിയാത്തതിനാലാണ് കണക്ക് അവതരിപ്പിക്കാത്തത്.ബാക്കിയുള്ള ഫണ്ട് കാണിക്കാന്‍ കഴിയില്ല. കണക്ക് അവതരിപ്പിച്ചാല്‍ മാത്രമേ ബാക്കി എത്രയുണ്ട് എന്ന് അറിയാന്‍ കഴിയൂവെന്ന് വി കുഞ്ഞികൃഷ്ണന്‍ ചൂണ്ടിക്കാട്ടി.
ഏരിയ കമ്മിറ്റിക്ക് ഏത് അക്കൗണ്ടില്‍ പണം കൈമാറി എന്ന് വ്യക്തമാക്കണം.തന്റെ പുസ്തകം പുറത്തിറക്കുന്നതിന് മുമ്പ് കണക്ക് അവതരിപ്പിക്കാന്‍ ആവശ്യപ്പെട്ടത് വ്യാജ കണക്ക് തയാറാക്കാതിരിക്കാനാണ്. വ്യാജ രസീതും രണ്ട് ഒറിജിനല്‍ രസീതുകളും അച്ചടിച്ചു. രസീത് തിരികെ വരാതിരിക്കുമ്പോള്‍ എങ്ങനെയാണ് പണം നഷ്ടപ്പെട്ടില്ല എന്ന് പറയാന്‍ പറ്റുക. മധുസൂദനനെതിരെ പാര്‍ട്ടി നടപടിയെടുത്തത് ധനാപഹരണത്തിനല്ല. നടപടി കണക്ക് അവതരിപ്പിക്കാന്‍ വൈകിയതിനാണ്. തന്റെ വാദം പണം അപഹരിച്ചു എന്നതാണ്. ധനാപഹരണം പാര്‍ട്ടി ഇതുവരെ അംഗീകരിച്ചിട്ടില്ലെന്ന് വി കുഞ്ഞികൃഷ്ണന്‍ ചൂണ്ടിക്കാട്ടി.
