കൊച്ചി: അമേരിക്കയുമായുള്ള വ്യാപാര കരാര് ഭാരതത്തിന്റെ ചരിത്രവിജയമാണെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറും ട്വന്റി20 പാര്ട്ടി ചെയര്മാന് സാബു. എം. ജേക്കബും പറഞ്ഞു. എറണാകുളം പ്രസ് ക്ലബ് സംഘടിപ്പിച്ച മീറ്റ് ദ പ്രസില് സംസാരിക്കുകയായിരുന്നു അവര്. ഭാരതത്തിന്റെ ഇച്ഛാശക്തിയില് അമേരിക്ക മുട്ടുമടക്കുകയായിരുന്നു. യുഎസ് ഇങ്ങോട്ട് വിളിച്ചാണ് സംസാരിച്ചത്.
ഭാരത-യൂറോപ്യന് യൂണിയന്, യുഎസ് വ്യാപാര കരാറുകളെ സിപിഎമ്മും മറ്റ് പാര്ട്ടികളും എതിര്ക്കുന്നത് ചൈനക്ക് തിരിച്ചടിയാകുന്നതുകൊണ്ടാണ്. ഉത്പാദന മേഖലയില് ചൈനയുടെ മേധാവിത്തം തകരുന്നതാണ് ഇവരെ വിഷമിപ്പിക്കുന്നതെന്നും രാജീവ് ചന്ദ്രശേഖര് പറഞ്ഞു. 2020ന് മുന്പ് കൊവിഡ് കാലഘട്ടംവരെ ലോകത്ത് ചൈനയുടെ മേധാവിത്വമായിരുന്നു. എന്നാല് അതിനുശേഷം ഉത്പാദന രംഗത്ത് ഭാരതം മുന്നേറി. ആപ്പിള് ഫോണ് 25 ശതമാനം ഇപ്പോള് ഭാരതത്തിലാണ് ഉത്പാദിപ്പിക്കുന്നത്. മാനുഫാക്ചറിങ് രംഗത്ത് വലിയ മുന്നേറ്റമാണ് ഭാരതം നടത്തുന്നത്. ഇതാണ് എന്ഡിഎ വിരുദ്ധ പാര്ട്ടികളെ ചൊടിപ്പിക്കുന്നതെന്നും അദ്ദേഹം പറഞ്ഞു. യുവാക്കള്ക്കായി വന് തൊഴില് സാധ്യതയാണ് തുറക്കുന്നത്. വന് നിക്ഷേപവും ഇതിലൂടെ ലഭിക്കും. ഭാരതം മാനുഫാക്ചറിങ് ഹബ്ബായി മാറുകയും ചെയ്യും.
കേന്ദ്ര ബജറ്റില് കേരളത്തെ അവഗണിച്ചുവെന്ന് പറയുന്നത് തികച്ചും തെറ്റാണ്. വന്ദേഭാരതും അമൃത് ഭാരത് ട്രെയിനുകളുമെല്ലാം ബജറ്റില് പ്രഖ്യാപിച്ചല്ല കേരളത്തിന് ലഭിച്ചത്. ഇ. ശ്രീധരന് തയാറാക്കുന്ന ഹൈസ്പീഡ് റെയില് പദ്ധതിക്ക് കേന്ദ്ര സര്ക്കാരിന്റെ പിന്തുണയുണ്ട്. ഡിഎംആര്സിയാണ് പദ്ധതി നടപ്പാക്കുന്നത്. പദ്ധതിയുടെ ഡിപിആര് തയാറാക്കി കേന്ദ്രസര്ക്കാരിന് സമര്പ്പിക്കും. അത് പഠിച്ച ശേഷമായിരിക്കും പ്രഖ്യാപനമെന്നും നേതാക്കള് പറഞ്ഞു.
കൊല്ലത്ത് ഇഎസ്ഐ ആശുപത്രി 600 കോടി മുടക്കി കോളജ് ആക്കാനായി കേന്ദ്രം പണം അനുവദിച്ചിട്ട് അത് നടപ്പാക്കാന് സംസ്ഥാന സര്ക്കാര് തയാറായില്ല. എയിംസ് കേരളത്തിന് 2017ല് അനുവദിച്ചതാണ്. എന്നാല് സംസ്ഥാന സര്ക്കാര് ഇതുവരെ സ്ഥലമേറ്റെടുത്ത് കേന്ദ്രത്തെ അറിയിച്ചിട്ടില്ല. എന്നാല് കേരളത്തോടൊപ്പം അനുവദിച്ച മധുരയില് എയിംസ് പ്രവര്ത്തനമാരംഭിച്ചു. സംസ്ഥാന സര്ക്കാരിന്റെ പിടിപ്പുകേടുമൂലമാണിത് സംഭവിക്കുന്നത്. വിവാദങ്ങള് ഉണ്ടാക്കുന്നതിലാണ് ഇവിടെ ശ്രദ്ധ. തെരഞ്ഞെടുപ്പിന് 45 ദിവസങ്ങള് മുമ്പുള്ള പ്രഖ്യാപനങ്ങളാണ് സംസ്ഥാന സര്ക്കാര് നടത്തുന്നത്. ശബരിപാത സംബന്ധിച്ച് ആത്മാര്ത്ഥയില്ല. ഇരുമുന്നണികളും ഇക്കാര്യത്തില് ജനങ്ങളെ വഞ്ചിക്കുകയായിരുന്നു. വികസിത കേരളമാണ് എന്ഡിഎ ലക്ഷ്യം. വിവാദ രാഷ്ട്രീയം മാറ്റി വികസിത രാഷ്ട്രീയമാണ് എന്ഡിഎയുടെ ലക്ഷ്യം.
ഇരുമുന്നണികളും മാറിമാറി ഭരിച്ച് കേരളത്തെ പിന്നോട്ടടിച്ചിരിക്കുകയാണ്. ഭാരതം വികസരംഗത്ത് കുതിച്ചുചാടുമ്പോള് കേരളം തകര്ച്ചയെ നേരിടുകയാണ്. ഇതിനുള്ള പരിഹാരമാണ് എന്ഡിഎയുടെ വികസന രാഷ്ട്രീയം.
