കൊച്ചി:കോണ്ഫിഡന്റ് ഗ്രൂപ്പിന്റെ പക്കല് കള്ളപ്പണമോ ആരെയെങ്കിലും കബളിപ്പിച്ചുണ്ടാക്കിയ പണമോ ഇല്ലെന്നും മരിച്ചിട്ടും ഡോ. സി.ജെ.റോയിയെ വേട്ടയാടുകയാണെന്നും കമ്പനി മാനേജിംഗ് ഡയറക്ടര് ടി.എ.ജോസഫ്. കമ്പനിയുടെ ഭാവിയെക്കുറിച്ച് ഒരാള്ക്കും ആശങ്ക വേണ്ട. നേരത്തേ പ്രവര്ത്തിച്ചിരുന്ന അതേ ഊര്ജത്തോടെ മുന്നോട്ടു പോകും.
സി.ജെ.റോയി മരിച്ച് ഏഴാം ദിവസം കമ്പനിയുടെ സമൂഹ മാധ്യമങ്ങളിലൂടെ പുറത്തുവിട്ട വിഡിയോയിലാണ് ജോസഫ് ഇക്കാര്യങ്ങള് പറഞ്ഞത്. അതിനിടെ, റോയിയുടെ മരണവുമായി ബന്ധപ്പെട്ട് അന്വേഷണം നടത്തുന്ന എസ്ഐടി വൈകാതെ കേരളത്തിലെത്തും.
കമ്പനി ചെയര്മാന് സി.ജെ.റോയി മരിച്ചുകഴിഞ്ഞപ്പോള് ആശങ്കകള് ഉണ്ടായത് സ്വാഭാവികമാണ്.ഒട്ടേറെ നിക്ഷേപകര് തങ്ങളെ വിളിച്ചിരുന്നു എന്നും ടി.എ.ജോസഫ് പറഞ്ഞു. വാര്ത്താ സമ്മേളനം വിളിച്ച് കാര്യങ്ങള് വിശദമാക്കണമെന്ന് വിചാരിച്ചിരുന്നെങ്കിലും പൊലീസ് അന്വേഷണവും മറ്റുമായി ബെംഗളുരുവില് നില്ക്കേണ്ടി വന്നതിനാലാണ് അത് സാധിക്കാതിരുന്നത്.കേരളത്തിലും ബെംഗളുരുവിലുമാണ് കോണ്ഫിഡന്റ് ഗ്രൂപ്പ് കൂടുതലായി പ്രവര്ത്തിക്കുന്നത്. എന്നാല് ബെംഗളുരുവില് അപ്പാര്ട്ട്മെന്റുകളുടെ നിര്മാണത്തേക്കാള് 23 വര്ഷമായി മാസ്റ്റര് ഡെവലപ്പര് എന്ന നിലയിലാണ് പ്രവര്ത്തിച്ചിരുന്നത്. കൂടിയ അളവില് സ്ഥലം വാങ്ങി ബില്ഡര്മാര്ക്ക് സംയുക്തമായി വികസിപ്പിക്കാന് നല്കുകയാണ് ചെയ്യുന്നത്. കേരളത്തിലെ ചുമതലകള് കഴിഞ്ഞ 15 വര്ഷമായി താന് നേരിട്ടാണ് നടത്തുന്നതെന്നും ഇനിയും അങ്ങനെ തന്നെയാവുമെന്നും ജോസഫ് പറഞ്ഞു.
സമൂഹ മാധ്യമങ്ങളിലൂടെ കുറെപ്പേര് തെറ്റായ കാര്യങ്ങള് പ്രചരിപ്പിക്കുന്നുണ്ട്. ബോര്ഡിലുള്ള ആളെപ്പോലെയാണ് പലരും സംസാരിക്കുന്നത്. തങ്ങള് പൈസ കൊടുക്കാനുണ്ട്, പൈസ കട്ടു, എന്നൊക്കയാണ് ചിലര് പറയുന്നത്. എന്നാല് കഷ്ടപ്പെട്ട് തൊഴിലെടുത്ത് നല്ല രീതിയില് നിര്മാണവും മാര്ക്കറ്റിംഗും നടത്തി, അന്നന്നു വേണ്ട ആഹാരത്തിനായി പണിയെടുത്തിട്ടാണ് കമ്പനി പടുത്തുയര്ത്തിയിരിക്കുന്നതെന്ന് ജോസഫ് വ്യക്തമാക്കി.
