ചങ്ങനാശ്ശേരി: ഹിന്ദുഐക്യത്തിൽ ഞങ്ങൾ ആരുമായും ചർച്ച ചെയ്തിട്ടില്ല. അതിനാൽ അടഞ്ഞ അദ്ധ്യായമല്ല. സൗഹാർദ്ദം തുടരും. അത് എൻഎസ്എസിന്റെ നയമാണ്. ഇതിലെല്ലാം രാഷ്ട്രീയക്കളിയുണ്ട്. അതിനാൽ ഞങ്ങൾ ഐക്യത്തിനില്ല, എൻഎസ്എസ് ജനറൽ സെക്രട്ടറി ജി. സുകുമാരൻനായർ പറഞ്ഞു.
എൻഎസ്എസ്സിന്റെ രണ്ടു നയങ്ങളാണുള്ളത്. ഒന്ന്: എല്ലാ സമുദായവുമായും മതങ്ങളുമായും സൗഹാർദ്ദം തുടരും. രണ്ട്: രാഷ്ട്രീയമായി ഞങ്ങൾ സമദൂരക്കാരാണ്, അതിനാൽ രാഷ്ട്രീയ പക്ഷമുള്ളവരുമായി സഖ്യവും ഐക്യവും സാധിക്കില്ല. തുഷാർ വെള്ളാപ്പള്ളി പറഞ്ഞത് ഞാൻ അങ്ങോട്ടുവരാം എന്നാണ്. അത് ചർച്ചയ്ക്കൊന്നുമല്ല.
ഈ ഐക്യം ഈ പാർട്ടിയെ (എസ്എൻഡിപി) ക്കൊണ്ട് നടക്കില്ല എന്ന് ബോധ്യമായി. 27 ബോർഡംഗങ്ങൾക്കും ഈ വിഷയത്തിൽ ഭിന്നാഭിപ്രായമില്ല. അതിനാലാണ് ഞങ്ങൾ വേണ്ടെന്നുവെച്ചത്.
ഞങ്ങൾക്ക് കിട്ടാവുന്ന സഹായങ്ങൾ കിട്ടേണ്ടിടത്തുനിന്ന് കിട്ടാതെ വരുമ്പോൾ ഞങ്ങൾ കോടതിയെ സമീപിക്കും. ഞങ്ങൾ ആരോടും ഒന്നും ചോദിക്കാറില്ല, അദ്ദേഹം പറഞ്ഞു.
