കൊല്ലം: ശബരിമല സ്വര്ണക്കൊള്ള കേസില് മുന് എക്സിക്യൂട്ടീവ് ഓഫീസര് ഡി.സുധീഷ് കുമാറിന് ജാമ്യം അനുവദിച്ചു. രണ്ടു കേസുകളിലും കൊല്ലം വിജിലന്സ് കോടതി ജാമ്യം നല്കി. അതേസമയം, ദ്വാരപാലക ശില്പ്പ കേസില് തന്ത്രി കണ്ഠരര് രാജീവരര് ജാമ്യപേക്ഷ നല്കി.
അതിനിടെ,തിരുവിതാംകൂര് ദേവസ്വം ബോര്ഡ് മുന് പ്രസിഡന്റും സി പി എം നേതാവുമായ എന് വാസുവിനെ കോടതിയില് ഹാജരാക്കി 14 ദിവസത്തേയ്ക്ക് വീണ്ടും റിമാന്ഡ് ചെയ്തു.ഉണ്ണികൃഷ്ണന് പോറ്റിയുടെ ജാമ്യപേക്ഷയില് ബുധനാഴ്ച വിജിലന്സ് കോടതി വാദം കേള്ക്കും.ഉണ്ണികൃഷ്ണന് പോറ്റിക്ക് നേരത്തെ ദ്വാരപാലക പാളി കേസുകളില് കോടതി ജാമ്യം അനുവദിച്ചിരുന്നു.അറസ്റ്റ് ചെയ്ത് 90 ദിവസം പൂര്ത്തിയായ പശ്ചാത്തലത്തില് കട്ടിളപ്പാളി കേസിലും ജാമ്യം അനുവദിക്കണമെന്നാണ് ഉണ്ണികൃഷ്ണന് പോറ്റിയുടെ ആവശ്യം.
അതേസമയം,പാളികളുടെ കാലപ്പഴക്കം വീണ്ടും പരിശോധിക്കണമെന്ന ആവശ്യവുമായി പ്രത്യേക അന്വേഷണ സംഘം വിഎസ്എസ് സിയെ സമീപിച്ചു.ദ്വാരപാലക പാളികളുടെയും കട്ടിളപ്പാളികളുടെയും താരതമ്യ പരിശോധനയ്ക്ക് പുറമെ കാലപ്പഴക്കം നിര്ണായിക്കാനുള്ള പരിശോധന കൂടി നടത്തണമെന്നാണ് പ്രത്യേക അന്വേഷണ സംഘത്തിന്റെ ആവശ്യം.ഇതിനായി വീണ്ടും പാളികളുടെ സാമ്പിള് എടുക്കണോ എന്നതില് വ്യക്തത വരുത്തണമെന്നും വിഎസ്എസ് സിയോട് ആവശ്യപ്പെട്ടിട്ടുണ്ട്.
