മടിക്കേരി: കര്ണാടകയിലെ കുടക് ജില്ലയില് ഹിന്ദു യുവതികളുടെ മതം മാറിയുളള വിവാഹങ്ങളുടെ എണ്ണം വര്ദ്ധിക്കുന്നതില് ആശങ്ക രേഖപ്പെടുത്തി ഹൈന്ദവ സംഘടനകളുടെ വന് പ്രതിഷേധ പ്രകടനം.ആസൂത്രിതമായ മതം മാറ്റം ലവ് ജിഹാദാണെന്ന് പ്രതിഷേധ പ്രകടനം നടത്തിയവര് പറഞ്ഞു.
കഴിഞ്ഞ ഒരു വര്ഷമായി ഹിന്ദു യുവതികള് ഉള്പ്പെടുന്ന മിശ്ര വിവാഹങ്ങളില് ശ്രദ്ധേയമായ വര്ധനവുണ്ടായിട്ടുണ്ട്. യുവതികളെ സ്വാധീനിക്കാനും മതം മാറ്റാനുമുള്ള സംഘടിത ശ്രമങ്ങളുടെ ഫലമാണ് ഇത്തരം വിവാഹങ്ങള്.
ഹിന്ദു സുരക്ഷാ സമിതിയും മറ്റ് ഹിന്ദു സംഘടനകളും ചേര്ന്ന് വിരാജ്പേട്ട് താലൂക്കിലെ സിദ്ധാപൂര് പ്രദേശത്ത് സംഘടിപ്പിച്ച പ്രതിഷേധത്തില് നൂറുകണക്കിന് പ്രവര്ത്തകര് പങ്കെടുത്തു. ജില്ലയുടെ സാമൂഹികവും സാംസ്കാരികവുമായ ഘടന സംരക്ഷിക്കുന്നതിന് കൂടുതല് അവബോധവും ഇടപെടലും ആവശ്യമാണെന്ന് പ്രകടനത്തിന് ശേഷം നടന്ന പൊതുസമ്മേളനത്തില് ആവശ്യമുയര്ന്നു.
കഴിഞ്ഞ ഒരു വര്ഷത്തിനുള്ളില് കുടക് ജില്ലയിലെ പത്തിലധികം ഹിന്ദു യുവതികള് ഇതര മതസ്ഥരായ പുരുഷന്മാരെ വിവാഹം കഴിച്ചിട്ടുണ്ട്. ഈ കാലയളവില് സിദ്ധാപൂര് പരിധിക്കുള്ളില് മാത്രം കുറഞ്ഞത് ഇത്തരത്തിലുളള ആറ് കേസുകളെങ്കിലും റിപ്പോര്ട്ട് ചെയ്യപ്പെട്ടിട്ടുണ്ടെന്ന് പ്രതിഷേധം സംഘടിപ്പിച്ച സംഘടനാ നേതാക്കള് പറഞ്ഞു. മുന് വര്ഷങ്ങളിലെ സംഭവങ്ങള് ഉള്പ്പെടെ, ഈ പ്രദേശത്തെ 18-ലധികം ഹിന്ദു വനിതകള് മിശ്ര വിവാഹങ്ങളില് ഏര്പ്പെട്ടിട്ടുണ്ട്. ഇത് പ്രദേശവാസികളില് ആശങ്കയുണ്ടാക്കിയിരിക്കുകയാണ്.
പ്രണയത്തിന്റെയും ബന്ധങ്ങളുടെയും പേരില് തെറ്റിദ്ധരിപ്പിക്കപ്പെടുന്ന യുവതികളെയും മാതാപിതാക്കളെയും ബോധവല്ക്കരിക്കുക എന്നതാണ് പ്രകടനത്തിന്റെ ലക്ഷ്യമെന്ന് ഹൈന്ദവ സംഘടനാ നേതാക്കള് പറഞ്ഞു.
ജിഹാദി ശക്തികള് യുവതികളെ സ്വാധീനിക്കുകയും ജില്ലയുടെ ജനസംഖ്യാപരവും സാംസ്കാരികവുമായ സന്തുലിതാവസ്ഥ ക്രമേണ മാറ്റുകയും ചെയ്യുന്നുവെന്ന് യോഗത്തെ അഭിസംബോധന ചെയ്തുകൊണ്ട് ഹിന്ദു സംഘടനാ നേതാവ് ഗണരാജ് പറഞ്ഞു. ഗോണിക്കൊപ്പലില് നിന്നുള്ള ഒരു കോളേജ് വിദ്യാര്ത്ഥിനി സിദ്ധാപൂരിലെ മറ്റൊരു മതത്തില് ഉള്പ്പെട്ട യുവാവിനൊപ്പം ഒളിച്ചോടുകയും പിന്നീട് അയാളെ വിവാഹം കഴിക്കുകയും ചെയ്തതായി റിപ്പോര്ട്ട് ചെയ്യപ്പെട്ട ഒരു സമീപകാല സംഭവം അദ്ദേഹം പരാമര്ശിച്ചു. ഇത്തരം സംഭവങ്ങള് പതിവായിരിക്കുകയാണ്.
ഇത്തരം സംഭവവികാസങ്ങള് കുടുംബങ്ങളെ വൈകാരികമായി ബാധിക്കുന്നു. പല സംഭവങ്ങളിലും, വിവാഹശേഷം യുവതികള് മാതാപിതാക്കളില് നിന്ന് അകന്നു കഴിയുന്നു. ഇവര് ഇതര മതത്തിലേക്ക് പരിവര്ത്തനം ചെയ്യപ്പെടുന്നു.ഇത്തരം സംഭവവികാസങ്ങള് കുടകിലെ, പ്രത്യേകിച്ച് ഗ്രാമപ്രദേശങ്ങളിലെ, ഹൈന്ദവസമൂഹത്തിനിടയില് ഭയവും ഉത്കണ്ഠയും സൃഷ്ടിച്ചിട്ടുണ്ടെന്ന് നേതാക്കള് പറഞ്ഞു.
അതേസമയം, പരസ്പര സമ്മതത്തോടെയുളള മുതിര്ന്നവര് തമ്മിലുള്ള വിവാഹങ്ങളില് ഇടപെടുന്നതിന് നിയമപരമായ പരിമിതികളുണ്ടെന്ന് പ്രതിഷേധം സംഘടിപ്പിച്ച നേതാക്കള് ചൂണ്ടിക്കാട്ടി. നിലവിലുള്ള നിയമങ്ങള് മതം പരിഗണിക്കാതെ വ്യക്തികള്ക്ക് അവരുടെ പങ്കാളികളെ തിരഞ്ഞെടുക്കാന് അനുവദിക്കുന്നുണ്ട്.അതിനാല് നേരിട്ടുള്ള നിയമനടപടി പലപ്പോഴും സാധ്യമല്ല. ഈ പശ്ചാത്തലത്തില് മാതാപിതാക്കള് ജാഗ്രത പാലിക്കണമെന്നും കുട്ടികള് ‘വഴിതെറ്റിക്കപ്പെടുകയോ ചൂഷണം ചെയ്യപ്പെടുകയോ’ ചെയ്യുന്നില്ലെന്ന് ഉറപ്പാക്കാന് അവരുമായി തുറന്ന ആശയവിനിമയം നടത്തണമെന്നും നേതാക്കള് അഭ്യര്ത്ഥിച്ചു.
സര്ക്കാരും ജില്ലാ ഭരണകൂടവും ഉയര്ന്നുവരുന്ന ആശങ്കകള് ശ്രദ്ധിക്കുകയും സമൂഹ തലത്തില് ബോധവല്ക്കരണ പരിപാടികള് സംഘടിപ്പിക്കുകയും ചെയ്യണമെന്നും സംഘടനകള് ആവശ്യപ്പെട്ടു. ഉയര്ന്നുവരുന്ന ഒരു സാമൂഹിക പ്രശ്നം പരിഹരിക്കുന്നതിന് കൗണ്സിലിംഗ് നടപടികള്, മതം മാറിയുളള വിവാഹങ്ങള് സൂക്ഷ്മമായി നിരീക്ഷിക്കല്, വിദ്യാഭ്യാസ സ്ഥാപനങ്ങളുമായി ഇടപഴകല് എന്നിവ വേണ്ടതുണ്ടെന്നും പറഞ്ഞു.
എന്നാല് പ്രതിഷേധം സംഘടിപ്പിച്ച സംഘടനകള് ഉദ്ധരിച്ച കണക്കുകള് സ്ഥിരീകരിക്കുന്ന ഒരു ഔദ്യോഗിക വിവരവും ജില്ലാ അധികാരികളോ പൊലീസോ ഇതുവരെ പുറത്തുവിട്ടിട്ടില്ല. പ്രായപൂര്ത്തിയായവര് വിവാഹ ബന്ധത്തിലേര്പ്പെടുന്നത് നിയമത്തിന്റെ സംരക്ഷണത്തിലാണെന്നും ഏതൊരു പരാതിയും നിയമപരമായ കാഴ്ചപ്പാടില് നിന്ന് മാത്രമേ പരിശോധിക്കാനാകൂ എന്നും പൊലീസ് പ്രതികരിച്ചു.
