കണ്ണൂര്: പയ്യന്നൂര് എംഎല്എ ടിഐ മധുസൂദനനും ചില നേതാക്കളും ധനരാജ് രക്തസാക്ഷി ഫണ്ട് വെട്ടിച്ചെന്ന് വെളിപ്പെടുത്തിയ സിപിഎം കണ്ണൂര് ജില്ലാ കമ്മിറ്റി അംഗം വി കുഞ്ഞികൃഷ്ണനെ അനുകൂലിച്ച് ഫ്ലക്സ് ബോര്ഡുകള്. വിഎസ് അച്യുതാനന്ദനൊപ്പമുള്ള കുഞ്ഞികൃഷ്ണന്റെ ചിത്രവും ചേര്ത്താണ് ഫ്ലക്സ് ബോര്ഡുകള്. ‘നിങ്ങള് കാട്ടിയ പാതയിലൂടെ മുന്നോട്ടിനിയും മുന്നോട്ട്’ എന്നും ഫ്ലക്സില് എഴുതിയിട്ടുണ്ട്. പയ്യന്നൂര് തായിനേരിയിലാണ് ഫ്ലക്സ് വെച്ചിരിക്കുന്നത്.
നിയമസഭാ തെരഞ്ഞെടുപ്പിന് മാസങ്ങള് മാത്രം ശേഷിക്കെയാണ് സിപിഎമ്മിനെ പ്രതിരോധത്തിലാക്കി വി കുഞ്ഞികൃഷ്ണന് ആരോപണം പുറത്തു പറഞ്ഞത്.കൊല്ലപ്പെട്ട ധനരാജിന്റെ കുടുംബത്തെ സഹായിക്കാന് പാര്ട്ടി പിരിച്ച ഫണ്ടായി ഒരുകോടി പിരിച്ചതില് 46 ലക്ഷം രൂപ പയ്യന്നൂര് എംഎല്എ ടിഐ മധുസൂദനന് ഉള്പ്പെടെയുള്ളവര് ചേര്ന്ന് തട്ടിയെടുത്തുവെന്നുവെന്നാണ് ആരോപണം. പാര്ട്ടിക്ക് തെളിവ് നല്കിയിട്ടും നടപടി എടുത്തില്ലെന്ന് വി കുഞ്ഞികൃഷ്ണന് ആരോപിച്ചു.
കുഞ്ഞികൃഷ്ണനെ പാര്ട്ടിയില് നിന്ന് പുറത്താക്കാന് സി പി എം കണ്ണൂര് ജില്ലാ സെക്രട്ടേറിയറ്റ് തീരുമാനമെടുത്തിട്ടുണ്ട്.
