തിരുവനന്തപുരം: മുഖ്യമന്ത്രി പിണറായി വിജയനോടും കോണ്ഗ്രസ് നേതാവ് സോണിയ ഗാന്ധിയോടും മൂന്ന് ചോദ്യങ്ങളുമായി ബിജെപി സംസ്ഥാന അധ്യക്ഷന് രാജീവ് ചന്ദ്രശഖര്. ഉപലോകായുക്തയായിരുന്ന ജസ്റ്റിസ്റ്റ് ബാബു മാത്യുജോസഫിനെ ചട്ടങ്ങള് ലംഘിച്ച് തദ്ദേശ ഓംബുഡ്സ്മാനായി നിയമിച്ചതിലും ഗവര്ണറുടെ പ്രസംഗം നിയമസഭാ രേഖകളില് മാറ്റം വരുത്തിയ സംഭവത്തിലും മുഖ്യമന്ത്രി പിണറായി വിജയന് മറുപടി പറയണമെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് ആവശ്യപ്പെട്ടു.ഉണ്ണികൃഷ്ണന്പോറ്റിയുമായി നടത്തിയ കൂടിക്കാഴ്ചയിലെ അജണ്ട എന്തെന്ന് സോണിയഗാന്ധിയും കോണ്ഗ്രസും വ്യക്തമാക്കണമെന്നും രാജീവ് ചന്ദ്രശേഖര് വാര്ത്താ സമ്മേളനത്തില് ആവശ്യപ്പെട്ടു.
കേരളലോകായുക്ത ചട്ടം 99 പ്രകാരം ഉപലോകായുക്തമാര്ക്ക് ഇത്തരം നിയമനങ്ങള് പാടില്ല എന്ന് വ്യക്തമാക്കിയിട്ടുണ്ട്. മുഖ്യമന്ത്രി ഭരണഘടനയില് തൊട്ട് സത്യ പ്രതിജ്ഞ ചെയ്ത ആളാണ്. പിന്നെ എന്തിനാണ് ഭരണഘടന ലംഘിച്ച് തദ്ദേശ ഓംബുഡ്സ്മാന് നിയമനമെന്ന് വ്യക്തമാക്കണം. അനധികൃത നിയമനത്തിനെതിരെ ഗവര്ണര്ക്ക് ബിജെപി നിവേദനം നല്കിയിട്ടുണ്ട്.
നിയമസഭാ രേഖകളില് ഗവര്ണറുടെ നയപ്രഖ്യാപന പ്രസംഗം മാറ്റം വരുത്തിയത് ഭരണഘടനാ പ്രകാരമാണോ എന്നും മുഖ്യമന്ത്രി മറുപടി പറയണം. ഗവര്ണര് സംസാരിച്ചതാണ് നിയമസഭാ രേഖകളില് ഉള്പ്പെടുത്തേണ്ടത്. സിപിഎമ്മും അവരുടെ എംപിമാരുമാണ് ഭരണഘടന ഉയര്ത്തിപ്പിടിച്ച് ഭരണഘടന സംരക്ഷിക്കണം എന്ന് ആവശ്യപ്പെടുന്നത്. അവരാണ് ഭരണഘടനാ പദവിയിലുള്ള ഗവര്ണറുടെ പ്രസംഗം മാറ്റിയത്. ഗവര്ണറെ നിയമസഭയില് ഭേദഗതി ചെയ്യുന്നത് രാജ്യത്ത് തന്നെ ആദ്യമാണ്.ശബരിമല സ്വര്ണക്കൊള്ളക്കേസിലെ പ്രതി ഉണ്ണികൃഷ്ണന് പോറ്റി സോണിയ ഗാന്ധിയുമായി കൂടിക്കാഴ്ച നടത്തിയതിന് പിന്നിലെ അജണ്ട എന്തെന്ന് മുസ്ലീംലീഗും ജമാഅത്തെ ഇസ്ലാമിയും മതേതരമാണെന്ന് പറയുന്ന കോണ്ഗ്രസുകാര് വ്യക്തമാക്കണം.
സോണിയഗാന്ധി കോണ്ഗ്രസ് പ്രസിഡന്റും ഉമ്മന്ചാണ്ടി മുഖ്യമന്ത്രിയും ആയിരുന്നപ്പോഴാണ് കൂടിക്കാഴ്ച നടന്നത്. മുഖ്യമന്ത്രി പിണറായി വിജയനെയും ഉണ്ണികൃഷ്ണന്പോറ്റി കണ്ടു എന്നാണ് എഐസിസി ജനറല്സെക്രട്ടറി കെ.സി.വേണുഗോപാലും സോണിയ ഗാന്ധിയും ന്യായീകരിക്കുന്നത്. ശബരിമലയിലെ സ്വര്ണ കവര്ച്ച 15കൊല്ലത്തിലധികമായി നടന്നുവരുന്നതാണ്. ഉണ്ണികൃഷ്ണന് പോറ്റിയെ പ്രോത്സാഹിപ്പിച്ചത് പിണറായി വിജയന് മാത്രമല്ല, കോണ്ഗ്രസും കോണ്ഗ്രസിന്റെ മുതിര്ന്ന നേതാവ് സോണിയ ഗാന്ധിയും കൂടിയാണ്. എന്താണ് സോണിയ ഗാന്ധിയും കോണ്ഗ്രസും ഉണ്ണികൃഷ്ണന് പോറ്റിയും തമ്മിലുള്ള ബന്ധം. ഈ ചോദ്യത്തിന് സോണിയ ഗാന്ധി ഉത്തരം പറയണമെന്നും രാജീവ് ചന്ദ്രശഖര് ആവശ്യപ്പെട്ടു. ബിജെപി സംസ്ഥാന ജനറല്സെക്രട്ടറി എസ്.സുരേഷും വാര്ത്താ സമ്മേളനത്തില് പങ്കെടുത്തു.
