പാലക്കാട്: തിരുനാവായ മഹാമാഘ ഉത്സവത്തോടനുബന്ധിച്ചുള്ള മഹാമേരു രഥയാത്രാ പ്രയാണം ആരംഭിച്ചു. കാശിയില് പാതി കല്പാത്തിയില് എന്നറിയപ്പെടുന്ന കല്പാത്തിയില് നിന്നാണ് ഇന്നലെ രഥയാത്രാ പ്രയാണം തുടങ്ങിയത്. നൂറുകണക്കിന് വിശ്വാസികളാണ് ഓരോ സ്വീകരണ കേന്ദ്രങ്ങളിലും ദര്ശനത്തിനായി എത്തിയിരുന്നത്. വേദമന്ത്രങ്ങളുടെയും വാദ്യമേളങ്ങളുടെയും, താലപ്പൊലിയുടെയും അകമ്പടിയോടെയായിരുന്നു സ്വീകരണം.
ഇന്നലെ രാവിലെ കല്പാത്തിയില് നിന്നാരംഭിച്ച മഹാമേരു രഥപ്രയാണം മഹാ മണ്ഡലേശ്വര് സ്വാമി പ്രഭാകരാനന്ദ സരസ്വതി ഉദ്ഘാടനം ചെയ്തു. സ്വാമി ജിതാത്മാനന്ദ, പ്രകാശ് മുത്തുസ്വാമി, അയ്യാസ്വാമി, ഡോ. സി. ശ്യാം പ്രസാദ് തുടങ്ങിയവര് പങ്കെടുത്തു.
തുടര്ന്ന് താലപ്പൊലിയുടെ അകമ്പടിയോടെ കല്പാത്തി വിശാലാക്ഷി സമേത വിശ്വനാഥസ്വാമിക്ഷേത്രത്തില് മഹാമേരു എത്തിച്ചു. പൂജകള്ക്ക് ശേഷമാണ് യാത്ര തുടങ്ങിയത്. വടക്കന്തറ തിരുപുരായ്ക്കല് ഭഗവതി ക്ഷേത്രം, യാക്കര വിശ്വേശ്വര ക്ഷേത്രം എന്നിവിടങ്ങളില് രഥയാത്രയെ സ്വീകരിക്കാനായി നൂറുകണക്കിന് ഭക്തരാണ് എത്തിയത്. വടക്കന്തറയില് ക്ഷേത്രം മാനേജിങ് ട്രസ്റ്റി പി. അച്യുതാനന്ദന്, നവീകരണ കലശകമ്മിറ്റി സെക്രട്ടറി പി. കണ്ണന്കുട്ടി, ക്ഷേത്രം മാനേജര് രഘുനാഥ്, അയ്യപ്പഭക്തസംഘം പ്രസിഡന്റ് കെ. ശശിധരന് എന്നിവരുടെ നേതൃത്വത്തില് സ്വീകരണം നല്കി.
വേദമന്ത്രോച്ചാരണത്തോടെയാണ് കൊടുന്തിരപ്പുള്ളി അഗ്രഹാരത്തില് മഹാമേരു രഥയാത്രയെ സ്വീകരിച്ചത്. ഭാരതപ്പുഴയോരത്തുള്ള ആനിക്കോട് അഞ്ചുമൂര്ത്തി ക്ഷേത്രത്തില് പൂര്ണകുംഭത്തോടെയായിരുന്നു സ്വീകരണം. തുടര്ന്ന് മങ്കര അയ്യപ്പസേവാശ്രമം, പാമ്പാടി സോമേശ്വരം, തിരുവില്വാമല എന്നിവിടങ്ങളിലെ സ്വീകരണത്തിന് ശേഷം വൈകിട്ട് കുത്താമ്പുള്ളിയില് സമാപിച്ചു.
ഇന്ന് രാവിലെ 8.30ന് പ്രശസ്തമായ ചിനക്കത്തൂര് ക്ഷേത്രത്തില് നിന്നും പ്രയാണം തുടങ്ങുന്ന രഥയാത്ര വാണിയംകുളം, കുളപ്പുള്ളി പറക്കോട്ട് കാവ്, പട്ടാമ്പി, തൃത്താല പന്നിയൂര്, കുറ്റിപ്പുറം എന്നിവിടങ്ങളിലെ സ്വീകരണത്തിനുശേഷം വൈകിട്ട് തിരുനാവായയില് സമാപിക്കും.
19ന് ഭാരതപ്പുഴയുടെ ഉത്ഭവ സ്ഥാനമായ തമിഴ്നാട് ഉദുമല്പേട്ട തിരുമൂര്ത്തി മലയില് നിന്നാണ് മഹാമേരുവുമായി ഭാരതീയ ധര്മ പ്രചാരസഭ ആചാര്യന് യതീശാനന്ദനാഥന്റെ നേതൃത്വത്തില് രഥയാത്ര ആരംഭിച്ചത്. എന്നാല് സ്വീകരണങ്ങള്ക്ക് തമിഴ്നാട് പോലീസ് അനുമതി നിഷേധിക്കുകയായിരുന്നു. ദേശീയപാതയില് ഗതാഗതക്കുരുക്കിന് സാധ്യതയുണ്ടെന്ന് പറഞ്ഞാണ് അനുമതി നിഷേധിച്ചത്. യാത്രയ്ക്ക് വേണ്ട അനുമതി മുന്കൂട്ടി സംഘാടകര് എടുക്കുകയും, ഫീസ് അടയ്ക്കുകയും ചെയ്തിരുന്നെങ്കിലും പിന്നീട് അനുമതി നല്കിയില്ല. തുടര്ന്ന് ചൊവ്വാഴ്ച കൊല്ലങ്കോട് ചൈതന്യമഹാഗണപതി ക്ഷേത്രത്തിലെത്തിച്ചു. പിന്നീട് നടന്നരഥയാത്ര സത്സംഗത്തില് മഹാമണ്ഡലേശ്വര് ആനന്ദവനം ഭാരതി മഹാരാജ് അനുഗ്രഹ പ്രഭാഷണം നടത്തി.
