തൃശൂര്: 64ാമത് സംസ്ഥാന സ്കൂള് യുവജനോത്സവത്തില് പഹല്ഗാം ഇസ്ലാമിക ഭീകരാക്രമണത്തെ തുറന്നുകാട്ടുന്ന, ഓപ്പറേഷന് സിന്ദൂറിന്റെ സ്പിരിറ്റ് ഉയര്ത്തിപ്പിടിക്കുന്ന സ്റ്റേജ് പ്രകടനവുമായി പാലക്കാട് ജില്ലയിലെ ആലത്തൂരില് നിന്നുള്ള വിദ്യാര്ത്ഥികള്. ആലത്തൂര് ഗുരുകുലം ബിഎസ് എസ് വിദ്യാര്ത്ഥികള് അവതരിപ്പിച്ച സംഘനൃത്തം ഭീകരവാദത്തിനെതിരായ ഭാരതത്തിന്റെ ചെറുത്തുനില്പിന്റെ ഉദാഹരണമായി മാറി. ഇസ്ലാമിക ഭീകരവാദം കൊണ്ട് സിന്ദൂരം മാഞ്ഞുപോയ സ്ത്രീകള്ക്ക് വേണ്ടിയാണ് ഈ സംഘനൃത്തം സമര്പ്പിച്ചതെന്ന് വിദ്യാര്ത്ഥികള് പറയുന്നു.
ഈ സംഘനൃത്തം കണ്ട പ്രേക്ഷകരും കയ്യടിക്കാന് പോലും മറന്നു. കാരണം ഇത് കയ്യടി നേടാനുള്ള പ്രകടനമായിരുന്നില്ല. പാകിസ്ഥാനില് നിന്നുള്ള ഇസ്ലാമിക ഭീകരവാദം എത്രത്തോളം ഭയാനകമാണെന്ന് ഈ സംഘനൃത്തം തുറന്നുകാണിച്ചു.
ഇതിന് തിരിച്ചടിയായി ഇന്ത്യന് സൈന്യം നടത്തിയ ഓപ്പറേഷന് സിന്ദൂര് സ്റ്റേജില് അവതരിപ്പിച്ചപ്പോള് അക്ഷരാര്ത്ഥത്തില് ഏതൊരു ഭാരതീയന്റെയും അഭിമാനം ഉണര്ത്തുന്ന നിമിഷമായിരുന്നു. ശത്രുക്കള്ക്ക് മുന്പില് മുട്ടുകുത്താന് തയ്യാറില്ലാത്ത രാജ്യത്തിന്റെ പ്രതിഷേധാഗ്നി പുതിയ തലമുറ സ്റ്റേജില് അവതരിപ്പിച്ചപ്പോള് അത് യുവതലമുറയെക്കുറിച്ചുള്ള പ്രതീക്ഷയുടെ സന്ദേശമായി.
കഴിഞ്ഞ 12 വര്ഷമായി സ്കൂളുകളുടെ തലത്തില് ഓവറോള് കിരീടം നേടുന്ന സ്കൂളാണ് ആലത്തൂര് ബിഎസ്എസ്. ഇത്തവണയും കിരീടം തങ്ങള്ക്ക് തന്നെയായിരിക്കുമെന്ന് വിദ്യാര്ത്ഥികള് ആണയിട്ട് പറയുന്നു.
