തൃശ്ശൂര്: കലോത്സവത്തില് ആദ്യ ദിനം വാശിയേറിയ പോരാട്ടം. പോയിന്റുനില നിമിഷ നേരങ്ങള്ക്കുള്ളിലാണ് മാറിമറിയുന്നത്. നിലവില് കോഴിക്കോടും (155 പോയിന്റ്) കണ്ണൂരും (155) മുന്നില്. ഇരു ജില്ലകളും ഒപ്പത്തിനൊപ്പം മുന്നേറുകയാണ്. നിലവിലെ ജേതാക്കളായ തൃശൂര് (146) നാലാം സ്ഥാനത്ത്. അഞ്ചാം സ്ഥാനത്ത് കൊല്ലവും (145) പാലക്കാടും (145) ആണ്. ആലപ്പുഴ (143), കാസര്ഗോഡ് (142), എറണാകുളം (141), കോട്ടയം (140), മലപ്പുറം (137), വയനാട് (132), പത്തനംതിട്ട (124), ഇടുക്കി (124) എന്നിവയാണ് തുടര്ന്ന് പോയിന്റ് ക്രമത്തില് വരുന്നത്.
എന്താ ജോമു, ബാബു സാമി, അമ്പാന്… മിമിക്രിയില് ജെന്-സി ട്രെന്ഡ്
സംസ്ഥാന സ്കൂള് കലോത്സവത്തിന്റെ നാലാം വേദിയായ ‘പവിഴമല്ലി’യില് നടന്ന ഹയര് സെക്കന്ഡറി വിഭാഗം മിമിക്രി മത്സരത്തില് നിറഞ്ഞുനിന്നത് ജെന്-സി റഫറന്സുകള്. ഇന്സ്റ്റാഗ്രാം റീലുകളിലും മീമുകളിലും പോപ്പുലറായ ജെന്-സി ട്രെന്ഡുകളും തൃശ്ശൂര് പൂരത്തിന്റെ ആവേശവുമാണ് ഇത്തവണ മിമിക്ര മത്സരങ്ങളില് മുഖ്യമായി അലയടിച്ചത്.
പഴയകാല മിമിക്രി ശൈലികളില് നിന്ന് മാറി, പുതിയ കാലത്തെ സിനിമാ-സോഷ്യല് മീഡിയ കഥാപാത്രങ്ങളെയാണ് മത്സരാര്ത്ഥികള് അധികവും തെരഞ്ഞെടുത്തത്. ഇന്സ്റ്റാഗ്രാം ട്രെന്ഡുകളില് ഇടംപിടിച്ച ‘എന്താ ജോമുവും’ ‘ബാബു സാമി’യും, സിനിമ മീമുകളായ ലാല്, റിയാസ് ഖാന് എന്നിവര്ക്കൊപ്പം ‘ആവേശം’ സിനിമയിലെ അമ്പാന് തുടങ്ങിയ കഥാപാത്രങ്ങളും കാണികളെ ആവേശം കൊള്ളിച്ചു.
ഡിജെ മ്യൂസിക്കിനൊപ്പം ‘ഭീഷ്മപര്വ്വം’, ‘അനിമല്’ തുടങ്ങിയ ചിത്രങ്ങളിലെ പശ്ചാത്തല സംഗീതവും വേദിയില് കൃത്യതയോടെ അനുകരിക്കപ്പെട്ടു. പുത്തന് ട്രെന്ഡുകള്ക്കിടയിലും കോഴി, ട്രെയിന്, പൂച്ച, അമ്മയും കുഞ്ഞും തുടങ്ങിയ സ്ഥിരം മിമിക്രി ഇനങ്ങളും അവതരിപ്പിക്കാന് മത്സരാര്ത്ഥികള് മറന്നില്ല.
മത്സരിച്ച പകുതിയിലേറെ വിദ്യാര്ഥികളും ‘എ’ ഗ്രേഡ് നേടിയാണ് മടങ്ങിയത് എന്നത് മത്സരത്തിന്റെ നിലവാരം വ്യക്തമാക്കുന്നു. എല്കെജി കാലം മുതല് മിമിക്രിയില് കഴിവ് തെളിയിച്ചവരും ആദ്യ അവസരത്തില് തന്നെ സംസ്ഥാന തലത്തിലെത്തിയവരുമാണ് വേദിയില് മാറ്റുരച്ചത്.
തൃശ്ശൂര് പൂരത്തിന്റെ മേളക്കൊഴുപ്പിനൊപ്പം ആധുനിക കാലത്തെ ശബ്ദവിസ്മയങ്ങളും ചേര്ന്നപ്പോള്, ഇത്തവണത്തെ മിമിക്രി വേദി കാണികള്ക്കും വിധികര്ത്താക്കള്ക്കും ഒരുപോലെ പുത്തന് അനുഭവമായി മാറി.
