തൃശൂര്:സംസ്ഥാന സ്കൂള് കലോത്സവത്തില് പങ്കെടുക്കാനെത്തുന്ന കലാപ്രതിഭകള്ക്ക് സ്വാഗതം ഒരുക്കുന്നതിന്റെ ഭാഗമായി ജില്ലയിലെ ഹയര്സെക്കന്ഡറി എന്എസ്എസ് യൂണിറ്റുകള് നടപ്പാക്കുന്ന ‘ചാരെ’ പദ്ധതിയുടെ ഉദ്ഘാടനം മന്ത്രി വി. ശിവന്കുട്ടി നിര്വഹിച്ചു. സ്കൂള് കലോത്സവത്തില് പങ്കെടുക്കാനെത്തുന്ന കലാപ്രതിഭകള്ക്ക് താമസ കേന്ദ്രങ്ങളിലേക്ക് ആവശ്യമായ വസ്തുക്കള് ഹയര്സെക്കന്ഡറി എന്എസ്എസ് യൂണിറ്റുകള് കൈമാറി. ഉപയോഗയോഗ്യമായ സാധനങ്ങള് ജില്ലയിലെ വിവിധ കേന്ദ്രങ്ങളിലെ ആവശ്യക്കാര്ക്ക് സൗജന്യമായി വിതരണം ചെയ്യുകയും, പുനരുപയോഗത്തിന് അനുയോജ്യമല്ലാത്തവ ഹരിതകര്മ്മ സേനയ്ക്ക് കൈമാറുകയും ചെയ്യും. പരിസ്ഥിതി സംരക്ഷണവും സാമൂഹിക ഉത്തരവാദിത്വവും ലക്ഷ്യമിട്ടാണ് പദ്ധതി നടപ്പാക്കുന്നത്. തൃശൂര് ജില്ലയിലെ 13,200 ഹയര്സെക്കന്ഡറി എന്എസ്എസ് വളണ്ടിയര്മാര് ഈ ദൗത്യത്തില് സജീവ പങ്കാളികളാണ്. കലോത്സവ നഗരിയില് ഉത്തരവാദിത്വത്തിന്റെ പുതിയ മാതൃക സൃഷ്ടിക്കുകയാണ് ‘ചാരെ’ പദ്ധതിയിലൂടെ എന്എസ്എസ് വിദ്യാര്ത്ഥികള്.കലോത്സവത്തിന് മുന്നോടിയായി ജില്ലയിലെ നാഷണല് സര്വീസ് സ്കീമിന്റെ നേതൃത്വത്തിലുള്ള ഗ്രീന് വളണ്ടിയേഴ്സ് നഗരത്തിന്റെ ശുചീകരണ പ്രവര്ത്തനങ്ങള്ക്ക് നേതൃത്വം നല്കി. ജില്ലയിലെ 200ലധികം അധ്യാപകര്, കോര്പ്പറേഷന് ഹരിത കര്മ്മ സേന തൊഴിലാളികള്, ശുചിത്വ മിഷന് പ്രവര്ത്തകര് എന്നിവര് ശുചീകരണ പ്രവര്ത്തനങ്ങളില് പങ്കാളികളായി.
മീഡിയ സെന്റര് തുറന്നു
സംസ്ഥാന സ്കൂള് കലോത്സവത്തിന്റെ ഭാഗമായി ഒരുക്കിയ മീഡിയ സെന്ററിന്റെ ഉദ്ഘാടനം മന്ത്രി വി. ശിവന്കുട്ടി നിര്വഹിച്ചു. മന്ത്രി കെ. രാജന് അദ്ധ്യക്ഷത വഹിച്ചു. ഫുട്ബോള് ഇതിഹാസം ഐ.എം വിജയന് മുഖ്യാതിഥിയായി. ജില്ലാ പഞ്ചായത്തിന്റെ ആഭിമുഖ്യത്തില് തയ്യാറാക്കിയ മീഡിയ കിറ്റിന്റെ വിതരണോദ്ഘാടനവും മന്ത്രിമാര് നിര്വഹിച്ചു. തൃശൂര് പ്രസ് ക്ലബ് പ്രസിഡന്റ് എം. ബി ബാബു, സെക്രട്ടറി രഞ്ജിത്ത് ബാലന് എന്നിവര് മീഡിയ കിറ്റ് ഏറ്റുവാങ്ങി.ജില്ലാ പഞ്ചായത്ത് വൈസ് പ്രസിഡന്റും മീഡിയ കമ്മിറ്റി ചെയര്മാനുമായ ടി.കെ സുധീഷ്, ജില്ലാ കളക്ടര് അര്ജുന് പാണ്ഡ്യന്, പൊതുവിദ്യാഭ്യാസ ഡയറക്ടര് എന്.എസ്.കെ. ഉമേഷ്, ജില്ല വിദ്യാഭ്യാസ ഉപഡയറക്ടര് പി എം ബാലകൃഷ്ണന് തുടങ്ങിയവര് പങ്കെടുത്തു.
