പാലക്കാട് : വികസിത ഭാരതമെന്ന പ്രധാനമന്ത്രിയുടെ സ്വപ്നം സാക്ഷാത്കരിക്കാന്‍ സമൂഹത്തിലെ ഓരോരുത്തര്‍ക്കും ചുമതലയുണ്ടെന്ന് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍. ഒരുവര്‍ഷം നീണ്ടുനില്‍ക്കുന്ന കര്‍ണകയമ്മന്‍ ഹയര്‍ സെക്കന്‍ഡറി സ്‌കൂള്‍ വജ്ര ജൂബിലിയാഘോഷം ഉദ്ഘാടനം ചെയ്യുകയായിരുന്നു ഗവര്‍ണര്‍.
ഇക്കാര്യത്തില്‍ യുവതലമുറയ്‌ക്ക് പ്രത്യേകിച്ച് വിദ്യാര്‍ഥികള്‍ക്ക് നിര്‍വഹിക്കാന്‍ കഴിയുന്ന കാര്യങ്ങള്‍ ഏറെയാണ്. ഈ കാഴ്ചപ്പാടില്‍ പങ്കാളികളാവാന്‍ ഓരോരുത്തരും അവനവന് എന്ത് സംഭാവന നല്‍കാന്‍ കഴിയുമെന്ന് ചിന്തിക്കണം. സ്വാതന്ത്യത്തിന്റെ നൂറാം വര്‍ഷത്തില്‍ തീര്‍ച്ചയായും ലോകത്തിന് മാര്‍ഗദര്‍നമേകാന്‍ ഭാരതത്തിന് കഴിയും.
സമഗ്ര വികാസമെന്നാല്‍ കേവലം സാമ്പത്തിക രംഗത്ത് മാത്രമല്ല, മറിച്ച് കല, സംസ്‌കാരം, വിദ്യാഭ്യാസം, വ്യവസായം തുടങ്ങി സമസ്ത രംഗങ്ങളിലും മുന്നോട്ട് പോകാന്‍ കഴിയണം. അതിനാല്‍ നമുക്ക് പുരോഗതി ഉണ്ടാകുന്നതിനോടൊപ്പം സമൂഹത്തിനും രാജ്യത്തിനും പുരോഗതി ഉണ്ടാക്കണം. ഇതിന് നമുക്ക് എന്ത് ചെയ്യാന്‍ കഴിയുമെന്ന് ഓരോരുത്തരും ചിന്തിക്കണമെന്നും ഗവര്‍ണര്‍ ആഹ്വാനം ചെയ്തു. ഈ കാഴ്ചപ്പാടാണ് പ്രധാനമന്ത്രി മുന്നോട്ട് വയ്‌ക്കുന്നത്. ലോകം മുഴുവന്‍ ഭാരതത്തെയാണ് ഉറ്റുനോക്കുന്നത്. അതിനാല്‍ രാജ്യത്തിന്റെ സമഗ്ര വികസനത്തില്‍ ഓരോരുത്തര്‍ക്കും ചെയ്യുവാനുള്ള കാര്യങ്ങള്‍ ഏറെയാണെന്ന് ഗവര്‍ണര്‍ ഓര്‍മിപ്പിച്ചു.
സമൂഹത്തിന്റെയും രാജ്യത്തിന്റെയും പുരോഗതിയ്‌ക്ക് എല്ലാവര്‍ക്കും പ്രധാനപങ്ക് വഹിക്കുവാനുണ്ട്. അതിനാല്‍ വികസിത ഭാരതമെന്ന കാഴ്ചപ്പാട് യാഥാര്‍ത്ഥ്യമാക്കുവാന്‍ നമുക്ക് കഴിയും എന്ന കാര്യത്തില്‍ സംശയമില്ലെന്ന് അദ്ദേഹം പറഞ്ഞു. എഐ അധിഷ്ഠിത പഠനസഹായി ഇന്ററാക്ടീവിന്റെയും സക്ഷമ നടപ്പിലാക്കുന്ന ദിവ്യാംഗമിത്രം പദ്ധതിയുടെ ഉദ്ഘാടനവും ഗവര്‍ണര്‍ നിര്‍വഹിച്ചു. ഗവര്‍ണര്‍ ആദ്യ സംഭാവന നല്‍കിയാണ് ദിവ്യാംഗമിത്രം ഉദ്ഘാടനം ചെയ്തത്.
മാനേജര്‍ കെ.നടരാജന്‍ അധ്യക്ഷത വഹിച്ചു. വൈസ് പ്രസിഡന്റ് കെ.എസ്.കണ്ണന്‍, മുന്‍ മാനേജര്‍ യു.കൈലാസമണി, സെക്രട്ടറി എസ്. ശ്രീനിവാസന്‍, കൗണ്‍സിലര്‍ പി.ബാലന്‍, പി.രാധാകൃഷ്ണന്‍, പ്രധാനാധ്യാപിക കെ.വി.നിഷ, പ്രിന്‍സിപ്പല്‍ കെ.വി.രാജേഷ്, സംസാരിച്ചു. വൈസ് പ്രസിഡന്റ് കെ.എസ്.കണ്ണന്‍, ട്രഷറര്‍ കെ.സേതുമാധവന്‍ എന്നിവര്‍ ട്രസ്റ്റിന്റെ ഉപഹാരം ഗവര്‍ണ
ര്‍ക്ക് നല്‍കി. വിരമിക്കുന്ന അധ്യാപിക സി.പ്രീത ഗവര്‍ണറില്‍ നിന്നും ഉപഹാരം ഏറ്റുവാങ്ങി.
