കോട്ടയം: തന്ത്രിയെ ബലിയാടാക്കിയാല് ആരെയെങ്കിലും രക്ഷപ്പെടുത്താനാകുമെന്നു വിചാരിച്ചു ചെയ്യുന്നതാണോ? കോടതിയും സ്വാമി അയ്യപ്പനും തീരുമാനിക്കട്ടെയെന്ന് കണ്ഠരര് രാജീവരുടെ അറസ്റ്റില് പ്രതികരണവുമായി തന്ത്രി കുടുംബാംഗം രാഹുല് ഈശ്വര്.
ഫേസ്ബുക്ക് കുറിപ്പിന്റെ പൂര്ണ്ണരൂപം:
ജീവിതത്തില് ഇന്നേവരെ ഒരു വിവാദത്തിലും ഉള്പ്പെട്ടിട്ടില്ല. ഒരു കുറ്റവും പഴിയും കേള്പ്പിച്ചിട്ടില്ല. ബഹു. ഹൈക്കോടതിയുടെ 9 ഇടക്കാല വിധിന്യായങ്ങളില് ഒന്നില് പോലും ബ്രഹ്മശ്രീ കണ്ഠരര് രാജീവര് അവര്കളെ കുറിച്ച് ഒരു നെഗറ്റീവ് പരാമര്ശമില്ല. തന്ത്രിക്ക് ഭരണപരമായ കാര്യങ്ങളില് ഒരു ഉത്തരവാദിത്വവും ഇല്ല. വിശ്വാസം, ആചാരപരമായ കാര്യങ്ങളില് മാത്രമാണ് അധികാരം, ഉത്തരവാദിത്വം.
15 ലധികം രാജ്യങ്ങളില് 1000 കണക്കിന് അമ്പലങ്ങളില് പ്രതിഷ്ഠ, പൂജകള് നടത്തിയ, സാക്ഷാല്, ഭഗവാന് പരശുരാമന് ആയിരക്കണക്കിന് വര്ഷങ്ങള്ക്കു മുന്പ് കേരളത്തിലേക്ക് കൊണ്ട് വന്ന 2 ബ്രാഹ്മണ കുടുംബങ്ങളില് ഒന്നാണ് താഴമണ്. ശബരിമല അയ്യപ്പന്റെ പിതൃസ്ഥാനീയര്. അയ്യപ്പന് തന്നെയാണ് ഞാനെന്ന വിശ്വസിക്കും പ്രധാനം, തന്ത്രിയല്ല പക്ഷെ.. കോടതികളുടെ നിലപാട് വന്നതിനു ശേഷം മാത്രം തന്ത്രിയെ കരിവാരിത്തേക്കുക – അദ്ദേഹം ബന്ധു ആയതു കൊണ്ടല്ല, പകരം എല്ലാവര്ക്കും നീതി വേണം എന്നത് കൊണ്ടാണ് ഈ നിലപാട് പറയുന്നത്. (ശ്രീ നമ്പി നാരായണന് അടക്കം എത്രയോ പേരെ കള്ള കേസില് കുടുക്കിയിട്ടുണ്ട്, അവര് മാസങ്ങളോളം ജയിലില് കിടന്നിട്ടുണ്ട്).
അഡ്മിനിസ്ട്രേറ്റീവ് കാര്യങ്ങളിലെ വീഴ്ചക്ക് തന്ത്രിയെ ബലിയാടാക്കി കുടുക്കിയാല് മറ്റു ആരെയെങ്കിലും രക്ഷപ്പെടുത്താനാകുമെന്നു വിചാരിച്ചു ചെയ്യുന്നതാണോ എന്നറിയില്ല. കോടതിയും സ്വാമി അയ്യപ്പനും തീരുമാനിക്കട്ടെ. സ്വാമി ശരണം
