മട്ടാഞ്ചേരി: കടല് സുരക്ഷയ്ക്ക് കരുത്തുപാകി നാവികസേന ശക്തിയാര്ജ്ജിക്കുന്നു. ആത്മ നിര്ഭര് ഭാരത് പദ്ധതിയിലൂടെ ആഗോളതലത്തില് കപ്പല് നിര്മാണത്തിലും കുതിപ്പേകിയാണ് യുദ്ധക്കപ്പലുകള് അത്യാധുനിക സംവിധാനങ്ങളുമായി നാവികസേനയുടെ ഭാഗമാകുന്നത്. ഈ വര്ഷം 19 യുദ്ധക്കപ്പലുകളാണ് നാവികസേനയിലെത്തുക. കഴിഞ്ഞ വര്ഷം അന്തര്വാഹിനിയടക്കം 14 കപ്പലുകളാണ് നാവികസേനയിലെത്തിയത്. ഇതോടെയുദ്ധക്കപ്പലുകളുടെ എണ്ണം 145 ആവും. 2030ല് ഇരുനൂറും 2037ല് ഇരുനൂറ്റിമുപ്പതും യുദ്ധ കപ്പലുകള് എന്നതാണ് നാവിക സേന ലക്ഷ്യമിടുന്നത്.
56 കപ്പലുകള് നിര്മാണ ഘട്ടങ്ങളിലാണ്. പല ഘട്ടങ്ങളിലും വിവിധ പദ്ധതികളിലായി രണ്ടരലക്ഷം കോടിയാണ് കേന്ദ്ര പ്രതിരോധ മന്ത്രാലയം ചെലവഴിക്കുന്നത്.
പുതുതലമുറ ഡിസ്ട്രോയറുകള്, സ്റ്റെല്ത്ത് ഫ്രിഗേറ്റുകള്, അന്തര്വാഹിനികള് തുടങ്ങിയവ നാവിക സേന പടയോട്ടത്തിന് കരുത്തേകും. ഉല്പാദന വേഗത, ആത്മനിര്ഭര് ഭാരത് സന്ദേശം, വികസനം തുടങ്ങിയ നേട്ടങ്ങളുമായാണ് യുദ്ധ കപ്പല് നിര്മാണത്തില് രാജ്യത്തിന് കുതിപ്പേകുന്നത്.
രാജ്യത്തെ നാലു കപ്പല്ശാലകളിലെ യുദ്ധക്കപ്പല് നിര്മാണത്തിലൂടെ ഉല്പാദന ക്ഷമതയില് ഭാരതം വന് കുതിപ്പിലാണ്. കപ്പല് നിര്മാണത്തിന് ഒന്പത് വര്ഷമെന്നത് ആറ് വര്ഷമായി കുറഞ്ഞു. യുദ്ധക്കപ്പല് നിര്മാണം, കമ്മീഷനിങ്, പ്രവര്ത്തനം എന്നിവയിലൂടെ ലക്ഷക്കണക്കിന് തൊഴിലവസരങ്ങളാണ് രാജ്യത്തുണ്ടാകുന്നത്.
ജന്മഭൂമി ഓണ്ലൈന്