നാഗര്കോവില്: ഇന്ത്യയുടെ തെക്കേ അറ്റത്ത് ദേശീയ ചരിത്രത്തിന്റെ അമൂല്യ സ്മരണയായാണ് ഗാന്ധി മണ്ഡപം ഉയര്ന്നു നില്ക്കുന്നത്. മഹാത്മാ ഗാന്ധിയുടെ അഹിംസാ ദര്ശനവും ജീവിത മൂല്യങ്ങളും തലമുറകളിലേക്ക് പകര്ന്നുനല്കുന്ന ഈ സ്മാരകം ദിനംപ്രതി നൂറുകണക്കിന് സന്ദര്ശകരെയാണ് ആകര്ഷിക്കുന്നത്. കന്യാകുമാരി ത്രിവേണിസംഗമക്കരയില് സ്ഥിതി ചെയ്യുന്ന ഗാന്ധി മണ്ഡപം ചരിത്രത്തിന്റെ ഏടുകളില് പതിഞ്ഞതാണ്.
1948 ജനുവരി 30 ന് മഹാത്മാ ഗാന്ധിയുടെ വധശേഷം, അദ്ദേഹത്തിന്റെ ചിതാഭസ്മം സൂക്ഷിച്ച് ഇവിടെ പൊതുജനങ്ങള്ക്ക് ആദരാഞ്ജലി അര്പ്പിക്കാന് വച്ചിരുന്നു. അതിന്റെ സ്മരണയ്ക്കായി 1956 ല് ഒറീസാ വാസ്തുശില്പ ശൈലിയില് ഗാന്ധിമണ്ഡപത്തിന്റെ നിര്മ്മാണം പൂര്ത്തിയാക്കി. ലാളിത്വവും ആത്മീയതയും പ്രതിഫലിപ്പിക്കുന്ന രീതിയിലാണ് രൂപകല്പ്പന ചെയ്തിരിക്കുന്നത്.
ഗാന്ധിജയന്തി ദിനത്തില് സൂര്യകിരണങ്ങള് മണ്ഡപത്തിനുള്ളിലെ പ്രതിമയില് നേരിട്ട് പതിക്കുന്ന തരത്തിലാണ് നിര്മ്മാണം. ഇതിലൂടെ ഗാന്ധിജിയുടെ ജീവിതദര്ശനത്തോടുള്ള ആദരവും പ്രതീകാത്മകതയും ഒരുമിച്ച് പ്രകടമാകുന്നു. രാജ്യത്തിന്റെ വിവിധ ഭാഗങ്ങളില് നിന്നുള്ള വിനോദസഞ്ചാരികളും വിദ്യാര്ത്ഥികളും ഗാന്ധി മണ്ഡപം സന്ദര്ശിച്ച് ഗാന്ധിജിയുടെ അഹിംസാ മാര്ഗവും ദേശീയ സമര ചരിത്രവും ഓര്മ്മിപ്പിക്കുന്ന ഈ സ്മാരകത്തെക്കുറിച്ച് അറിയുന്നു. ഗാന്ധിജിയുടെ ചെറുപ്പകാലം മുതല് വിവിധ സമരങ്ങള്, സന്ദര്ശനങ്ങള്, ദണ്ഡിയാത്ര എന്നിവയുടെ ചിത്രങ്ങള് ഇവിടെ പ്രദര്ശിപ്പിച്ചിണ്ടുണ്ട്.
കന്യാകുമാരിയുടെ കടല് സൗന്ദര്യത്തിനൊപ്പം ദേശീയ ചരിത്രത്തിന്റെ അമൂല്യമായ ഓര്മ്മകള് സൂക്ഷിക്കുന്ന ഗാന്ധി മണ്ഡപം, തലമുറകളിലേക്ക് ഗാന്ധിജിയുടെ സന്ദേശം കൈമാറുന്ന സജീവ സ്മാരകമായി നിലകൊള്ളുന്നു.
ജന്മഭൂമി ഓണ്ലൈന്