കൊല്ലം: വിശക്കുന്നവന്റെ മുന്നില്‍ ധര്‍മ്മമോ ആശയങ്ങളോ പറഞ്ഞിട്ട് കാര്യമില്ല; അവിടെ ആദ്യം വിളമ്പേണ്ടത് അന്നമാണെന്ന പാഠമാണ് നവജ്യോതിശ്രീ കരുണാകരഗുരു വിഭാവനം ചെയ്തതെന്നും സ്നേഹത്തോടെ വിളമ്പുന്ന ആഹാരത്തിന് മനുഷ്യനെ മാറ്റിയെടുക്കാനുള്ള ശേഷിയുണ്ടെന്നും ശാന്തിഗിരി ആശ്രമം ജനറല്‍ സെക്രട്ടറി സ്വാമി ഗുരുരത്നം ജ്ഞാന തപസ്വി.
പോളയത്തോട് ബ്രാഞ്ച് ആശ്രമത്തിന്റെ മൂന്നാം പ്രതിഷ്ഠാവാര്‍ഷിക ദിനത്തോടനുബന്ധിച്ച് ‘സാമൂഹിക ആരോഗ്യവും കുടുംബമൂല്യങ്ങളും’ എന്ന വിഷയത്തില്‍ ശാന്തിഗിരി സോഷ്യല്‍ റിസര്‍ച്ച് ഇന്‍സ്റ്റിറ്റ്യൂട്ടിന്റെ ആഭിമുഖ്യത്തില്‍ ആരംഭിച്ച സത്സംഗ പരമ്പരയുടെ ദേശീയതല ഉദ്ഘാടനം നിര്‍വഹിച്ച് സംസാരിക്കുകയായിരുന്നു സ്വാമി.
ഇന്ന് ലോകം അഭിമുഖീകരിക്കുന്ന പ്രധാന വിഷയം നല്ലൊരു ഭാവിയെക്കുറിച്ചുള്ള ആശങ്കകളാണ്. അതിനായി ശോഭനമായ ആത്മീയ സുരക്ഷിതത്വം അനിവാര്യമാണ്. രക്ഷകര്‍ത്തിത്വം മഹത്തായ ഒരു കലയാണെന്നും അത് നമ്മുടെ വീടുകളില്‍ പ്രായോഗികമായി എങ്ങനെ നടപ്പിലാക്കാമെന്ന് ഓരോരുത്തരും ആലോചിക്കേണ്ടതുണ്ടെന്നും സ്വാമി പറഞ്ഞു.
ശാന്തിഗിരി ആശ്രമം കൊല്ലം ഏരിയ മേധാവി സ്വാമി ജ്യോതിചന്ദ്രന്‍ അദ്ധ്യക്ഷത വഹിച്ച ചടങ്ങില്‍ ജനനി കൃപ, നഗരസഭ കൗണ്‍സിലര്‍ ഡി. കൃഷ്ണകുമാര്‍, ആശ്രമം അഡൈ്വസറി കമ്മിറ്റി പേട്രണ്‍മാരായ ഡോ. കെ. എന്‍. ശ്യാമപ്രസാദ്, റിട്ട. ജില്ലാ ജഡ്ജ് മുരളീ ശ്രീധര്‍, ഡോ. കെ. എന്‍. വിശ്വംഭരന്‍, സുരേഷ് ബാബു ഡി., രമണന്‍ കെ., ശാന്തിഗിരി വിശ്വസാംസ്‌കാരിക നവോത്ഥാന കേന്ദ്രം കൊല്ലം ഏരിയ ഡെപ്യൂട്ടി ജനറല്‍ കണ്‍വീനര്‍ ഡോ. എസ്. പി. സുരേഷ് ബാബു, കരുനാഗപ്പള്ളി ഏരിയ അസിസ്റ്റന്റ് ജനറല്‍ കണ്‍വീനര്‍ രാജന്‍ ആര്‍., ശാന്തിഗിരി മാതൃമണ്ഡലം പബ്ലിക് റിലേഷന്‍സ് ജനറല്‍ കണ്‍വീനര്‍ ഡോ. ആര്‍. സന്ധ്യ, ഡോ. എന്‍. അമ്പിളി, ജി. മോഹന്‍ദാസ്, പ്രദീപ് എം. ശങ്കര്‍, ആര്‍.കെ. പ്രദീപ്, ആര്‍. ഹൃദയവന്ദനന്‍, ആര്‍. വന്ദന എന്നിവര്‍ സംസാരിച്ചു.
കൊല്ലത്ത് തുടക്കമായ സത്സംഗ പരമ്പര വരും ദിവസങ്ങളില്‍ വിവിധ ആത്മീയ, സാമൂഹിക, സാംസ്‌കാരിക സംഘടനകളുമായി സഹകരിച്ച് രാജ്യത്തെ പ്രധാന കേന്ദ്രങ്ങളില്‍ സംഘടിപ്പിക്കും. ഫെബ്രുവരി 22ന് പൂജിതപീഠം സമര്‍പ്പണ ആഘോഷത്തോടനുബന്ധിച്ച് കേന്ദ്രാശ്രമമായ പോത്തന്‍കോട് സത്സംഗം നടക്കും.
