ദുബായ്: മൂന്നാമത് അന്താരാഷ്ട്ര ആയുഷ് കോണ്ഫറന്സും പ്രദര്ശനവും (ഐഎസിഇ) ദുബായ് വേള്ഡ് ട്രേഡ് സെന്ററില് ഫെബ്രുവരി 15 മുതല് 17 വരെ. ആയുര്വേദം, യോഗ, പ്രകൃതിചികിത്സ, യുനാനി, സിദ്ധ, ഹോമിയോപ്പതി എന്നിവയുടെ സവിശേഷതകളെ പരിചയപ്പെടുത്തുന്നതാണ് സമ്മേളനം.
ആയുഷ് മന്ത്രാലയം, ദുബായ് ഇന്ത്യന് കോണ്സുലേറ്റ് എന്നിവയുടെ ആഭിമുഖ്യത്തില് സയന്സ് ഇന്ത്യ ഫോറവും വേള്ഡ് ആയുര്വേദ ഫൗണ്ടേഷനും ചേര്ന്ന്, എവിഡന്സ് ബേസ്ഡ് ആയുഷ് ഇന്റര്വെന്ഷന്സ് ഇന് മൈന്ഡ്-ബോഡി ഹെല്ത്ത് എന്ന പ്രമേയത്തിലാണ് സമ്മേളനം സംഘടിപ്പിക്കുന്നത്. ഭാരതത്തില് നിന്നുള്ള ആയുര്വേദ, യോഗ, പ്രകൃതിചികിത്സ, യുനാനി, സിദ്ധ, ഹോമിയോ ചികിത്സാ മേഖലകളില് നിന്നുള്ള പ്രമുഖരും ആരോഗ്യവിദഗ്ദരും 35 ലേറെ രാജ്യങ്ങളില്നിന്നുള്ള 1200ലേറെ പ്രതിനിധികളും സമ്മേളനത്തിനെത്തും. ആയുഷ് സമ്പ്രദായത്തെക്കുറിച്ചുള്ള ഷോര്ട്ട് ഫിലിം ഫെസ്റ്റിവലും നടക്കും.
ആയുഷ് ഗവേഷണം, വിദ്യാഭ്യാസം, ഗ്രീന് മെഡിസിന് എന്നീ മേഖലകളില് ഭാരതവും യുഎഇയും തമ്മിലുള്ള സഹകരണത്തിന്റെ സാധ്യതകള് ഉള്പ്പെടെ സമ്മേളനത്തില് പരിശോധിക്കുമെന്ന് ദുബായ് ഇന്ത്യന് കോണ്സല് ജനറല് സതീഷ് കുമാര് ശിവന് വാര്ത്താസമ്മേളനത്തില് അറിയിച്ചു. ആയുഷ് ഉത്പന്നങ്ങളുടെയും സേവനങ്ങളുടെയും നിക്ഷേപത്തെയും വ്യാപാരത്തെയും പ്രോത്സാഹിപ്പിക്കുകയും സമ്മേളനത്തിന്റെയും പ്രദര്ശനത്തിന്റെയും ലക്ഷ്യമാണ്. ഗ്ലോബല് ഹോമിയോപ്പതിക് ഫൗണ്ടേഷന്, എമിറേറ്റ്സ് ആയുര്വേദ ഗ്രാജുവേറ്റ്സ് അസോസിയേഷന് തുടങ്ങിയ നിരവധി സംഘടനകളും സമ്മേളനത്തില് പങ്കാളികളാകും.
വിജ്ഞാന് ഭാരതി സെക്രട്ടറി ജനറല് വിവേകാനന്ദ പൈ, സയന്സ് ഇന്ത്യ ഫോറം രക്ഷാധികാരി സിദ്ധാര്ത്ഥ് ബാലചന്ദ്രന്, പ്രസിഡന്റ് ഡോ. സതീഷ് കൃഷ്ണന്, സംഘാടകസമിതി ചെയര്മാന് ഡോ. ഇസ എം. ബസ്താകി, ഐഎസിഇ സെക്രട്ടറി ജനറല് ഡോ.വി.എല്. ശ്യാം, യുഎഇ യോഗാ കമ്മിറ്റി പ്രസിഡന്റ് അഹ്മദ് ഇബ്രാഹിം മുസാബിഹ്, വേള്ഡ് ആയുര്വേദ ഫൗണ്ടേഷന് ട്രസ്റ്റി ചന്ദ്രശേഖരന് നായര് തുടങ്ങിയവര് വാര്ത്താസമ്മേളനത്തില് പങ്കെടുത്തു.
