ന്യൂദല്ഹി: മുംബൈ- അഹമ്മദാബാദ് ഹൈസ്പീഡ് റെയില് (എംഎഎച്ച്എസ്ആര്) പദ്ധതിയില് നിര്ണായക മുന്നേറ്റം. മഹാരാഷ്ട്രയിലെ പാല്ഘറില് ആദ്യ പര്വതതുരങ്കം (മൗണ്ടന് ടണല് അഞ്ച്) പൂര്ത്തിയായി. ഇതോടെ ബുള്ളറ്റ് ട്രെയിന് പദ്ധതി സുപ്രധാന നാഴികക്കല്ല് പിന്നിട്ടതായി കേന്ദ്ര റെയില്വേ മന്ത്രി അശ്വിനി വൈഷ്ണവ് അറിയിച്ചു.
റെയില്ഭവനില് നടത്തിയ വാര്ത്താസമ്മേളനത്തില് വീഡിയോ കോണ്ഫറന്സിലൂടെ തുരങ്കത്തിന്റെ അവസാനഭാഗം തുരക്കുന്നതും അദ്ദേഹം മാധ്യമങ്ങള്ക്ക് മുമ്പാകെ പ്രദര്ശിപ്പിച്ചു. ഭാരത് മാതാ കീ ജയ് വിളികളോടെയാണ് കേന്ദ്രമന്ത്രിയും നിര്മാണസ്ഥലത്തെ തൊഴിലാളികളും ഉദ്യോഗസ്ഥരും സന്തോഷം പങ്കിട്ടത്.
യാത്രാസമയം കുറയും
പദ്ധതി പൂര്ത്തിയാകുന്നതോടെ മുംബൈയ്ക്കും അഹമ്മദാബാദിനും ഇടയിലുള്ള യാത്രാസമയം ഒരു മണിക്കൂര് 58 മിനിറ്റായി കുറയും. താനെയ്ക്കും അഹമ്മദാബാദിനുമിടയിലുള്ള മുഴുവന് അലൈന്മെന്റും ഇതോടെ പൂര്ത്തിയാക്കിയതായി അദ്ദേഹം പറഞ്ഞു. വിരാര്- ബോയ്സര് ബുള്ളറ്റ് ട്രെയിന് സ്റ്റേഷനുകള്ക്കിടയില് സ്ഥിതിചെയ്യുന്ന മൗണ്ടന് ടണല് അഞ്ച് തുരങ്കത്തിന് ഏകദേശം 1.5 കിലോമീറ്റര് നീളമുണ്ട്. ജില്ലയിലെ ഏറ്റവും നീളം കൂടിയ പര്വത തുരങ്കമാണിത്. തുരങ്കത്തിന്റെ രണ്ടറ്റത്തുനിന്നും തുരന്നെടുത്തു. അത്യാധുനിക ഡ്രില് ആന്ഡ് ബ്ലാസ്റ്റ് രീതി ഉപയോഗിച്ച് 18 മാസത്തിനുള്ളില് തുരക്കല് പൂര്ത്തിയാക്കി. ഖനന സമയത്ത് നിലത്തിന്റെ സ്വഭാവം തത്സമയം നിരീക്ഷിക്കാന് സാധിക്കുന്ന രീതിയാണ് അവലംബിച്ചത്.
താനെയ്ക്കും ബികെസിക്കും ഇടയിലുള്ള ഏകദേശം അഞ്ച് കിലോമീറ്റര് ദൈര്ഘ്യമുള്ള ആദ്യ ഭൂഗര്ഭ തുരങ്കം കഴിഞ്ഞ സപ്തംബറില് പൂര്ത്തിയായിരുന്നു. മുംബൈ- അഹമ്മദാബാദ് ഹൈസ്പീഡ് റെയില് പദ്ധതിയുടെ ആകെ നീളം 508 കിലോമീറ്ററാണ്. തുരങ്കങ്ങളുടെ നീളം 27.4 കിലോമീറ്ററാണ്. ഏഴ് പര്വത തുരങ്കങ്ങളും കടലിനടിയിലെ ഒരു തുരങ്കവും ഉള്പ്പെടുന്നു. മറ്റ് പര്വത തുരങ്കങ്ങളുടെ നിര്മാണം പുരോഗമിക്കുകയാണ്.
12 സ്റ്റേഷനുകളും മൂന്ന് ഡിപ്പോകളും
മുംബൈ- അഹമ്മദാബാദ് ബുള്ളറ്റ് ട്രെയിന് പദ്ധതിയില് 12 സ്റ്റേഷനുകളും മൂന്ന് ഡിപ്പോകളും ഉണ്ടാകും. 508 കിലോമീറ്റര് ദൈര്ഘ്യമുള്ള ഒരു ഇടനാഴിക്ക് സാധാരണയായി രണ്ട് ഡിപ്പോകള് മതി. എന്നാല് അന്നത്തെ മഹാരാഷ്ട്ര സര്ക്കാര് അനുമതി നല്കുന്നത് വൈകിപ്പിച്ചതിനാല് മൂന്ന് ഡിപ്പോകള് ആസൂത്രണം ചെയ്യേണ്ടി വന്നു. ഈ കാലതാമസം കൂടുതല് ക്രമീകരണങ്ങള് ഒരുക്കാന് വഴിവെച്ചു. ഭാരതത്തിലെ ആദ്യ ബുള്ളറ്റ് ട്രെയിന് 2027 ആഗസ്ത് 15ന് സര്വീസ് ആരംഭിക്കുമെന്ന് അശ്വിനി വൈഷ്ണവ് വ്യാഴാഴ്ച പ്രഖ്യാപിച്ചിരുന്നു.
