സി.കെ. പത്മനാഭന്
ഏറ്റവും അടുത്ത സഹപ്രവര്ത്തകനെന്നതിനപ്പുറം സഹോദരതുല്ല്യനായിരുന്നു പി.സി. മോഹനന് മാസ്റ്റര്. വയനാട്ടില് ജനസംഘത്തിന് ശക്തമായ അടിത്തറയുണ്ടാക്കിയ ആദ്യകാലത്തെ നേതാക്കളില് ഒരാളാണ് അദ്ദേഹം. 1972ല് വയനാട്ടില് ജനസംഘത്തിന്റെ വയനാട് മേഖലാ സംഘടനാ സെക്രട്ടറിയായിരുന്ന സമയത്താണ് മോഹനന് മാസ്റ്ററെ ആദ്യമായി പരിചയപ്പെട്ടത്. അവസാന കാലം വരെ ഊഷ്മളമായ ബന്ധം നിലനിന്നു. 1975 വരെയാണ് അവിടെ പ്രവര്ത്തിച്ചത്.
വയനാട്ടില് വലിയ സ്വാധീനമുള്ള കുടുംബമാണ് മോഹനന് മാസ്റ്ററുടേത്. അദ്ദേഹത്തിന്റെ അച്ഛന് അധികാരിയായിരുന്നു. കോളിയാടിയിലായിരുന്നു അദ്ദേഹം താമസിച്ചിരുന്നത്. എല്ലാ പ്രവര്ത്തനത്തിനും മോഹനന് മാസ്റ്റര് കൂടെയുണ്ടായിരുന്നു. സംഘടന കെട്ടിപ്പടുക്കുന്ന ആദ്യകാലത്ത് അദ്ദേഹത്തിന്റെ കുടുംബം വലിയ സഹായമാണ് ചെയ്തത്. സംഘടനാ പ്രവര്ത്തനത്തില് കഷ്ടപ്പെട്ട സമയത്തൊക്കെ അദ്ദേഹത്തിന്റെ കുടുംബത്തില് നിന്ന് വലിയ സഹായമാണ് ലഭിച്ചത്.
പിന്നീട് ബിജെപിയുടെ പ്രവര്ത്തനത്തിലും അദ്ദേഹം സജീവമായിരുന്നു. എല്ലാ പ്രവര്ത്തനത്തിലും മോഹനന് മാസ്റ്റര് കൂടെ നിന്നു. സംസ്ഥാന പ്രസിഡന്റായിരുന്ന സമയത്ത് മോഹനന് മാസ്റ്റര് സംസ്ഥാന ജനറല് സെക്രട്ടറിയെന്ന ചുമതലയില് കൂടെയുണ്ടായിരുന്നു. ആറ് വര്ഷത്തോളം സംസ്ഥാന ഭാരവാഹിയായി കൂടെയുണ്ടായിരുന്നു.
ഏത് കാര്യത്തിനും എവിടെ പോകണമെന്നാവശ്യപ്പെട്ടാലും അദ്ദേഹം അവിടെ ഓടിയെത്തുമായിരുന്നു. നിര്ദ്ദേശിക്കപ്പെട്ട സ്ഥലത്തെത്തി പരിപാടിയില് പങ്കെടുത്ത് കൃത്യമായി കാര്യങ്ങള് ചെയ്തതിനുശേഷം മാത്രമേ അദ്ദേഹം പരിപാടി സ്ഥലത്ത് നിന്ന് പോകൂ. പ്രമേയങ്ങള് തയാറാക്കുന്നതിനും അവതരിപ്പിക്കുന്നതിനും അദ്ദേഹത്തിന് പ്രത്യേക വൈദഗ്ദ്യമുണ്ടായിരുന്നു. ഇത് എടുത്ത് പറയേണ്ട അദ്ദേഹത്തിന്റെ കഴിവാണ്. കൃത്യമായി വിഷയങ്ങള് പഠിച്ച് എല്ലാ വശങ്ങളും പരിശോധിച്ചശേഷമാണ് പ്രമേയങ്ങള് തയാറാക്കിയിരുന്നത്. സ്വന്തം നിലയില് പഠിച്ച് ബിരുദമെടുത്ത അദ്ദേഹം പരന്ന വായനയുടെ ഉടമയുമായിരുന്നു. പാര്ട്ടിയുടെ അടിത്തട്ടിലുള്ള പ്രവര്ത്തനത്തിലാണ് അദ്ദേഹം മികവ് കാണിച്ചത്.
