ന്യൂദൽഹി: ഭാരതത്തിന് 2025 പരിഷ്‌കരണങ്ങളുടെ എക്‌സ്പ്രസ് യാത്രകളുടെ തുടക്കമായിരുന്നുവെന്നും വരാനിരിക്കുന്നത് മികച്ച നാളുകളാണെന്നും പ്രധാനമന്ത്രി നരേന്ദ്ര മോദി. എക്‌സിൽ, വർഷാന്തത്തിലെ കണക്കെടുപ്പും വിലയിരുത്തലും പോലെ നടത്തിയ കുറിപ്പിലാണ് ഈ പരാമർശം.
2025 ഭാരതത്തിന് ഒരു നാഴികക്കല്ലായ വർഷമാണ്. നികുതി, തൊഴിൽ, വ്യാപാരം, ഊർജ്ജം, വിദ്യാഭ്യാസം, ഗ്രാമീണ തൊഴിൽ എന്നിവയിലുടനീളം നിരവധി പരിഷ്‌കരണങ്ങളിലൂടെ രാജ്യം ‘റിഫോം എക്‌സ്പ്രസിൽ’ എത്തിയിരിക്കുന്നു എന്ന് അദ്ദേഹം പറഞ്ഞു.
‘ഭാരതം റിഫോം എക്‌സ്പ്രസിൽ എത്തി! നമ്മുടെ വളർച്ചാ യാത്രയ്‌ക്ക് ആക്കം കൂട്ടിയ വിവിധ മേഖലകളിലുടനീളമുള്ള വിപ്ലവകരമായ പരിഷ്‌കാരങ്ങൾക്ക് 2025 സാക്ഷ്യം വഹിച്ചു. ഒരു വികസിത ഭാരതം കെട്ടിപ്പടുക്കുന്നതിനുള്ള നമ്മുടെ ശ്രമങ്ങളും അവ ശക്തമാക്കും.’
ലിങ്ക്ഡ് ഇന്നിലെ വിശദമായ ഒരു പോസ്റ്റിൽ, കഴിഞ്ഞ 11 വർഷത്തെ പുരോഗതിയെ അടിസ്ഥാനമാക്കി തുടർച്ചയായ ദേശീയ ദൗത്യമായി പരിഷ്‌കരണങ്ങൾ പിന്തുടർന്നുവെന്ന് പ്രധാനമന്ത്രി വിശദീകരിച്ചു. ‘ഞങ്ങൾ സ്ഥാപനങ്ങളെ നവീകരിച്ചു, ഭരണം ലളിതമാക്കി, ദീർഘകാലത്തേക്കുള്ളതും എല്ലാവരെയും ഉൾക്കൊള്ളുന്ന വളർച്ചയ്‌ക്കുള്ളതുമായ അടിത്തറ ശക്തിപ്പെടുത്തി,’ അദ്ദേഹം എഴുതി.
പ്രധാന നികുതി, ബിസിനസ് പരിഷ്‌കരണങ്ങൾ
ഗുഡ്‌സ് ആൻഡ് സർവീസസ് ടാക്‌സിൽ (ജിഎസ്ടി) വരുത്തിയ മാറ്റങ്ങൾ, തർക്കങ്ങൾ കുറയ്‌ക്കുന്നതിനും നടപടികൾ മെച്ചപ്പെടുത്തുന്നതിനുമായി 5%, 18% എന്നിങ്ങനെ ലളിതമായ രണ്ട് സ്ലാബ് ഘടന അവതരിപ്പിച്ചത് എന്നിവ പ്രധാനമന്ത്രി എടുത്തുകാട്ടി.
- വാർഷിക വരുമാനം 12 ലക്ഷം രൂപ വരെയുള്ള വ്യക്തികൾക്ക് ആദായനികുതി ഇല്ലാതാക്കിയത് മധ്യവർഗ നികുതിദായകർക്ക് ആശ്വാസമായി, അതേസമയം 1961 ലെ കാലഹരണപ്പെട്ട ആദായനികുതി നിയമത്യതിനു പകരം 2025 ലെ ആദായനികുതി നിയമം നടപ്പിലാക്കി.
- ചെറുകിട കമ്പനികളുടെ നിർവചനം 100 കോടി രൂപ വരെ വിറ്റുവരവുള്ള സ്ഥാപനങ്ങളെ ഉൾപ്പെടുത്തി വികസിപ്പിച്ചതിനാൽ ചെറുകിട, ഇടത്തരം ബിസിനസുകൾക്കും നേട്ടമുണ്ടായി, ഇത് നടപടികൾ ലഘൂകരിക്കുകയും ചെലവ് കുറയ്‌ക്കുകയും ചെയ്തു.
സാമ്പത്തിക, ഇൻഷുറൻസ് മേഖല പരിഷ്‌കാരങ്ങൾ
- മത്സരം വർദ്ധിപ്പിക്കുന്നതിനും സേവനങ്ങൾ മെച്ചപ്പെടുത്തുന്നതിനും ലക്ഷ്യമിട്ട് സർക്കാർ ഇൻഷുറൻസിൽ 100% വിദേശ നേരിട്ടുള്ള നിക്ഷേപം അനുവദിച്ചു. മൂലധന വിപണികളിൽ, നിക്ഷേപകരുടെ സംരക്ഷണം ശക്തിപ്പെടുത്തുന്നതിനും ഭരണം മെച്ചപ്പെടുത്തുന്നതിനും സാങ്കേതികവിദ്യാധിഷ്ഠിത സംവിധാനങ്ങളിലൂടെ അനുസരണം ലളിതമാക്കുന്നതിനുമായി സെക്യൂരിറ്റീസ് മാർക്കറ്റ് കോഡ് ബിൽ അവതരിപ്പിച്ചു.
- അഞ്ച് പുതിയ സമുദ്ര നിയമങ്ങൾ പാസാക്കി, ലോജിസ്റ്റിക്‌സ് നവീകരിക്കുകയും ചെലവ് കുറയ്‌ക്കുകയും ചെയ്തു. ജൻ വിശ്വാസ് സംരംഭത്തിന് കീഴിൽ, അനാവശ്യമായ ക്രിമിനലൈസേഷൻ ഇല്ലാതാക്കുന്നതിനായി കാലഹരണപ്പെട്ട 71 നിയമങ്ങൾ റദ്ദാക്കി. – തൊഴിൽ പരിഷ്‌കാരങ്ങളിൽ 29 കാലഹരണപ്പെട്ട നിയമങ്ങളെ സാമൂഹിക സുരക്ഷ വികസിപ്പിക്കുക, തൊഴിലാളികളുടെ അവകാശങ്ങൾ സംരക്ഷിക്കുക, സ്ത്രീ തൊഴിൽ ശക്തി പങ്കാളിത്തം പ്രോത്സാഹിപ്പിക്കുക എന്നിവയിലൂടെ നാല് ആധുനിക തൊഴിൽ കോഡുകളായി ലയിപ്പിച്ചു.
ആഗോള വ്യാപാര, ഊർജ്ജ സംരംഭങ്ങൾ
- ന്യൂസിലാൻഡ്, ഒമാൻ, ബ്രിട്ടൻ എന്നിവയുമായി ഭാരതം വ്യാപാര കരാറുകളിൽ ഒപ്പുവച്ചു.
- – യൂറോപ്യൻ ഫ്രീ ട്രേഡ് അസോസിയേഷനുമായി ഒരു എഫ്ടിഎ നടപ്പിലാക്കി, വിപണി പ്രവേശനവും നിക്ഷേപ അവസരങ്ങളും വർദ്ധിപ്പിച്ചു.
- – ആണവോർജ്ജം ഉത്തരവാദിത്വത്തോടെ വികസിപ്പിക്കുന്നതിനും സ്വകാര്യ പങ്കാളിത്തം പ്രോത്സാഹിപ്പിക്കുന്നതിനും രാജ്യത്തിന്റെ വർദ്ധിച്ചുവരുന്ന ശുദ്ധമായ ഊർജ്ജ ആവശ്യങ്ങൾ നിറവേറ്റുന്നതിനുമാണ് ശാന്തി നിയമം അവതരിപ്പിച്ചത്.
ഗ്രാമീണ തൊഴിൽ, വിദ്യാഭ്യാസ പുനരുദ്ധാരണം
- ഗ്രാമ അടിസ്ഥാന സൗകര്യങ്ങളും ഉപജീവനമാർഗ്ഗങ്ങളും ശക്തിപ്പെടുത്തുന്നതിനായി 2025 ലെ ജി റാം ജി ആക്ടിന് കീഴിലുള്ള ഗ്രാമീണ തൊഴിൽ ഗ്യാരണ്ടികൾ 100 ൽ നിന്ന് 125 ദിവസമായി ഉയർത്തി.
- വിദ്യാഭ്യാസത്തിൽ, യുജിസി, എഐസിടിഇ, എൻസിടിഇ തുടങ്ങിയ ഒന്നിലധികം സ്ഥാപനങ്ങൾക്ക് പകരം സ്ഥാപന സ്വയംഭരണം, ഗവേഷണം, നവീകരണം എന്നിവ വർദ്ധിപ്പിക്കുന്നതിന് ഒരൊറ്റ ഉന്നത വിദ്യാഭ്യാസ റെഗുലേറ്റർ ആസൂത്രണം ചെയ്തിട്ടുണ്ട്.
പരിഷ്‌കരണങ്ങൾക്ക് പിന്നിലെ കാഴ്ചപ്പാട് വ്യക്തമാക്കി പ്രധാനമന്ത്രി മോദി ഇങ്ങനെ പറഞ്ഞു, ”ചെറുകിട ബിസിനസുകൾ, യുവ പ്രൊഫഷണലുകൾ, കർഷകർ, തൊഴിലാളികൾ, മധ്യവർഗം എന്നിവരുടെ യാഥാർത്ഥ്യങ്ങൾ തിരിച്ചറിഞ്ഞുകൊണ്ട്, സഹാനുഭൂതിയോടെയാണ് ഈ പരിഷ്‌കാരങ്ങൾ രൂപകൽപ്പന ചെയ്തിരിക്കുന്നത്… നിയന്ത്രണാധിഷ്ഠിത സമ്പദ്വ്യവസ്ഥയിൽ നിന്ന് വിശ്വാസത്തിന്റെ ചട്ടക്കൂടിനുള്ളിൽ പ്രവർത്തിക്കുന്ന ഒന്നിലേക്ക് മാറാനും പൗരനെ അതിന്റെ കാതലായി നിലനിർത്താനുമുള്ള ഞങ്ങളുടെ ദശാബ്ദക്കാലത്തെ ശ്രമങ്ങൾക്ക് അവ ആക്കം കൂട്ടുന്നു.”’
