തിരുവനന്തപുരം: തിരുവനന്തപുരം കോര്പ്പറേഷന് കെട്ടിടങ്ങളുടെ വാടകക്കൊള്ള സംബന്ധിച്ച് പുറത്തുവന്നതിനു പിന്നാലെ വട്ടിയൂര്ക്കാവ് എംഎല്എ വി.കെ. പ്രശാന്ത് നേതൃത്വം നല്കുന്ന വട്ടിയൂര്ക്കാവ് യൂത്ത് ബ്രിഗേഡ് കോ ഓപ്പറേറ്റീവ് സൊസൈറ്റി പ്രവര്ത്തനവും വിവാദത്തില്.
എംഎല്എ ഓഫീസാണ് വട്ടിയൂര്ക്കാവ് യൂത്ത് ബ്രിഗേഡിന്റെ ഓഫീസായി പ്രവര്ത്തിക്കുന്നതെന്ന ആരോപണവും ഉയര്ന്നിട്ടുണ്ട്.
ഈ സംഘത്തിന്റെ പ്രസിഡന്റ്, വി.കെ. പ്രശാന്ത് എംഎല്എയുടെ സ്റ്റാഫിലുണ്ട്. ഇയാള് എംഎല്എ ഓഫീസില് ഫയലുകള്ക്ക് മുന്നില് ഇരിക്കുന്നതിന്റെ ചിത്രങ്ങള് പുറത്തുവന്നിട്ടുണ്ട്. ഈ സംഘടനയാണ് ആക്കുളം ടൂറിസ്റ്റ് വില്ലേജില് ഗ്ലാസ് ബ്രിഡ്ജ് നിര്മാണക്കരാര് ഏറ്റെടുത്തിരിക്കുന്നത്. എംഎല്എയുടെ സ്റ്റാഫിലുള്ള ആള് നേതൃത്വം നല്കുന്ന സൊസൈറ്റി എങ്ങനെ സര്ക്കാരിന്റെ കരാര് ഏറ്റെടുക്കുമെന്ന ചോദ്യവും ഉയര്ന്നിട്ടുണ്ട്.
അതേസമയം എംഎല്എ ഹോസ്റ്റിലിലെ നിള ബ്ലോക്കിലെ 31,32 മുറികള് വി.കെ.പ്രശാന്തിന് അനുവദിച്ചിട്ടുള്ളതാണ്. എല്ലാ സൗകര്യവുമുള്ള മുറി ഓഫീസായി ഉപയോഗിക്കാവുന്നതുമാണ്. കെ.മുരളീധരന് വട്ടിയൂര്ക്കാവ് എംഎല്എ ആയിരുന്നപ്പോഴും എംഎല്എ ഹോസ്റ്റലില് ആയിരുന്നു മുറി. ഇപ്പോള് വി.കെ. പ്രശാന്തിന്റെ മുറികള് എന്തിനാണ് ഉപയോഗിക്കുന്നതെന്ന ചോദ്യവും ഉയര്ന്നിട്ടുണ്ട്.
ഉള്ളൂര് ഇളംകാവില് ക്ഷേത്രത്തിന് മുന്വശത്തെ കോര്പ്പറേഷന് കോംപ്ലക്സില് സിപിഎം നേതൃത്വത്തിലുള്ള ഇ.കെ. നായനാര് ചാരിറ്റബിള് ട്രസ്റ്റ് ഒരുനില മുഴുവന് പ്രവര്ത്തിക്കുകയാണ്. ഇവിടെ അനാശാസ്യ പ്രവര്ത്തനങ്ങള് ഉള്പ്പെടെ നടക്കുന്നുണ്ടെന്ന് ആക്ഷേപമുണ്ട്. വി.കെ. പ്രശാന്ത് എംഎല്എ വാടകയായി കോര്പ്പറേഷന് നല്കുന്നത് മാസം 872 രൂപയാണ്. സമാനമായി കുറഞ്ഞ റേറ്റിലാണ് വാടകയ്ക്ക് കോര്പ്പറേഷന്റെ കെട്ടിടങ്ങള് നല്കിയിരിക്കുന്നതെന്നാണ് വിവരം. കോര്പ്പറേഷന് കെട്ടിടങ്ങള് ഭൂരിഭാഗവും സിപിഎം പോഷക സംഘടനകള്ക്കും സിപിഎം നേതാക്കള്ക്കുമാണ് തുച്ഛമായ തുകയ്ക്ക് വാടകയ്ക്ക് നല്കിയിരിക്കുന്നത്.
