ന്യൂദല്ഹി:ഉത്തരേന്ത്യയിലെ ചെറിയ സംഭവങ്ങളെ മാധ്യമങ്ങള് പെരുപ്പിച്ചു കാട്ടുന്നുവെന്ന് കേന്ദ്രമന്ത്രി ജോര്ജ് കുര്യന്. ഇത്തരം സംഭവങ്ങളില് എല്ലാം കേസെടുത്തിട്ടുണ്ട്.
എന്നാല് കേരളത്തില് ക്രൈസ്തവര്ക്കെതിരായ ആക്രമണങ്ങള്
മാധ്യമങ്ങള് വാര്ത്തയാക്കുന്നില്ലെന്നും മന്ത്രി കുറ്റപ്പെടുത്തി.കേരളത്തില് ആക്രമിക്കപ്പെട്ടവര്ക്ക് എതിരെയാണ് കേസെടുക്കുന്നതെന്നും അദ്ദേഹം പറഞ്ഞു.
തിരുവനന്തപുരം ശാസ്തമംഗലം കൗണ്സിലര് ആര് ശ്രീലേഖ വട്ടിയൂര്ക്കാവ് എംഎല്എ വി കെ പ്രശാന്തിനോട് ശാസ്തമംഗലത്തെ എംഎല്എ ഓഫീസ് ഒഴിയണമെന്ന് ആവശ്യപ്പെട്ടത് സംബന്ധിച്ച്, മാധ്യമങ്ങള് സ്ത്രീവിരുദ്ധമായിട്ടാണ് സംസാരിച്ചതെന്ന് ജോര്ജ് കുര്യന് പറഞ്ഞു.കോര്പ്പറേഷന് കെട്ടിടത്തിലെ എം എല് എയുടെ മുറിയിലൂടെ വനിതാ കൗണ്സിലറുടെ മുറിയിലേക്ക് പോകണം എന്നതിനെ പിന്തുണയ്ക്കാന് പറ്റില്ല. സ്ത്രീകളെ ബഹുമാനിക്കുന്ന സമൂഹത്തില് സ്ത്രീകള്ക്കെതിരെ പറയാതിരിക്കുന്നതാണ് നല്ലതെന്നും മന്ത്രി പറഞ്ഞു.
മുനമ്പത്ത് ജനങ്ങള്ക്കെതിരെ നിന്നവരാണ് കേരളത്തിലെ മാധ്യമങ്ങള്.മാധ്യമങ്ങളെ എതിര്ക്കേണ്ട സമയത്ത് എതിര്ക്കും. മാധ്യമങ്ങള്ക്ക് ഇഷ്ടപ്പെടുന്ന പോലെ മറുപടി പറയാന് പറ്റില്ലെന്നും ജോര്ജ് കുര്യന് പറഞ്ഞു.
