തിരുവനന്തപുരം: ബിപിഎല് വിഭാഗത്തില്പ്പെടുന്ന ഉപഭോക്താക്കള്ക്ക് കേരള വാട്ടര് അതോറിറ്റി നല്കുന്ന സൗജന്യ കുടിവെള്ള ആനുകൂല്യം ലഭിക്കുന്നതിനുള്ള അപേക്ഷകള് ജനുവരി ഒന്നു മുതല് 31 വരെ സമര്പ്പിക്കാം. പ്രതിമാസം 15 കിലോലിറ്റര് (15,000 ലിറ്റര്) വരെ മാത്രം ജല ഉപഭോഗമുള്ള, ബിപിഎല് വിഭാഗത്തില്പ്പെടുന്നവര്ക്കാണ് ആനുകൂല്യം. 2026ല് ബിപിഎല് ആനുകൂല്യം ലഭിക്കുന്നതിനായി, നിലവില് ആനുകൂല്യം ലഭിച്ചുകൊണ്ടിരിക്കുന്നവരും പുതുതായി ആനുകൂല്യം ആവശ്യമുള്ളവരും അപേക്ഷകള് 2026 ജനുവരി 31ന് മുന്പ് http://bplapp.kwa.kerala.gov.in എന്ന ഓണ്ലൈന് പോര്ട്ടല് വഴി നല്കണം.
ഉപഭോക്താക്കളുടെ ഇ അബാക്കസ് വിവരങ്ങള് സിവില് സപ്ലൈസ് വെബ്സൈറ്റിലെ റേഷന് കാര്ഡ് വിവരങ്ങളുമായി താരതമ്യം ചെയ്ത ശേഷം അര്ഹതയുള്ളവര്ക്ക് ആനുകൂല്യം അനുവദിക്കും. വാട്ടര് ചാര്ജ് കുടിശികയുള്ളവരും പ്രവര്ത്തനരഹിതമായ മീറ്റര് ഉള്ളവരും ജനുവരി 31നു മുന്പ് അപേക്ഷ കുടിശിക അടച്ചുതീര്ക്കുകയും കേടായ മീറ്റര് മാറ്റി സ്ഥാപിക്കുകയും ചെയ്താല് മാത്രമേ അപേക്ഷ പരിഗണിക്കുകയുള്ളൂ. ഈ വര്ഷം മുതല് വാടകവീടുകളില് താമസിക്കുന്നവര്ക്കും ബിപിഎല് ആനുകൂല്യം അനുവദിക്കും.
