അപ്രതീക്ഷിതമായി തെരഞ്ഞെടുപ്പ് രാഷ്ട്രീയത്തിലേക്കെത്തിയതാണ് ഇപ്പോള് തിരുവനന്തപുരത്തിന്റെ ഡെപ്യൂട്ടിമേയറായി സ്ഥാനമേറ്റ ആശാനാഥ്. പിന്നാക്ക സംവരണ സീറ്റായ പാപ്പനംകോട് വാര്ഡിലെ കൗണ്സിലര് ആശാനാഥിന്റെ അമ്മാവന് കൈമനം ചന്ദ്രനായിരുന്നു. അദ്ദേഹമാണ് പാപ്പനംകോട് വാര്ഡില് ആദ്യമായി താമര വിരിയിച്ചത്. കൗണ്സിലറായിരിക്കെ വൈദ്യുതാഘാതമേറ്റ് ചന്ദ്രന് മരണപ്പെട്ടു. തുടര്ന്ന് 2016ല് നടന്ന ഉപതെരഞ്ഞെടുപ്പില് ചന്ദ്രന്റെ കുടുംബത്തില് നിന്നും ഒരാളെ മത്സരിപ്പിക്കണമെന്ന് പാര്ട്ടി തീരുമാനിക്കുകയും അങ്ങനെ സ്ഥാനാര്ത്ഥിയായി ആശാനാഥ് എത്തുകയുമായിരുന്നു.
കരമന എംഎംആര് എച്ച്എസ്എസിലെ സ്കൂള് വിദ്യാഭ്യാസത്തിനു ശേഷം നീറമണ്കര വിമണ്സ് കോളജില് നിന്ന് ബിഎസ്സി കെമിസ്ട്രിയില് ബിരുദം നേടി. പിന്നീട് ബിസിനസ് മാനേജ്മെന്റ് പഠിച്ചു. ജോലിക്ക് വേണ്ടി ശ്രമിക്കുന്നതിനിടയിലാണ് രാഷ്ട്രീയത്തിലേക്ക് ഇറങ്ങുന്നത്. വന് ഭൂരിപക്ഷത്തോടെ പാപ്പനംകോട് നിന്ന് ഉപതെരഞ്ഞെടുപ്പില് വിജയിച്ചു. അടുത്ത തെരഞ്ഞെടുപ്പില് ജനറല് വാര്ഡായിട്ടും വീണ്ടും പാപ്പനം കോടിനെ പ്രതിനിധീകരിച്ച് തിളക്കമാര്ന്ന വിജയം. ഇത്തവണത്തെ തെരഞ്ഞെടുപ്പില് കരുമം വാര്ഡില് നിന്നും മികച്ച വിജയം നേടി.
ഇപ്പോള് ബിജെപി യുടെ ജില്ലാ സെക്രട്ടറിയാണ്.സാധാരണക്കാരായവരുടെ നിരവധി പ്രശ്നങ്ങളില് ഇടപെട്ട് പരിഹരിക്കാന് കൗണ്സിലര് എന്ന നിലയില് ആശയ്ക്ക് സാധിച്ചു. എപ്പോഴും ജനങ്ങളുടെ കൂടെ നിന്ന് പ്രവര്ത്തിക്കുന്ന അവര് പപ്പനംകോട് വാര്ഡിലെ ജനകീയ കൗണ്സിലറായി പേരെടുത്തു. അതുകൊണ്ടു തന്നെ ഡെപ്യൂട്ടി മേയര് ആരാകണമെന്ന ചിന്ത വന്നപ്പോള് ബിജെപിക്ക് രണ്ടാമതൊന്ന് ആലോചിക്കേണ്ടി വന്നില്ല. കെ. ഗോപിനാഥന്റെയും സൗദയുടെ മകളായ ആശാനാഥിന്റെ ഭര്ത്താവ് ശിവകുമാര് ആണ്. മക്കള്: അദ്വൈത് ശിവ, അദ്വിക. സഹോദരന്: അരുണ്നാഥ്.
