പാലക്കാട്: അമ്മ എന്നത് മഹത്തായ സങ്കല്പമാണെന്നും ഈശ്വരനെക്കാളും വലുതാണ് അമ്മയെന്നും പശ്ചിമബംഗാള് ഗവര്ണര് ഡോ.സി.വി.ആനന്ദബോസ് പറഞ്ഞു.
ആനിക്കോട് സാന്ദീപനി സാധനാലയം ചാരിറ്റബിള് ആന്റ് വെല്ഫെയര് ട്രസ്റ്റിന്റെ ആഭിമുഖ്യത്തില് ആനിക്കോട് പാലപ്പൊറ്റയില് നിര്മ്മിക്കുന്ന ‘ശിവദം’ മുത്തശ്ശന് വീടിന്റെ ശിലാസ്ഥാപനം നിര്വ്വഹിക്കുകയായിരുന്നു അദ്ദേഹം. ചടങ്ങില് സംവിധായകന് ശരത്.എ ഹരിദാസന് അധ്യക്ഷത വഹിച്ചു.
നമ്മെയെല്ലാം മുന്നോട്ടു നയിക്കാന് പ്രേരണ സ്രോതസാകുന്നത് അമ്മയാണ്. ഈയൊരു തിരിച്ചറിവ് ഓരോരുത്തരുടെയും ജീവിതത്തില് ഉണ്ടാവണം. വിശ്വാസം, സ്നേഹം, ത്യാഗം എന്നിവയുടെയെല്ലാം പ്രതീകമാണ് അമ്മ. മുത്തശ്ശന് വീട് എന്ന സങ്കല്പം അതീവ മനോഹരമാണ്. പേര് കേള്ക്കുമ്പോള് തന്നെ പ്രത്യേക ചൈതന്യമാണ് ഉണ്ടാവുകയെന്നും അദ്ദേഹം കൂട്ടിചേര്ത്തു.
പൂര്ണ്ണകുംഭത്തോടും വേദമന്ത്രോച്ചാരണത്തോടും കൂടിയാണ് ഗവര്ണറെ വേദിയിലേക്ക് ആനയിച്ചത്. മാത്തൂര് വെട്ടിക്കാട് അദൈ്വതാശ്രമം മഠാധിപതി സ്വാമി ദേവാനന്ദപുരി മുഖ്യപ്രഭാഷണം നടത്തി. ആര്എസ്എസ് വിഭാഗ് സംഘചാലക്് വി.കെ.സോമസുന്ദരന്, മലബാര്ദേവസ്വം ബോര്ഡ് പാലക്കാട് ഏരിയാ കമ്മിറ്റി ചെയര്മാന് എം.ദണ്ഡപാണി, എട്ടരയോഗം സാന്ദീപനീ സാധനാലയ ചാരിറ്റബിള് ആന്റ് വെല്ഫെയര് ട്രസ്റ്റ് ചെയര്മാന് കെ.കെ.പത്മഗിരീഷ്, സാന്ദീപനി സാധനാലയം ഫൗണ്ടര് ചെയര്മാന് ഡോ.സി. ശ്യാം പ്രസാദ്, ധനലക്ഷ്മി ബാങ്ക് റീജിനല് മാനേജര് എം.പി.ശ്രീകുമാര്, സാന്ദീപനി സാധനാലയം ട്രസ്റ്റി പി.കെ.സുന്ദരന് എന്നിവര് സംസാരിച്ചു.
ഡോ.കെ.ജി.രവീന്ദ്രന്, വിവിധ ക്ഷേത്രങ്ങളില് ശയന പ്രദക്ഷിണം നടത്തിയ കൃഷ്ണദാസ് പുറമേരി എന്നിവരെ ഗവര്ണര് അവാര്ഡ് ഓഫ് എക്സലന്സ് നല്കി ആദരിച്ചു. കൂടാതെ മുത്തശ്ശന് വീടിന് സ്ഥലം നല്കിയ ഗിരിജശിവദാസിനെ സ്വാമി ദേവാനന്ദപുരി ആദരിച്ചു.
ബാലഗോകുലത്തിന്റെ ഗോകുല കലായാത്ര, മാത്തൂര് സേവാഭാരതി എന്നിവയുടെ ബ്രൗഷര് പ്രകാശനവും നടന്നു. ഗവര്ണര്ക്ക് ധനലക്ഷ്മി ബാങ്കിന്റെ ഉപഹാര സമര്പ്പണവും സാന്ദീപനി സാധനാലയത്തിന്റെ നെല്പ്പറ സ്നേഹോപഹാരവും, ശിവദം മുത്തശ്ശന് വീടിന്റെ ബ്ലൂ പ്രിന്റ്്, 3ഡി ഇമേജ് സമര്പ്പണവും ഉണ്ടായിരുന്നു.
