ശ്രീഹരിക്കോട്ട: രാജ്യത്തിന്റെ ബഹിരാകാശ വാണിജ്യ രംഗത്ത് പുതിയ ചരിത്രമെഴുതാന് ഐഎസ്ആര്ഒയുടെ ‘ബാഹുബലി’ റോക്കറ്റായ എല്വിഎം3-എം6 ഇന്ന് കുതിച്ചുയരും. ആന്ധ്രാപ്രദേശിലെ ശ്രീഹരിക്കോട്ട സതീഷ് ധവാന് ബഹിരാകാശ കേന്ദ്രത്തിലെ രണ്ടാം വിക്ഷേപണത്തറയില് നിന്ന് ഇന്ന് രാവിലെ 8.54 നാണ് വിക്ഷേപണം. ഇതിനായുള്ള 24 മണിക്കൂര് കൗണ്ട്ഡൗണ് ഇന്നലെ രാവിലെ 8.54 ഓടെ ആരംഭിച്ചിരുന്നു.
അമേരിക്കന് കമ്പനിയായ എഎസ്ടി സ്പേസ് മൊബൈലിന്റെ അത്യാധുനിക വാര്ത്താവിനിമയ ഉപഗ്രഹമായ ‘ബ്ലൂബേര്ഡ് ബ്ലോക്ക്2’ ആണ് ഈ ദൗത്യത്തിലൂടെ ഭ്രമണപഥത്തിലെത്തിക്കുന്നത്.
ഐഎസ്ആര്ഒയുടെ വാണിജ്യ വിഭാഗമായ ന്യൂ സ്പേസ് ഇന്ത്യ ലിമിറ്റഡുമായുള്ള (എന്എസ്ഐഎല്) കരാറിന്റെ അടിസ്ഥാനത്തിലാണ് വിക്ഷേപണം. ഐഎസ്ആര്ഒയെ സംബന്ധിച്ചിടത്തോളം ഇതൊരു നിര്ണായക ദൗത്യമാണ്. 6,100 കിലോഗ്രാമിലധികം ഭാരമുള്ള ബ്ലൂബേര്ഡ് ബ്ലോക്ക്2, എല്വിഎം3 റോക്കറ്റ് ലോ എര്ത്ത് ഓര്ബിറ്റില് എത്തിക്കുന്ന ഏറ്റവും ഭാരമേറിയ വാണിജ്യ ഉപഗ്രഹമാണെന്ന പ്രത്യേകതയുണ്ട്. സ്മാര്ട്ട് ഫോണുകളിലേക്ക് ബഹിരാകാശത്ത് നിന്ന് നേരിട്ട് ബ്രോഡ്ബാന്ഡ് ഇന്റര്നെറ്റ് (ഡയറക്ട് ടു ഡിവൈസ്) ലഭ്യമാക്കാന് ലക്ഷ്യമിട്ടുള്ളതാണ് ഈ ഉപഗ്രഹം. സാധാരണ മൊബൈല് ഫോണുകളില് അധിക ഹാര്ഡ്വെയറുകളുടെ സഹായമില്ലാതെ തന്നെ 4ജി, 5ജി സേവനങ്ങള് ലഭ്യമാക്കാന് ഇതിലൂടെ സാധിക്കുമെന്ന് എഎസ്ടി സ്പേസ് മൊബൈല് വ്യക്തമാക്കുന്നു. ബഹിരാകാശത്ത് വിന്യസിക്കുന്ന ഏറ്റവും വലിയ വാണിജ്യ വാര്ത്താവിനിമയ ആന്റിനകളിലൊന്നും ഇതിലുണ്ടാകും. ചന്ദ്രയാന്-3, വണ്വെബ് ദൗത്യങ്ങള് വിജയകരമായി പൂര്ത്തിയാക്കിയ എല്വിഎം3യുടെ ആറാമത്തെ ദൗത്യമാണിത്. വിക്ഷേപണത്തിനായുള്ള ഇന്ധനം നിറയ്ക്കല് ഉള്പ്പെടെയുള്ള അന്തിമഘട്ട ഒരുക്കങ്ങള് പുരോഗമിക്കുന്നതിനേക്കുറിച്ചും റോക്കറ്റിന്റെ എല്ലാ സംവിധാനങ്ങളും കാര്യക്ഷമമാണെന്നും ഐഎസ്ആര്ഒ വൃത്തങ്ങള് അറിയിച്ചിരുന്നു. വിക്ഷേപണം ഐഎസ്ആര്ഒയുടെ വെബ്സൈറ്റിലൂടെ തത്സമയം വീക്ഷിക്കാനുള്ള സൗകര്യവും ഒരുക്കിയിട്ടുണ്ട്.
