ന്യൂദൽഹി: അസം നിയമസഭാ തെരഞ്ഞെടുപ്പിൽ ബംഗ്ലാദേശ്, ബംഗ്ലാദേശി നുഴഞ്ഞുകയറ്റക്കാരെ പ്രധാന വിഷയമാക്കാനൊരുങ്ങി ബിജെപി. അസം സന്ദർശന വേളയിൽ പ്രധാനമന്ത്രി നരേന്ദ്ര മോദി ഇക്കാര്യം വ്യക്തമായി സൂചിപ്പിച്ചിരുന്നു. അസം മുഖ്യമന്ത്രി ഹിമന്ത ബിശ്വ ശർമ്മ നുഴഞ്ഞുകയറ്റ വിഷയം നിരന്തരം ഉന്നയിച്ചുവരികയാണ്.
തിരഞ്ഞെടുപ്പ് വിഷയങ്ങളും തന്ത്രങ്ങളും ചർച്ച ചെയ്യുന്നതിനായി ഡിസംബർ 26, 27 തീയതികളിൽ അസം ബിജെപി ഒരു പ്രധാന യോഗം ചേരുന്നുണ്ട്. അടുത്ത വർഷം അസമിൽ നിയമസഭാ തിരഞ്ഞെടുപ്പ് നടക്കാനിരിക്കെ ഈ യോഗത്തിന് ഏറെ പ്രാധാന്യമുണ്ട്.
ഈ ആഴ്ചയിലെ യോഗത്തിൽ മുതിർന്ന ദേശീയ പാർട്ടി നേതാക്കളും പങ്കെടുക്കും. സംസ്ഥാന സർക്കാരിന്റെ പ്രവർത്തനങ്ങളെക്കുറിച്ചും കേന്ദ്ര സർക്കാരിന്റെ പ്രവർത്തനങ്ങളെക്കുറിച്ചും ജനങ്ങളെ അറിയിക്കുന്നതിനായി അസം ബിജെപി ഇതിനകം തന്നെ സംസ്ഥാനത്ത് ഒരു ജനസമ്പർക്ക പരിപാടി നടത്തുന്നുണ്ട്.
കൂടാതെ കേന്ദ്ര ആഭ്യന്തരമന്ത്രി അമിത് ഷാ അടുത്ത ആഴ്ച അസം സന്ദർശിച്ചേക്കും. പ്രധാനമന്ത്രിയുടെയും ആഭ്യന്തരമന്ത്രിയുടെയും സന്ദർശനങ്ങളിലൂടെ അസം കേന്ദ്ര സർക്കാരിന് ഏറെ പ്രധാനമാണെന്നും കേന്ദ്ര സർക്കാർ അസമിന്റെ വികസനത്തിനായി തുടർച്ചയായി പ്രവർത്തിക്കുന്നുണ്ടെന്നുമുള്ള സന്ദേശം അസമിലെ ജനങ്ങളിലേക്ക് എത്തിക്കും.
ബംഗ്ലാദേശി നുഴഞ്ഞുകയറ്റക്കാർക്കെതിരെ
ഹിമന്ത ബിശ്വ ശർമ്മ
തിങ്കളാഴ്ച ഹിമാന്ത ബിശ്വ ശർമ്മ സോഷ്യൽ മീഡിയയിൽ ബംഗ്ലാദേശി നുഴഞ്ഞുകയറ്റക്കാർക്കെതിരെ രൂക്ഷമായി പ്രതികരിച്ചു.
“അസം ജാഗ്രതയിലാണ്, ബംഗ്ലാദേശി നുഴഞ്ഞുകയറ്റക്കാർ അസമിൽ സ്ഥിരതാമസമാക്കുന്നു, ബംഗ്ലാദേശിൽ പട്ടാപ്പകൽ ഹിന്ദുക്കൾ കൊല്ലപ്പെടുന്നു. ഈ നുഴഞ്ഞുകയറ്റക്കാരെ തുരത്താനുള്ള പ്രചാരണം തുടരും.” – ഹിമന്ത ബിശ്വ ശർമ്മ പറഞ്ഞു. കൂടാതെ ബംഗ്ലാദേശിൽ ഹിന്ദുക്കളെ എങ്ങനെയാണ് പീഡിപ്പിക്കുകയും ജീവനോടെ ചുട്ടുകൊല്ലുകയും ചെയ്യുന്നത് എന്നത് നമ്മൾ കണ്ടിട്ടുണ്ടെന്നും അദ്ദേഹം കൂട്ടിച്ചേർത്തു.
വടക്കുകിഴക്കൻ മേഖലയെ തങ്ങളുടെ നിയന്ത്രണത്തിലാക്കാനുള്ള ഉദ്ദേശ്യം അവിടെ അധികാരത്തിലിരിക്കുന്നവർ പ്രകടിപ്പിക്കുന്നു. ഞങ്ങൾ സൂക്ഷ്മ നിരീക്ഷണം നടത്തുന്നു. വ്യത്യസ്ത സമയങ്ങളിൽ ബംഗ്ലാദേശിൽ നിന്ന് ഇവിടെയെത്തിയ ധാരാളം ആളുകൾ അസമിലും ഉണ്ട്. അതിനാൽ മുഴുവൻ വിഷയത്തിലും നാം സൂക്ഷ്മ നിരീക്ഷണം നടത്തുകയും ജാഗ്രത പാലിക്കുകയും വേണമെന്നും അദ്ദേഹം കൂട്ടിച്ചേർത്തു.
