തിരുവനന്തപുരം: ജനുവരി രണ്ടാം വാരത്തില് വിഴിഞ്ഞം അന്താരാഷ്ട്ര തുറമുഖത്തിന്റെ അടുത്ത ഘട്ടത്തിന്റെ നിര്മ്മാണ പ്രവര്ത്തനങ്ങളുടെ ഉദ്ഘാടനം നടക്കുമെന്നും ഇതിനായി അദാനിയുടെ സൗകര്യം ആരാഞ്ഞ ശേഷം അന്തിമ തീയതി പ്രഖ്യാപിക്കുമെന്നും തുറമുഖ വകുപ്പ് മന്ത്രി വി. എന്. വാസവന് അറിയിച്ചു.
വാണിജ്യപരമായ പ്രവര്ത്തനം ആരംഭിച്ച് ഒരു വര്ഷം പൂര്ത്തിയാക്കിയപ്പോള്, ലക്ഷ്യമിട്ടതിലും 4 ലക്ഷത്തോളം കണ്ടെയ്നറുകള് അധികം കൈകാര്യം ചെയ്യാന് സാധിച്ചുവെന്നും മന്ത്രി പറഞ്ഞു.
2024 ഡിസംബര് 3-നാണ് എന്ജിനീയര്മാര് കംപ്ലീഷന് സര്ട്ടിഫിക്കറ്റ് നല്കിയതിനെ തുടര്ന്ന് വാണിജ്യ പ്രവര്ത്തനങ്ങള് ആരംഭിച്ചത്. തുറമുഖത്തിന്റെ ആദ്യ വര്ഷത്തെ ലക്ഷ്യം 10 ലക്ഷം കണ്ടെയ്നറുകള് കൈകാര്യം ചെയ്യാനായിരുന്നു. എന്നാല് കഴിഞ്ഞ ദിവസം വരെയുള്ള കണക്കനുസരിച്ച് 636 കപ്പലുകള് വരികയും 14 ലക്ഷത്തോളം കണ്ടെയ്നറുകള് കൈകാര്യം ചെയ്യുകയും ചെയ്തിട്ടുണ്ട്.
ഏഷ്യന് ഭൂഖണ്ഡത്തിലെ തീരങ്ങളില് മുന്പ് വന്നിട്ടില്ലാത്ത എം.എസ്.സി. ടര്ക്കി, എം.എസ്.സി. ഐറീന, എം.എസ്.സി. വെറോന ഉള്പ്പെടെയുള്ള ലോകത്തിലെ തന്നെ ഏറ്റവും കൂറ്റന് കപ്പലുകള് വിഴിഞ്ഞത്ത് എത്തിയിരുന്നു.
തുറമുഖത്തിന്റെ രണ്ടും, മൂന്നും, നാലും ഘട്ട നിര്മ്മാണ പ്രവര്ത്തനങ്ങള്ക്ക് തുടക്കം കുറിക്കാനുള്ള തയ്യാറെടുപ്പുകള് പൂര്ത്തിയായി.
രണ്ടാം ഘട്ടത്തില്, നിലവിലുള്ള 800 മീറ്റര് ബര്ത്ത് 1200 മീറ്റര് കൂടി വര്ദ്ധിപ്പിച്ച് 2000 മീറ്റര് ബര്ത്താക്കി മാറ്റും. ഇതോടെ കൂറ്റന് കപ്പലുകള്ക്ക് ഒരേസമയം വന്നു ചരക്കിറക്കാന് സാധിക്കും. കൂടാതെ, നിലവിലുള്ള 2.96 കിലോമീറ്റര് ബ്രേക്ക് വാട്ടര് 920 മീറ്റര് കൂടി വര്ദ്ധിപ്പിച്ച് 3900-ല് പരം മീറ്ററാക്കി മാറ്റും.
പുതിയ കരാര് അനുസരിച്ച്, രണ്ടാം, മൂന്നാം, നാലാം ഘട്ടങ്ങള് 2028-ഓടു കൂടി പൂര്ത്തീകരിക്കും. ഇതോടെ വിഴിഞ്ഞം ലോകം ശ്രദ്ധിക്കുന്ന തുറമുഖമായി മാറുമെന്നും മന്ത്രി പറഞ്ഞു.
