കാസര്കോട്: കേരളത്തില് ഇടത്-വലത് മുന്നണികള് പ്രാദേശിക ഭരണകേന്ദ്രങ്ങള് പിടിച്ചടക്കുമ്പോഴും ജില്ലയിലെ മധൂര് പഞ്ചായത്തില് 46-ാം വര്ഷവും ബിജെപി ഭരണം ഉറപ്പിച്ചു. പഞ്ചായത്ത് രൂപീകരിച്ചതു മുതല് 50 വര്ഷം ഭരണം നിലനിര്ത്തുന്ന അപൂര്വ നേട്ടത്തിലേക്ക് മധൂര് അടുത്തുകൊണ്ടിരിക്കുകയാണ്. ബിജെപിയുടെ ഈറ്റില്ലമായി അറിയപ്പെടുന്ന മധൂര് പഞ്ചായത്ത് പിടിച്ചെടുക്കാന് ഇടതു-വലത് മുന്നണികള് ഇത്തവണ നടത്തിയ ശ്രമങ്ങള് അമ്പേ പരാജയപ്പെട്ടു. ഈ വര്ഷം വാര്ഡുകളുടെ എണ്ണം 20-ല് നിന്ന് 24 ആയി വര്ധിച്ചപ്പോഴും ബിജെപി തങ്ങളുടെ വിജയം കൂടുതല് ശക്തമാക്കി. 24 വാര്ഡില് 15 എണ്ണവും ബിജെപി നേടി.
യുഡിഎഫ് ഒന്പത് വാര്ഡുകളില് വിജയക്കൊടി പാറിച്ചപ്പോള് എല്ഡിഎഫിന് സീറ്റ് ഒന്നും നേടാന് കഴിഞ്ഞില്ല. കഴിഞ്ഞ തെരഞ്ഞെടുപ്പില് 13 സീറ്റുണ്ടായിരുന്ന ബിജെപി ഇത്തവണ രണ്ട് സീറ്റുകള് അധികമായി നേടി 15-ല് എത്തി. കഴിഞ്ഞ തവണ നാല് സീറ്റുകള് നേടിയ എല്ഡിഎഫ് ഇത്തവണ പൂജ്യത്തിലേക്ക് വീണു എന്നത് ശ്രദ്ധേയമാണ്. മൂന്ന് സീറ്റുകള് മാത്രം നേടിയ യുഡിഎഫ്, എല്ഡിഎഫിന്റെ വോട്ടുകള് കൂടി സ്വന്തമാക്കിയതോടെ ഒന്പത് സീറ്റുകളില് വിജയിച്ചു.മധൂര്, പട്ട്ള, ഷിരിബാഗിലു എന്നീ വില്ലേജുകള് പൂര്ണമായും കുഡലു വില്ലേജ് ഭാഗികമായും ഉള്പ്പെടുന്ന 26.04 ചതുരശ്ര കിലോമീറ്റര് വിസ്തൃതിയുള്ള ഗ്രാമപഞ്ചായത്തായ മധൂര് കേരള രാഷ്ട്രീയത്തില് ബിജെപിക്ക് തങ്ങളുടെ ശക്തിയും ആധിപത്യവും അരക്കിട്ടുറപ്പിക്കാനുള്ള ഒരു അപൂര്വ കേന്ദ്രമായി നിലകൊള്ളുന്നു.
