മുംബൈ: ഭാരതത്തിന്റെ പരമ്പരാഗത കോലാപ്പുരി ചെരിപ്പുകള്ക്ക് ആഗോള തലത്തില് വിപണി ലഭിക്കുന്നതിന് അരങ്ങൊരുങ്ങുന്നു. വിഖ്യാത ഇറ്റാലിയന് ബ്രാന്ഡായ പ്രഡ ഭാരതത്തിലെ രണ്ട് കരകൗശല സ്ഥാപനങ്ങളുടെ സഹകരണത്തോടെ രണ്ടായിരം ജോഡി കോലാപ്പുരി ചെരിപ്പുകള് അവതരിപ്പിക്കും.
ആറു മാസം മുമ്പ് പ്രഡ ഇറക്കിയ പുതിയ മോഡല് ചെരുപ്പുകളുമായി ബന്ധപ്പെട്ടുയര്ന്ന വിവാദത്തിനു പിന്നാലെയാണ് ഈ നീക്കം. കോലാപ്പുരി ചെരിപ്പുകളെ കോപ്പിയടിച്ചാണ് പ്രഡ പുതിയ മോഡലുകള് ഇറക്കിയതെന്ന് ആരോപണം ഉയര്ന്നു. മിലാന് നഗരത്തില് വച്ച് പുതിയ തുകല് ചെരിപ്പുകള് പുറത്തിറക്കിയതിനു പിന്നാലെ ഭാരതത്തില് നിന്ന് പ്രഡക്കെതിരെ ശക്തമായ വിമര്ശനവും രോഷവുമുയര്ന്നു. പുതിയ മോഡല് തയാറാക്കിയപ്പോള് കോലാപ്പുരിയുടെ ഡിസൈന് പ്രചോദനമായെന്ന് പ്രഡയുടെ സീനിയര് എക്സിക്യൂട്ടീവ് ലൊറന്സോ ബെര്ട്ടെല്ലി പിന്നീട് സമ്മതിച്ചു.
ഇതിനു പിന്നാലെയാണ് കോലാപ്പുരി കരകൗശല ഭംഗിയും ഇറ്റാലിയന് സാങ്കേതിക മികവും ഒന്നിപ്പിക്കാനുള്ള ശ്രമങ്ങള് ആരംഭിച്ചത്. കമ്പനിയുടെ പ്രതിനിധികള് ഭാരതത്തിലെത്തി. കേന്ദ്ര, സംസ്ഥാന മന്ത്രാലയങ്ങളുമായി ചര്ച്ച നടത്തി. സര്ക്കാര് പിന്തുണയുള്ള മഹാരാഷ്ട്രയിലെ ലിഡ്കോം, കര്ണാടകയിലെ ലിഡ്കാര് എന്നീ സ്ഥാപനങ്ങളുമായി കരാര് ഒപ്പിട്ടു. ഇവരുടെ സഹകരണത്തോടെ കോലാപ്പുരി ഡിസൈനില് നിന്ന് പ്രചോദമുള്ക്കൊള്ളുന്ന രണ്ടായിരം ജോഡി പുതിയ ചെരിപ്പുകള് പ്രഡ അവതരിപ്പിക്കും. എണ്ണായിരം യൂറോ ആയിരിക്കും ഒരു ജോഡിക്ക് യൂറോപ്പില് വില. ലിഡ്കോം, ലിഡ്കാര് സ്ഥാപനങ്ങളുമായി മൂന്നു വര്ഷത്തേക്കാണ് കരാര്.
ആഗോള ബ്രാന്ഡായ പ്രഡയുടെ പിന്തുണ ലഭിക്കുന്നതോടെ കോലാപ്പുരി ലോക പ്രശസ്ത ഡിസൈനായി മാറുമെന്നും ഈ രംഗത്തു പ്രവര്ത്തിക്കുന്ന ഭാരതത്തിലെ കരകൗശല സ്ഥാപനങ്ങള്ക്ക് പുതിയ സാധ്യതകള് തുറക്കുമെന്നും ലിഡ്കോം മാനേജിങ് ഡയറക്ടര് പ്രേരണ ദേശഭരാതര് പറഞ്ഞു.
