ന്യൂദൽഹി: ലോക്സഭയുടെ നിർണായകമായ ശൈത്യകാല സമ്മേളനം തുടരുന്നതിനിടെ പ്രതിപക്ഷ നേതാവ് രാഹുൽ ഗാന്ധി ബെർലിനിലേക്ക് പോകുന്നതിനെ വിമർശിച്ച് ബിജെപി. പ്രതിപക്ഷ നേതാവെന്ന കടമ നിറവേറ്റുന്നതിന് പകരം വിദേശ യാത്ര തിരഞ്ഞെടുക്കുന്ന രാഹുൽ ഗാന്ധി പ്രതിപക്ഷ നേതാവല്ല, പര്യടന നേതാവാണെന്ന് പരിഹസിച്ച് ബിജെപി ദേശീയ വക്താവ് ഷെഹ് സാദ് പൂനാ വാല.
പാർലമെൻ്റിൽ രാജ്യത്തെ പ്രധാനപ്പെട്ട സംഭവവികാസങ്ങൾ ചർച്ച ചെയ്യുന്ന സെഷനുകൾ നടക്കുമ്പോൾ രാഹുൽ വിദേശത്തെയ്ക്ക് ടൂർ പോവുകയാണെന്നും അദ്ദേഹം പറഞ്ഞു. ഓരോ യാത്രയിലും അദ്ദേഹം വിദേശ രാജ്യത്ത് വച്ച് ഭാരതത്തെ അവഹേളിക്കുകയാണ് ചെയ്യുന്നതെന്നും അദ്ദേഹം പറഞ്ഞു. ഡിസംബർ 17 ന് ബെർലിനിൽ നടക്കുന്ന ഇന്ത്യൻ ഓവർസീസ് കോൺഗ്രസ് പരിപാടിയിൽ പങ്കെടുക്കാനാണ് രാഹുൽ ഗാന്ധി പോകുന്നത്, അവിടെ അദ്ദേഹം യൂറോപ്പിലുടനീളമുള്ള ഐഒസി നേതാക്കളുമായി കൂടിക്കാഴ്ച നടത്തും.
“വീണ്ടും പര്യടന നേതാവ് തന്റെ കഴിവിന്റെ പരമാവധി ചെയ്യുന്നു! വിദേശ പര്യടനത്തിന് പോകുന്നു! പാർലമെന്റ് ഡിസംബർ 19 വരെ നീണ്ടുനിൽക്കും, പക്ഷേ ഡിസംബർ 15 മുതൽ 20 വരെ രാഹുൽ ഗാന്ധി ജർമ്മനി സന്ദർശിക്കുമെന്ന് റിപ്പോർട്ടുകൾ സൂചിപ്പിക്കുന്നു! രാഹുൽ ബിഹാർ തിരഞ്ഞെടുപ്പ് സമയത്തും വിദേശത്ത് പോയി ജംഗിൾ സഫാരി നടത്തുകയായിരുന്നു,” ഷെഹ് സാദ് പൂനാ വാല എക്സിൽ കുറിച്ചു.
പാർട്ടിയുടെ ആഗോള ഇടപെടൽ ശക്തിപ്പെടുത്തുക എന്ന ലക്ഷ്യത്തോടെയുള്ള ഒരു സുപ്രധാന സംരംഭമായാണ് ഇന്ത്യൻ ഓവർസീസ് കോൺഗ്രസ് (ഐഒസി) രാഹുലിന്റെ സന്ദർശനത്തെ വിശേഷിപ്പിച്ചത്. ഡിസംബർ 17 ന് രാഹുൽ ഗാന്ധി ബെർലിനിൽ ഇന്ത്യൻ പ്രവാസികളെ അഭിസംബോധന ചെയ്യുമെന്ന് ഐഒസി പ്രഖ്യാപിച്ചു. യൂറോപ്പിലുടനീളമുള്ള ഐഒസി ചാപ്റ്ററുകളുടെ പ്രസിഡന്റുമാർ എൻആർഐ പ്രശ്നങ്ങൾ, കോൺഗ്രസ് പാർട്ടി ശക്തിപ്പെടുത്തൽ, പാർട്ടിയുടെ പ്രത്യയശാസ്ത്ര വ്യാപ്തി വികസിപ്പിക്കുന്നതിനുള്ള തന്ത്രങ്ങൾ എന്നിവ ചർച്ച ചെയ്യും.
സാം പിട്രോഡ, ഡോ. ആരതി കൃഷ്ണ തുടങ്ങിയ മുതിർന്ന നേതാക്കളുടെ സാന്നിധ്യം പരിപാടിയിൽ ഉണ്ടാകും.
