തിരുവനന്തപുരം: രാഹുല് ഗാന്ധി ഇന്ത്യയെക്കുറിച്ച് ഒരിയ്ക്കലും നല്ലത് പറയാത്ത വ്യക്തിയാണെന്ന് ബിജെപി നേതാവ് രാജീവ് ചന്ദ്രശേഖര്. അതുകൊണ്ടാണ് രാഷ്ട്രപതി റഷ്യന് പ്രസിഡന്റ് പുടിന് നല്കിയ വിരുന്നിലേക്ക് ക്ഷണിക്കാതിരുന്നതെന്നും രാജീവ് ചന്ദ്രശേഖര് പറഞ്ഞു.
ഒരിയ്ക്കലും സര്ക്കാര് ക്ഷണിക്കുന്ന പരിപാടികളില് പങ്കെടുക്കാത്ത വ്യക്തിയുമാണ് രാഹുല് ഗാന്ധിയെന്നും രാജീവ് ചന്ദ്രശേഖര് പറഞ്ഞു. ഇക്കഴിഞ്ഞ സ്വാതന്ത്ര്യദിന പരിപാടിയില് പോലും രാഹുല് ഗാന്ധി പങ്കെടുക്കാതിരുന്നിനെ സൂചിപ്പിച്ചുകൊണ്ടായിരുന്നു രാജീവ് ചന്ദ്രശേഖറിന്റെ ഈ പ്രസ്താവന.
രാഹുല് ഗാന്ധി പുറത്തുപറയുന്ന ജ്ഞാനത്തിന്റെ വാക്കുകള് പലപ്പോഴും അയാളെ തന്നെ അമ്പരപ്പിക്കുന്ന ഒന്നാണ്. അതുകൊണ്ട് പുടിനെ കാണാന് വിളിച്ചില്ല എന്ന രാഹുല് ഗാന്ധിയുടെ വാക്കുകള്ക്ക് പ്രാധാന്യം നല്കേണ്ട കാര്യമില്ല. കോണ്ഗ്രസ് കേരളത്തിലും പുറത്തും രാഹുല് ഗാന്ധി പെരുമാറുന്നതുപോലെയാണ് പെരുമാറുന്നത്. അവര് എന്താണ് ഇന്ത്യയ്ക്ക് നല്ലതെന്നോ ദേശീയതാല്പര്യങ്ങളെക്കുറിച്ചോ ഒന്നും ചിന്തിക്കുന്നില്ല. ഇന്ത്യ റഷ്യ ബന്ധം എത്രയോ ദശകങ്ങളെ അതിജീവിച്ച് മുന്നേറുന്ന ഒന്നാണ്. ടെക്നോളജികൈമാറ്റം, സൗഹൃദം അങ്ങിനെ പല കാര്യങ്ങളിലും ഇന്ത്യയും റഷ്യയും തമ്മിലുള്ള ബന്ധം ദൃഢമാണ്. എന്നാല് ഗാന്ധി കുടുംബം മറ്റൊരു രീതിയിലാണ് പെരുമാറുന്നത്. അവര്ക്ക് ജീവിതത്തില് ഇനി സമ്പാദ്യത്തിന്റെ ആവശ്യമില്ലാത്തവരാണ്. അതിനാല് അവരുടെ കാഴ്ചപ്പാടും വേറെയാണ്. -രാജീവ് ചന്ദ്രശേഖര് പറഞ്ഞു.
അതേ സമയം ശശി തരൂരിനെ ക്ഷണിച്ചത് കോണ്ഗ്രസ് നേതാവ് എന്ന നിലയിലോ കോണ്ഗ്രസിന്റെ പ്രതിനിധി എന്ന നിലയിലോ അല്ല. പകരം വിദേശകാര്യ സ്റ്റാന്റിംഗ് കമ്മിറ്റി ചെയര്മാന് എന്ന നിലയിലാണെന്നും രാജീവ് ചന്ദ്രശേഖര് വ്യക്തമാക്കി.
