പന്തളം: തദ്ദേശ തെരഞ്ഞെടുപ്പ് പ്രചാരണത്തില് ജനങ്ങള്ക്കിടയില് വിഭാഗീയത സൃഷ്ടിച്ച് മുതലെടുപ്പു നടത്താന് ഇടത്, വലത് മുന്നണികള് ശ്രമിക്കുന്നതായി കേന്ദ്രമന്ത്രി സുരേഷ് ഗോപി.
പന്തളത്ത് എന്ഡിഎ തെരഞ്ഞെടുപ്പു പൊതുയോഗം ഉദ്ഘാടനം ചെയ്യുകയായിരുന്നു അദ്ദേഹം. ശബരിമലയില് അടിസ്ഥാന സൗകര്യങ്ങളില്ലാത്തതാണ് തിരക്കുനിയന്ത്രണത്തിലും മറ്റുമുണ്ടാകുന്ന പ്രശ്നം. ഇപ്പോഴുള്ള സൗകര്യങ്ങള് അപര്യാപ്തമാണ്. സുഖകരമായി ദര്ശനം നടത്താനുള്ള സൗകര്യമാണ് ഒരുക്കേണ്ടത്. ശബരിമലയുടെ കാര്യത്തില് കേന്ദ്രസര്ക്കാര് ഇടപെടേണ്ട സമയവും മാര്ഗങ്ങളുമുണ്ട്. ഉചിത സമയത്ത് അതുണ്ടാകുമെന്നും സുരേഷ് ഗോപി പറഞ്ഞു.
ഏകീകൃത സിവില്കോഡ് നിലവില് വരുന്നതോടെ ശബരിമലയില് വലിയ മാറ്റങ്ങള് വരും. നൂറ് ഇവി ബസുകളാണ് ശബരിമലയിലേക്ക് കേന്ദ്രം അനുവദിച്ചത്. മോദിയുടെ ഫോട്ടോ വെയ്ക്കേണ്ടി വരുമോ എന്ന് ഭയന്ന് അവ വാങ്ങി ഓടിക്കാതിരിക്കുകയാണ്. ഈ സീസണിലെങ്കിലും അവ ഉപയോഗിക്കണം. കേന്ദ്രപദ്ധതികള് പലതും സംസ്ഥാനം നടപ്പാക്കുന്നില്ലെന്നും സുരേഷ് ഗോപി പറഞ്ഞു.
ബിജെപി ജില്ലാ പ്രസിഡന്റ് അഡ്വ. വി.എ. സൂരജ് അധ്യക്ഷത വഹിച്ചു. ദേശീയ നിര്വാഹക സമിതിയംഗം പി.കെ. കൃഷ്ണദാസ് മുഖ്യപ്രഭാഷണം നടത്തി. സംസ്ഥാന വൈസ് പ്രസിഡന്റ് പന്തളം പ്രതാപന്, സംസ്ഥാന സമിതിയംഗം ബി. രാധാകൃഷ്ണ മേനോന്, ജില്ലാ സെക്രട്ടറി ബിനുമോന്, പന്തളം നഗരസഭാ ചെയര്മാന് അച്ചന്കുഞ്ഞ് ജോണ്, മുന് ചെയര്പേഴ്സണ് സുശീലാ സന്തോഷ്, ശങ്കുണ്ണിദാസ് തുടങ്ങിയവര് പ്രസംഗിച്ചു.
